سانجورجتونا محمد عبد الماجد

منقووول
< عندما بدأت التسجيلات...طلع (شريط) جديد لكورال المريخ...شريط جديد اسمو (النفطي).

< والليلة وين لي وين يا عنيا انا..عجبوني كالوا العين...يا عينيا انا.

< النفطي اخطر لاعب...النفطي صانع العاب...النفطي ما في زول متلو.

< وعجبوني الليلة جوا ترسوا البحر رجعوا.

< وكان مع شريط النفطي هذا..تقدم هدية اسمها (هيثم المرابط).

< طبعا المريخاب عندهم عقدة من اسم (هيثم).

< جابوا هيثم الرشيد ...ما نفع..ما خارج معاهم.

< جابوا هيثم طمبل ...المدرب بقي يطلعو من الـ 18.

< مليار وبرة التشكيلة.

< هيثم طمبل دا تقول شغال في مصلحة تلفونات...اثر ما في ليه في (الوصيف).

< مرقوها لي تونس وفتشوا ليهم عن لاعب اسمو (هيثم).

< ان شاء الله يكون لاعب سباق خيل...المهم يكون اسمو (هيثم).

< في تونس قالوا ليهم في لاعب اسمو (هيثم).

< لكن بس فيه عيب واحد. قالوا ليهم عيبوا شنو؟.

< قالوا عيبوا انو (مرابط).

< عشان كدا ناس المريخ ديل قدر ما حاولوا يحركوا (المرابط) دا ما قدرو.

< هو اسمو (مرابط)...يجيكم هنا كيف يا جماعة.

< حكاية هيثم دا ..زي النكتة بتاعة محمد موسي.

< النكتة بتقول في ولد طفل صغير اسمو (هيثم) راح ..وضاع في مناسبة واهلو ما لقوه. المناسبة كلها اتقلبت بحثا عن الولد هيثم.

< الحلة دي وقفت علي فد كراع.

< في واحد كان غريب في المناسبة سمع الناس يفتشوا عن (هيثم) افتكر (الشافع) بستاهل الكواسة دي.

< خالات هيثم وعماتو واقفات يتقالدن في الشارع متل قطر المشترك المكسورة فيه عربية في الخلا.

< الزول الغريب قايل هيثم دا زول يستاهل.

< وقت في جماعة جوا من غادي سايقين (هيثم)...الاضنين متل (الكوريك)..والعين تكوريك للعين يجري بيناتهم الحصان.....الزول الغريب قال ليهم دا (هيثمكم)...انا الزول دا مريت فيه سبع مرات.

< ناس المريخ هسع عندهم عقدة اسمها (هيثم).

< في واحد قال ليهم انتوا عقدتكم دي ما بتتفكا إلا تسجلوا ليكم حارس مرمي اسمو (هيثم).

< انتوا سمعتوا ليكم حارس مرمي اسمو (تامر).

< وإلا شفتوا ليكم (باك) اسمو (قصي).

< ناس الهلال ديل زمان كان عندهم حارس اسمو (هشام الطيب).

< ناس السعودية طوالي لبسوه (حليب السعودية).

< قالوا دي فرصة ...ما في حارس مرمي في الدنيا اسمو (هشام).

< طبعا ممكن واحد منكم يقول لي طيب (هشام السليني) دا كان بطل رواية لاحسان عبدالقدوس.

< في الحالة دي بقول ليكم..يا جماعة اي قاعدة فيها استثناء.

< انتوا درستوا وين؟.

< ارجع ليكم للمريخاب.

< عليكم الله ..بدون غلاط كدا ...في التسجيلات شفتوا (اعلام المريخ) دا كان بيكتب في شنو؟. شفقتونا ساكت.

< حمد الشجرة دا عملوه لينا رونالدينو إلا ربع.

< ديل علاءالدين امبدة عملوا ليه توم وشمار.

< قلنا ما مشكلة...اصلو نحن الحاجات دي متعودين عليها. قام المريخ مشي عسكر في كينيا. شهر كامل الجماعة قاعدين في كينيا.

< طبعا في معسكر كينيا ما في زول كان بشوفهم.

< عشان كدا كانوا بكذبوا ساكت. نحن لمن صدقنا.

< النفطي يسجل هدفا يلخص به كل اهداف كأس العالم 1986.

< ونحن نشيل ونصدق...قلنا يمكن الكلام دا يكون بالجد المرة دي.

< حمد الشجرة يدهش كاربوني. وكاسروكا يبدد مخاوف المريخاب.

< كاسروكا دا عندو عمود براه...يوم خاص.

