حبوبات العولمه................. منقول

قالت حبوبة لميس
مخاطبه حاجه شيرازالتي كانت منهمكه في فرك الباميه المحوره جينيا
والله ياشيراز ان ما عارفاك بتفركي كيف بي (مفراكة الليزر ) دي كيف. الناس بقو يفركو بالمفراكه ( الكهرومغناطيسيه )
ردت عليها حبوبه شيراز وهي تطفي البوتجاز الذي يعمل بنظريه الاوتار الفائقه
نسو شنو يابت عمي نحن لسه مادخلنا في عصر الصرخه العلميه .لكن اسكتي ساي ما وريتك امس حاجه ( رؤى ) عملت شنو
نططتت حبوبه لميس عيونها تتهيا لاستقبال الشمار وقالت مالا؟. انا عارفاها دي زوله عندها ( ضلالات عدميه) تلقاها سوت ليها عمله كبيره.!!
اجابتها حاجه شيراز
امس مشيت ليها البيت كنت دايره لي ( ثالث كرومات السايكوبالتيك) عشان الون الخبيز لقيتا ليك ماسكه (الاب توب ) بتاعه وعامله شات مع واحد عجوز من (هضبة التبت) تصوري. المرا المابتخجل دي
ومواصله لهذه القطيعه الالكترونيه قالت حاجه لميس
انا زاتي المرا دي ما هضمتها من ماسوت لينا القهوه في الجبنه الصانعنها من معدن ( التيتانوم) يعني ما سمعت بي جبنة (الالياف الضوئيه)
اضاف حاجه شيراز..
والله صحي (الماوس مابزيل بلم) العالم يتقدم وديل لسه في التخلف لكن انت امس مالك مامشيتي معانا لي الاحتفال بالذكري السنويه ( لجولدن جلاشو )
اجابتها حاجه لميس.
امس بعيد عنك مشيت افحص ( الجينات ) بتاعتي اصلو عندي جين كده مغلبني قلت اخلعو ارتاح منو مره واحده وبالمره غشيت الصائغ غيرت غوايشي بمعدن نفيس جديد اسمو (الزراتكلينيوم) جابوه من كوكب مامتذكراه لكن يدور حول نجم اسمو ( لالاند ) مننا زي ثمانيه سنه ضوئيه
هزت حبوبه شيراز راسها وقالت:
والله بقيتي خطيره عدييييل كده وغوائش البتاع القلتيهو ده انا زاتي ما سمعتبيهو..كدي وريني واحده
قالت ليها حاجه لميس
ديل ياختي للمناسبات بس ما بطلعوهن ساي ثم رفعت جاجبه الايسر باندهاش مفتعل واضافت وبعدين انت الظاهر عليك ما سمعت بي شنطة اليد الجديده العاملنها من( رقايق السيلكون )
سحبت حاجه شيراز نفسا عميقا وهي تجهز عبارات مناسبه لترد بها على هذه الهجمه الشرسه وترد لها البوبار بمثله
ثم قالت: حاجاتك القلتيها دي صاح انا مامرت علي.. لكن انت برضو ما سمعت بي ( الكفتيرات الجديده البتعمل بموجات الالفا) ولا بي ( الكمشه الاستقطابيه) ودي كمشه بتغرف الملاح براها وبتكبو في الصحن وعندك كمان الحله ( الغوتنيه) ودي بتنجض الملاح ( بالطاقه القمريه)
وفي هذ اللحظه دخل عليهن حاج (لؤي) زوج حبوبه شيراز وهو في الثمانيات ووقف جنب الباب ليتصنت على هذا ( البوباريشن ) المعتق وسمع حاجه لميس تواصل حديثها لزوجته وهي تقول انا ولدي المغترب في ( كوكب نيوتن) جاب ليهو (ولد الي) صغيروني يساعد مرتو في تقطيع السلطه غسيل العده
وفي هذه اللحظه دخل حاج لؤي وقال : قومن يانسوان سون الغداء وخلن( الفشخره ) الفاضيه دي
واضاف في سره بغضب وانشاء الله تقوم بيكن قنبله ( يوزوترونيه) تريحنا من نقتكن الكتيره دي

انشاله حال الحبوبات بعد سنين حتى لو فى امريكا ما فارقه 00لكن حبوبات ظراف

دييل الجيل الثالث يا ابو السيد من الحبوبات؛؛؛؛؛؛؛؛
طبعا حبوبات ظراف ومواكبات مع الزمن ناس حبوبة شيراز وشيرين ورندا بناغشو الماشكل الاسرية وبحلوها عبر الفيس بوك والمسنجر يالهم من حبوبات ربنا يخليهن؛؛؛؛؛؛؛؛
دمتم

لكن ما حبوبات مودرن وستايل كمان

(يجازي محنك)

أخي عوض ... تصدق الواحد مع غرف الغربة محتاج يتنفس شوية ..ويضحك ... عشان ما يشيل هموم هذه الدنيا ...الزايلة الفانية ...بالجد موضوعك جميل ... ولا تستبعد اي شئ مع هذا العلم المتطور والإستكشافات الهائلة ... اليوم الصباح بالجزيرة شاهدت اليابانيين بمسحوا الجوال على سطح معين ويركبون القطار أو البصات ...دون كمساري او مساءلة ..وباين الحساب بعدين ..ولا كيف ما عارف ...المهم تكنلوجيا وتتطور ...فشكراً لك على هذا العرض الرائع ... محبتي ...