محمد عبد الماجد والكونفدرالية

منقول عن قوون

* قبل ايام قليلة قرأت في مجلة )الدوحة( القطرية معلومة غريبة عن شاعر الحب والشباب احمد رامي.

* طبعا الكلام دا ما عندو أي دخل بالكونفدرالية.

* الله يقطع سنين الكونفدرالية.

* نرجع لي رامي.

* احمد رامي شاعر مصري ولد في حي (السيدة زينب) الحي الذي نشأ وترعرع فيه عادل امام.

* وعادل امام من مواليد مدينة المنصورة غير ان اسرته انتقلت الي حي السيدة زينب وهو طفلا.

* برضو الكلام دا ما عندو دخل بالكونفدرالية.

* انت (الكونفدرالية) دي شنو الماسكها لينا دي.

* بنلعب فيها برانا.

* ولد رامي في عام 1892م...وتوفي في 5 يونيو 1981....بعد ان بلغ التسعين.

* الغريب انه مع هذه (الشيخوخة) كان يسمي شاعر (الحب والشباب).

* وما زالت قصائده بالشباب نفسه الذي كانت عليه قبل اكثر من 70 عاما.

* من وفاء احمد رامي انه اصيب باكتئاب شديد عندما رحلت ام كلثوم..ولم يكتب بعدها شيء غير قصيدة شهيرة رثي فيها كوكب الشرق.

* نقول ذلك حتي يكون حديثنا عن رامي مدخل جيد للمعلومة التي توقفت عندها في مجلة الدوحة وكان فيها من (الطرافة) الكثير.

* وقبل ان اعلق علي المعلومة..انقل لكم حرفيا المعلومة كما قرأتها.

* (كان شاعر الشباب أحمد رامي يعشق السهر كثيرا ، وتعّود ان يغادر منزله عند الغروب ولا يعود اليه إلا قبيل شروق الشمس.

* وكان كلما همّ بالانعطاف نحو الحارة التي يسكنها، يرى رأسا صغيرا ملتفا بمنديل ابيض يتخفي خلف مشريبة أحد المنازل.

* وخيّل إليه ان فتاة تنتظره في كل يوم لتراه عائدا مع الفجر، واعتقد أنها عاشقة له.

* أما هو فكان يمر من تحت المشربية خجلا فلا يحاول رفع رأسه أو نظره ليرى من هذه الفتاة.

* وبالتدريج تحركت لواعج العشق في احمد رامي ، وراح ينظم القصائد في محبوبته هذه، وينشر بعضها في الصحف. وذات يوم خرج من منزله في وضح النهار ، وعندما وصل الي منزل (محبوبته) أفلتت منه نظرة الي الاعلي علّه يبادل هذه المحبوبة نظرة الحب، واذا بمفاجأة صاعقه تنزل على رأسه ، فقد اكتشف أن (محبوبته) التي عشقها أياما ما هي إلا جرة فخارية ملفوفة بشاش ابيض كان صاحب المنزل يضعونها في المشريبة ليبترد الماء فيها ، وهي وسيلة معروفة لتبريد الماء في الصيف القائظ).

* يعني رائعة ام كلثوم (يا مسهرني) قيلت في (جرّة فخارية)..اذ ثبت انها هي التي سهرت رامي.

ما خطرش علي بالك يوم تسأل عني

وعنيا مجافيها النوم..النوم يا مسهرني

انا قلبي بيسألني..ايه غير أحواله

ويقولي بقا يعني ..يعني ما خطرش

علي باله

أمال غلاوة حبك فين...وفين حنان قلبه عليا

وفين حلاوة قربك فين...فين الوداد والحنية

يا نسيني وانت علي بالي

وخيالك ما يفارق عيني

ريحني واعطف علي حالي

وارحمني من كتر ظنوني

لا عينيا بهواها النوم

ولا بخطر علي بالك يوم

تسأل عني..

