أشواق الجسد

أشواق الجسد
إسماعيل محمد هجانه

إتواعدنا
قلنا نتقابل جنب الجدول
قصاد جرف الشوق
الخاتي طورية العشم
على كتف الموية هدية
وكان الموج واقف
ومتزاحم على ابواب الشجن
مترقب واسوق سعن الحنين
السارح في ساقية هواك
تسقي كل الناس
كان جنبك محروق الجوف
وعطشان ...
رويانة بيك الفجة.
علق في ضهر الريح ضحكتك
ضحكت عليك قمرية
وقتين صدقتي كضبك
وبللتي عطش المواعيد باليباس
وكابرتي
إنفعالك ودر هيبة رزانتك
شخبط روعة ملامحك
مسح بيك الارض
ناداك هاتف رن جواك
جرس الشوق
شلتي الهاتف قريتي رسايلك
فتشتيهو
كان مسجل في دفتر الغياب
دايما حضور
وغابت معاهو انوثتك
يا بنية ..
كان جنبك ...
ومحازي جريد نخل الكتابة مجاز
إنحاز الطين لاحتمالات الشهيق
وفرد توب الدعاش
إتلفتي وما شفتيهو
شافك مجداف
على ساعد مركب الاحلام
مسك ريشة حاسة الوتر السادس
رسم صورتك
وشم
على شبكية شباك السماكة
وتصطادني سنارة مراسيك
المرمية في بحر عينيك
تفتح خشم الكلام
دمعة وجع
رجع
مستنيك
شدي حيل المرسى
على نشيد المطرة الشايلة
قول البنات المبستر في عذابتن
لسع راجيك النخيل خارج سياقات
الزمن المألوف
ويوصي الدميرة على جروف العشم المشققة
على ضفاف العطش
وبقت صورتك طشاش
ما تتنهدي
خلاص شجر الحراز
جدع مجاديف النزيف
شقة صيف الارصفة
وقص وريد الريد
يتأرجح تعب المسافة
بين جيتك
والغياب
ورسل قناديل المزارع تسأل
الدروب التايهة في بهجة ندالك
كان تديني البشارة
نادى عليك الخوف
الطالع من جوف الدموع
ومزروع في تراب المواعيد
شتلة غنى في صفقة الطنبارة
إيقاع عبرةعلى ضفة النيلين
تشد إنتباه العاشقين
تفتح اغنيات الحقيبة
صدرها المشبع بالحنين
ومسجى في شوق البنيات القبيل
قبلت رسمك في الخيال
إدفقت رعشتك والشوق
طشت شهقتك في زفيري
إتحاشى صدرك لمس الكلام
فترإنتباه عيونك
إتقينت
شرد صمت المكان
صدرك صدى رعشة الخوف
اتمدد فيني ونام
ودسانا النيل بين موجتين
وانوثتك
يا ناسية مدن تفاصيلك بين ايدي
اضارى القيف
جدع الموج طرحتك
وخلى باقي جراحك تنتح
قاعدة وسط الناس
وانتي براك
في عزلة
تعالي ..
يابت تعالي
تجيك ال...
النجيمات الشايلة الشوق مصباح
يتسكع في ملاذات عينيك
مخاض ..
هزة جزع الشوق حنين
إتساقط منك خوف
وترني إحساسك جواي
ضميتك علي
إدفقت أهآتك سيل
آه آه آه
بللل صدري
وخلى باقي القول للخيال

الاستاذ الرائع ابدا د. الجنيد
لكم تسافر اليك الاشواق دوما دونما استئذان ولكم يصارعني الحنين الى مرافئ مسمعيك يا ايها المتدفق الق ومتدثر بالحروف والعبارات الجزلة . لك ما يكفيك حد التخمة من فيض اشواقنا التي لا تنتهي ولنا منك يكفي هذا الانتباه يكفينا منك اننا لم نزل جزء من زاكرتك يا ايها الموعود بالمن والسلوى من عصارات القصيد . ولربما لا تصدق اني حاولت مرارا ان ارسل لك على اخر اميل اديتني ليه لكن للاسف كتبته خطأ ووكان خطائ خطأ موجع حد افقدني هبة التواصل معكم ايها المسكنون بالابداع حد الدهشة عرفت بالامس بامر هذا المنتدى وسارعت اجرى اجرجر اوجاعي واشواقي وحنيني الى مرسى والى مورد انتم به علني اشفي ما بي من عطش وجوع واملى فراغات الروح بتعويذة منكم واشرب من محايتكم ولا ضير ان جلدتموني بسياط التواصيل الجميل اوليس المجنون في مسيد الشيخ هاشم يعالج بالجلد والمحايا والتعويذات الكبرى ...
ونتواصل
بالمناسبة هذا النص ايضا منشور في موسوعة الشعر السوداني في ديواني مراسيل
خالص الود
اسماعيل هجانه