< وفي تمارين المريخ كنا بنسمع. طارق مختار يعمل العجائب...والعجب يرجع زي زمان. ونحن نشيل ونصدق.

< قلنا يمكن. احتمال ما في حاجة بعيدة.

< الجماعة ديل من كذبهم...محمد كمال ذاتو قالوا اتألق.

< محمد كمال ...البفك الكورة قبل ما يمسكها.

< نحن ما نكذب عليكم...قلنا السنة دي (وصافة) المريخ دي محمدانا.

< خاصة اعداد الهلال كان لم يبدأ بعد.

< ويوسف محمد تعرض لأصابة خطيرة.

< وامولادي رجع. وكلو كوم وعودة امولادي كوم براه.

< نحن امولادي نوديه وين في الظروف دي. المريخاب معنوياتهم ارتفعت.

< بقوا يزيدوا في الكلام. ونحن نشيل ونصدق.

< اتاريهم الجماعة كانوا بكذبوا علينا.

< غايتو المريخ دا لو عسكر اسبوع تاني في كينيا كان جاب كأس العالم. الجماعة ديل من كذبهم ...سجلوا الحضري عديل كدا.

< نسوا حكاية ما في حارس مرمي اجنبي بيلعب في الاندية السودانية.

< ونسوا انو تجنيس الحراس غير مسموح به.

< ونسوا انو الاسماعيلي ذاتو ما بفك الحضري بي اخوي واخوك.

< نسوا الحاجات دي كلها وسجلوا الحضري.

< الايامات مرت والجماعة رجعوا من كينيا.

< قلنا خلاص بختنا ح نشوف المريخ البتكلموا عنو دا.

< اول مباراة مشوا لعبوا في كادوقلي.

< الكورة هناك بعد معسكر كينيا ورحلة اديس ابابا انتهت 4-2.

< قلنا ما مشكلة...يمكن كادقلي يكون فيها (مطر).

< والارضية ذاتها يمكن تكون كعبة.

< الجماعة رجعوا لعبوا مباراة مع الخرطوم انتهت 4-3.

< والمريخ كان مغلوب تلاتة.

< قلنا ما مشكلة...الفاتح النقر بقفل.

< طيب ما يقفل..انتوا ما بتعرفوا تتصرفوا مع (التقفيل) دا.

< قلنا (الارضية) يمكن تكون كعبة.

< قلنا ما ممكن طبعا...لأن المريخ لاعب في استادو.

< قلنا المطر.

< قالوا لينا الخرطوم 4 شهور ما شافت ليها (مطرة).

< قلنا ليهم الاسكندرية لكن كان فيها مطر ..يمكن تكون اثرت في استاد المريخ. بعدين الايامات دي في برد...والمباراة ذاتها ودية.

< قلنا خلاص نحن ح نشوف المريخ قدام سان جورج.

< قعدنا للمباراة ..اول طسة...الشروق ذاتها..طشت.. قطعت.

< مشينا الراديو...جينا راجعين للتلفزيون.

< ساعة كاملة انا بفتش في (النفطي).

< معقولة دا (النفطي)...طيب النفطي فرقو شنو من موسي الزومة؟.

< غايتو عندكم جنس (نفطي) يا مريخاب.

< بخت سامي عبدالله. نفطيكم دا من الاسبوع الرابع بقطع.

< وارغو طبعا ما بخلي عادتو...تقول لاعب في (طين).

< يا وارغو انت ليه بتعمل كدا. معقولة الي الان ما قادر تتأقلم.

< معقولة بس. والله يا حليل العجب.

< المريخ دا لو ما مرقو (الحكم) كان بطلع من دور الـ 64.

< الله شافكم ساكت.وينو النفطي الكنتو بتتكلمو عنو في (كينيا).

< وينو (حمد الشجرة). الشجرة طلعوه من القائمة.

< مفروض مجلس ادارة نادي المريخ يصدر قرار ان اي زول يدخل مباريات المريخ تعصب عيونه.

< يربطوه بعصابة عديل كدا..عشان اعلام المريخ يأخذ راحتو في الكلام.

< عشان تكذبوا بي مزاج. بعدين مفروض تاني ما تنقلوا ليكم كورة في التلفزيون...(ضربات الجزاء) التي لا يحسبوها ضدكم شينة في حقكم.

< مفروض تكتفوا بالراديو. مالكم ومال الفضائح دي.

< فريقكم دا بذكرني بي ولد زمان في الحلة كان الناس بقولوا ليه (بلاتيني).