يا مسهرني

أسأل عن اللي يقضي الليل

بين الامل وبين الذكري

يصبر القلب المشغول ويقوله نتقابل بكرا

وبكرا يفوت وبعده يفوت

ولا كلمة ولا مرسال

وهو العمر فيه كم يوم

وانا بعدك علي طال

* انظروا الي ادب هذا الشاعر الذي اعطي ام كلثوم من 110 اغنية...مع ذلك لم يكن احمد رامي يمتلك (جرأة) من ادبه لينظر الي اعلي ليكتشف ان كانت هذا الشيء الذي كان يتوقعه (بنت)..فوجده (جرة).

* المشكلة تكون الـ 110 قصيدة التي كتبها احمد رامي وتغنت بها ام كلثوم كلها في (الجرة).

* يعني ام كلثوم بتغني لي (قلة).

* هسع ناس المريخ بتغزلوا في (الكونفدرالية) زي غزل احمد رامي في (القلة).

* دا انتوا طلعتوا أي كلام.

* عليكم الله هسع الكلام عن (القلة) ما احسن من الكلام عن (الكونفدرالية).

* الما بريدك في (الكونفدرالية) بحدر ليك.

* كونفدرالية شنو يا ابو الشباب.

* بطولة يلعب فيها حرس الحدود والمريخ.

* انتوا المريخ دا ما كان بيلعب معاكم في بطولة الاندية الافريقية للابطال.

* الحصل شنو؟.

* هسع الموضوع بقي ليكم غريب.

* الفرق بينا وبين المريخاب.

* ناس المريخ فرحانين بالكونفدرالية.

* نحن الزعل عاوز يشقنا.

* كونفدرالية شنو البنلعب فيها.

* نحن البطولة دي ح نلعب فيها ونشارك من اجل سبب واحد.

* بس عشان نشيل الكأس حقها ...وما نفرح بيهو.

* عشان تفهموا حاجة.

* ولا بنحتفل بي ذلك.

* انتوا مع وصافتكم دي.

* مفروض ما تفتحوا خشمكم.

* اكتر من (الطابق التاني) ما تقدروا تقولوا حاجة.

* السنة كلها تتكلموا عن التسجيلات.

* مسكتوا (الحضري).

* جبتوه.

* ما قلنا حاجة.

* طلعتوا ليه استثناء.

* ما قلنا حاجة.

* جنستوه.

* ما قلنا حاجة.

* لعبتوه ...وشلتوا بيه كاسات في (جرايدكم).

* برضو ما قلنا حاجة.

* اتاريهو كلامكم كلو طلع (كلام جرايد) ساكت.

* لا شفنا الحضري ولا محمد صبحي.

* تتكلموا ساكت.

* من تشوفوا ليكم زول جاب ليه قون...جري عليه.

* السنة كلها (تفاوضوا).

* وقت التسجيلات تجي ما بنشوف غير (حمد الشجرة).

* حمد الشجرة في التسجيلات طلعتوا لينا ...(ميسي).

* انتوا صدقتوا.

* ونحن صدقنا.

* المريخ سافر معسكر كينيا...اعلام المريخ كلو ...بقي يتكلم عن (حمد الشجرة).

* خلوا وارغو.

* قلنا الزول دا يكون خطير ...اخطر من (الطابق التاني).

* طلع ساكت.

* اكتر حاجة عملها في الموسم دا.

* جاب ليه (كورنر).

* تاني ما عمل حاجة.

* انتوا تعالوا هنا...ناس المريخ..بقوا ما بجيبوا سيرة لي (طمبل).

* ولا كلمة.

* والله يا ناس المريخ ما عندكم عشرة.

* الظاهر كدا ...عاوزين يشطبوا (طمبل).

* (الصنة) دي ما من فراغ.

* يكون فكروا في (شطبو).

* الحمدلله اصابة طمبل طلعت بسيطة.

* يعني بجيكم راجع قبل يوينو.

* كلتشي اخبارو شنو؟.

* نحن يوسف محمد جانا راجع.

* رجع براه.

* شفتوا كيف؟.

* وزولكم انتوا في (انجلترا).

* ما معروف الحاصل عليه شنو؟.

* فريق كلو اصابات.

* تقول واقع ليه من (طيارة).

* عشان تاني تشمتوا في اصابة يوسف محمد.

* انتوا وين (النفطي)؟.

* النفطي ذاتو خلوه.

* قنعوا منو؟.

* زول نزلكم (الكونفدرالية) عاوزين بيه شنو؟.

* المضحك ناس المريخ بقوا يفكروا في (قودوين).

* قودوين دا إلا تجيبوه للطابق التاني.

* كورة تاني ما بيلعبها ليكم.

* لكن احتمال يكون عندو نصيب في دولارات الوالي دي قبل ما يمشي.

* احتمال ...اي حاجة جائزة.

* ألحق (التكية) دي يا قودوين.

* تكية واتفتحت.

* كلتشي بقي يتعالج في انجلترا.

* لاعبو نيجيريا البيلعبوا في الدوري الانجليري..ما بعالجوهم في انجلترا.

* انت يا كلتشي تلعب في الدوري السوداني وتتعالج في انجلترا.

* ملحوظة: كلتشي كان يا ما كان.

هوامش

* الناس في الحلة الي الان بتحدثوا عن (هدف) فييرا.

* هدف فييرا في الاتحاد لو جاء في الاسماعيلي ...كان ناس الاسماعيلية غيروا جنسيتهم.

* المريخاب غلبهم القعاد.

* عاد هو هدف نصاح.

* ناس الجزيرة بعد هدف فييرا قالوا عاوزين يرجعوا ينقلوا الدوري الممتاز تاني.

* بس خايفين من رقصة بلة جابر.

* يا بلة جابر ...خليفة جاب ليه كاس من الامارات ما عمل كدا.

* انت في هدف ...بتعمل كدا ليه؟.

* صاحبكم ما مصدق.

* رجع يلعب تاني.

* وموسي الزومة تاني بقي نجم المباراة.

* هملة.

* وين ناس النفطي؟.

* في يونيو دا ...اعلام المريخ ...ح يفلقنا تاني.

* مرة المرابط ...ومرة منو كدا ما عارف.

* وفي النهاية يكتفوا بي (حمد الشجرة).

* بكرة ان شاءالله نلتقي في (من الغلاف للغلاف).

* خبر عاجل: ناس يعالجوهم في القاهرة وناس في نيوكاسل.

الما بتلحقو جدّعو.
والله الكلام حارقّكم حرقه.
أقعدو لى انتو مع سادومبا ابقدره دا ونحن نكتلكم بالمغسه.
تانى حتقول لى 40 مليون دولار ودى شماعه باليه.
عالم مفلسه وما مقتنعه.....زى ديل يسوو ليهم شنو.
بس طالب منكم تعليق على النفطى ووورغو بعد مباراتنا مع الوهمانين.
والما عارف الوهمانين يسألنى

فييرا.......
فعلا الاسم كبير......لكن اللاعب المكنّى بالاسم وكيانه الذى ينتمى اليه أصغر من ذلك بكتير.
لو فييرا المزعوم وأعوانه يحرزون الأهداف التى تستحق الاحتفالات والأهازيج لماذا يقبرون فى عقر الدار وكمان رايح جاى.
ولا أنسى حين علّق أحدهم عندما قال (دراويش لاقو مدّاح).
قناعتى وقناعتهم شخصيا أنهم لا يستطيعون فعل شئ فى المنافسات الافريقيه لذلك يحاولون تبخيس جهود الاخرين وليس أنا وحدى الذى أشهد على ذلك وانما التاريخ هو الذى يشهد ويقوّى شهاداتنا.
كل ما يكتبه الأهله عن هليّلهم ما هو الا دفاعا عن انتقاد يتوقعونه من غيرهم......تراهم مهزومين رايح جاى وبرضو يتكلمو عن انهم أكبر من الكونفدراليه.......قرّبت تبدأ ما بعيده بس انتو أبقو قدر كلامكم.
يا ناس خليكم منطقيين.