< بلاتيني دا كان وقت بتشوفو يسخن بتقول خلاص الليلة الزول دا ح يجيب ليه عشرة اقوان. تسخينتو عجيبة.

< واللبس بتاعو اسكتو خلاوه ساكت.

< الشنكار ايطالي ...والشرابات اسبانية ...والجزمة المانية..والفانلة فانلة بلاتيني. تشوف الحاجات دي وهو بسخن..رأسك يضرب.

< زولكم دا وقت الكورة تبدأ ما بتشوف منو اي حاجة.

< كورة ما بهبشها. زولكم (دعاية) ساكت.

< الحاجة البتغيظ...ما لبسو ولا تسخينتو.

< الحاجة البتغيظ اسمو (بلاتيني).

< والله انت بلاتيني يشوفك ...إلا يقطع ليك اضنينك ديل.

< روح بلا بلاتيني معاك.

< ناس المريخ ديل ...سماحة الطابق التاني ساكت.

< سماحة التسخينة..وقت المنافسات تبدأ ما بنشوف ليهم اي حاجة.

< ملحوظة: سانجورتنا ساكت.

هوامش

< جمال الوالي قنع من الكورة...مشي يشوف ليه (دائرة) يترشح فيها.

< ناس مدني بستفيدوا شنو من (طابقك التاني) دا؟.

< مباراة الهلال امام الاهلي مدني تكتسب اهمية كبري.

< يجب ان يستعد الهلال لهذه المباراة استعداد خاص.

< حسنا لعب الهلال امام الميرغني ونتمني ان يوفق ويلعب كذلك مباراة امام اتراكو.

< الاهلي مدني من الاندية القوية وهو صاحب اداء جميل.

< لكن الحمدلله الهلال وصل لمستوي جيد..ومستواه امام الاهلي الخرطوم في المباراة الاخيرة مبشر.

< محمد احمد بشة اثبت انه اضافة كبيرة لوسط الهلال.

< مع تألق فييرا يبقي لا خوف علي الهلال.

< الهلال تجاوز (الخطر) امام جزيرة الفيل.

< فقط نتمني ألا تؤثر الخلافات الادارية في الهلال.

< لكن واضح الان ان سعد العمدة يقود الهلال بتخطيط جيد.

< خبر عاجل: لو دا فريقكم...انتظروا (التسجيلات) القادمة.

نعم اليوم عرفت المريخ فريق عالمي ودولي واقليمي واممي يعني الامم المتحدة والاتحاد الافريق وجامعة الدول العربية عشان كدة كل التابات اليوم وصلت الى معلقات وبحوث عورش عمل من اجل التخصص في المريخ . ...... هيثم اصلا اي واحد اسموا هيثم ماحيلعب في الهلال لان هيثم مصطفى ماعايز اي هيثم في الهلال عمنا فضل الظاهر المريخ السنة بخليكم تكتبوا ليل ونهار وتكملوا كل المفردات الرياضية الاصلن ايلة للانتهاء والاستعانة بمعاجم الزريبة البسيطة والممزقةوطبعا سوف يتم افتتاح زريبة جديدة قرب زريبة العيش تسمى زريبة البهارات حتى يتغير التشجيع الى قحة ودموع الفرح من الشطة المكدسة. شكرا لروحك الرياضية

مفروض تكتفوا بالراديو. مالكم ومال الفضائح دي.


أستروا فضايحكم أوّل.......بعدين جدّعوا بيوت القزاز

كنت داير اتكلم لكن ما قصرتو يا ود النو مع ابو السيد؛ طبعاً المحليين شغلنا بالهم بالتسجيلات الجديدة واصبحو يصيغون اجمل المفردات ؛كدة قولو ليهم خلونا في حالنا امرقو منها انتو الو ؛ تماسيح مساجين وفرتيق بيت من الكو بالله يا عوض السيد ماعارف ليك محل مطارق تجيبا للجماعة دييل ؛هم بالله هسي هيثم الخلا بتاعم دا سوي شنو؟
كدا يا ابو السيد توقعاتك كدة بجي بترأسم منو المحليين دييل في تمساح شاعر كدة شايفو كان بتنبر بقول انا الرئيس القادم ؛هل تتوقع بجي ولا ناس الشرطة بكونو هسي مطاردنو لابد؟

صباح الخير يا ول نويه.
شايف ناس مفوضية الانتخابات اضافوا بطاقه لترشيح رئيس للهليّل.
لكن انا بقترح حتى تنجلى الأمور ممكن يتبع الفقيد لديوان الزكاة..... وعلى مدير الديوان البحث عن بند يمكن به الصرف على مساكين البلد