أول من أطلق لقب فييرا على علاء الدين يوسف هو الكاتب المريخي مزمل أبوالقاسم عندما كان علاء الدين يوسف يلعب مع الوصيف، هذه واحدة ، وبعد ذلك قلعناهو منكم مقدرة وحمرة عين ولا أحسن زرقة عين لأن اللاعب كان يعشق الهلال، وحاولتم بكافة السبل يوم ان زورتم توقيعة وبصمته ، وما أدراكما البصمة ..والفهم القاصر لمجلس إدارتكم ، وركضتم وراءه ركض المفجوعين..أما في ما يخص الهزيمة رايح جاي فسبقتمونا أنتم في ذلك يوم خسرتم من الصفاقصي رايح جاي برباعية في "الرد خاسر" وثلاثية في صفاقص ونلتم السبق لأول مرة في تاريخ الكاف يخسر فريق في النهائي على أرضه برباعية.ولكم تحياتي وإن عدتم عدنا ....."

عليكم الله الكورة الما ناااافعة دي ختوها في الواطة دي

والله كنت عاوز ارد لكن الهلالابى ((الحدق))الاشرف ماقصر(((مافهمت يادكتورة يعنى يلعبوا كورة واطةةةةةةةةةةة ولاشنو (غايتو كورة زى دى الا كان يلعبها (سيد البلد)

هي خمسين مليون وليست 40 مليون دولار سرقت بواسطة لصوص الصفوة وعلى رأسهم نائب الرئيس الهارب واللعبة المطبوخة مكشوفة وإلا لماذا لم يتبرأ الصفوة من نائب الرئيس الهارب لولا الطبخة لأن الموجودين مابقدروا يفصلوه وذلك من باب خلوها مستورة أو هكذا قال علي الحاج

أبو مصطفى صباح الخير.
نتفق معك على أصل المبلغ المسروق كما نتفق معك أيضا على الهروب المعيوب ولكن الأصل فى القضيه التى انتم بل انت بالذات متفهمها جيدا أن الذى حدث من الدقير ما هو الا سلوك شخصى ليس للزعيم أىّ علاقه به.....لذلك هذه الماده التى هلكتمونها ما عادت مقنعه لن ولا لكم.
بعدين شوف انت لمن غبت بوظت علينا المنتدى الرياضى ولما رجعت سخّنتو من جديد.....يعنى خماسية مازيمبى وفضيحة الاسماعيليه لسه ماتمت سنتين ولا يجوز الفطام قبل أقل من سنتين.
...............................تأكد أن حبى واحترامى يسبقان تعليقاتى.
.....................................................عشت

نعم الخال فضل .. هي 50 مليون ...ومن المعلوم أن الرجل نائب رئيس نادي المريخ ومن الداعمين للنادي في كافة المجالات من تسجيلات وخلافه ..ولا نستبعد إطلاقاً أن يكون هذا المال المسروق قد تم دعم النادي ولو بجزء منه ؟؟؟؟ الرجل نائب رئيس نادي المريخ ؟؟ أكرر نائب ريئس نادي المريخ ومن الداعمين للنادي ؟؟؟؟؟؟؟؟ وإلابماذا تفسرصمت إدارة المريخ حتى الآن وعدم تعيين شخص في المقعد الشاغر قرابة العام؟؟؟؟؟

لماذا لم يتبرأ المريخ وإدارته من نائب الرئيس ويفصل ببيان يوضح أن المريخ ورئيسه ليست لهم أي صلة بالتصرف الشخصي الذي تصرفه نائب الرئيس لو تفضلت جاوب على هذا السؤال وليس الهروب إل الأمام ولكن يمكن لي أن أتحمل عنك رد السؤال وهو المريخ وإدارته مابيقدروا بل أجبن من أن يفصلوه من الإدارة والمثل المعروف إذا اختلف اللصان ظهر المسروق ولكن إذا اتفق اللصان .. ضاع السودان .. بغلابته ومساكينه