ضيف الأسبوع

أحبتى أحباب المنتدى أسمحوا لى أن أطل عليكم عبر نافذة ضيف الأسبوع بضيفكم رقم 14 الذى اخترته هذه المره من بيت الكلاوى لقناعتى أنه سيلامس وجدان الجميع بذكاءه وطيب قلبه وسجيته التى جعلت كل من يعرفه يحبه.
ضيفى وضيفكم هو الأخ الحبيب الصديق الدكتور/ الجنيد أحمد سليمان.
الى الحوار:--------------------

1- الاسم رباعى
2- الحاله الاجتماعيه:-
3- المراحل الدراسيه:-
4- الاقامه الحاليه:-
5- العمل:-
6- الاهتمامات:-
7- أرقام للتواصل:-

سؤال مباشر ( 1 )
* كل من عرفك أحبك وأنا أولهم طبعا(ما الذى يجذب الاخرين اليك فى رأيك؟

سؤال مباشر ( 2 )
*وطأت قدماك ابوجبيهه لأول مره فى العام 1987م حيث زرتنى فى ليلة نفس يوم وصولك بصحبة الأخ الصديق اسماعيل منقه بمدرسة ابوجبيهه الشرقيه المتوسطه وأنا كنت أحضّر مع طلابى لمسرح الرحله المتجهه الى العباسيه تقلى.
تراها الان امتدت ووصلت الى 23 سنه.....كيف تقيّم هذه السنوات وأنت أصبحت أحد مواطنى ابوجبيهه وهل كنت تنوى طى كل هذه السنوات بابى جبيهه؟

سؤال مباشر ( 3 )
*انت وجمال حسن ويوسف الحاج وعوض الكريم مغوارى السبب فى تدنى الرياضه بالمدينه بعد عزوفكم عن الدخول لاتحاد الكره. ماذا تقول؟

فى سطور
* شمبات شمال الكبرى:-
*الأجزخانه الحديثه الملاذ الجميل:-
* ما بين ام روابه وابو جبيهه:-

فى الذاكره
* موقف لا ينسى
*شخصيه أو اثنين من البلد
* عايز تقول شنو.....أخد راحتك


رياضه
* أدينا رأيك بصراحه بعد مباراة الديربى اليوم


*عفيتك من السياسه لأنى فاهمك أكثر من نفسك طبعا لأنك حبيبى وعارف لعبك كلو نضيف.


كلمه أخيره

مرحب بضيف الاسبوع نحن في انتظارك يادكتور

مرحب بضيف الاسبوع الرجل الهمام دكتور الجنيد ومنتظرنك علي احر من الجمر

يلا يا دكتور ورينا أبداعاتك

بسم الله..
الأخ عوض السيد: الا ترى انك قد قصمت ظهرى وأنا فى آخر صف المبدعيين الذين يحتاجون تكريمك هذا؟..
اللهم احلل عقدة من لسانى يفقهو قولى,,
1- الأسم رباعى:
ستة احرف اصطفاها القدر ورتبها لتصير قلادتى الأبدية عبر دهاليز الزمان (الجنيد) احمد سليمان أحمد.
2-الحالة الاجتماعية:
متزوج من السيدة الفضلى ماجدة عبد القادر عبد الرحمن الدقى_من عندكم_ وأظنى عملت بنظرية: البلد البتعيشك بلدك..فانصهرت في الحباك وصاهرتها وصار لى ما لأهلها وعلى ما عليهم....لى من الابناء: احمد 14 ..محمد 12 صلاح الدين 9 زينب 7 فاطمة4 ثم احسان اخيرا 3 شهور
3-المراحل الدراسية:
الخلوة:قرية امسريحة بقادى ريفى امروابة حيث الطفولة الاولى..ولولا ان الوالد ارتحل مبكرا الى المدينة كان الواحد زى الوكت دا (فراره فى كتفه وطاقبته مشنقة صقير قيل وعانى الزراعة).
الابتدائى:امروابة الشمالية حيث جئت من الريف مياشرة اليها..شقاوة شديدة واولاد البنادر تعبو معانا فى السنوات الاولى.
المتوسطة:شرق امروابة المتوسطة وكنا اولاد مدينة وكدا وكان بالمدرسة داخلية تضم اولاد الريف..كانت فترة خصبة وبدأت تتكون فيها شخصية الواحد..ولنا قصص جميلة مع اولاد الداخلية: مرة واحد منهم مسك جراده من سور المدرسه وقلبها جاى جاى قال: والله جراد السنة دى سمين سمنة قام واحد زميلنا قال ليه بتعرفو كويس معناتها وجبة رئيسية فى قريتكم..وضحكنا وكانت فى حدود النكتة وخفة الدم ليس الا...
الثانوية:امروابة الثانوية ولهذة قصة حبث كان مفروض يوزعونا خورطقت لكن فى نفس العام تم افتتاح امروابة الثانوية فقرر المسؤلون توزيع كل الناجحين من المنطقة فى المدرسية المحلية الجديدة...يرحمهم الله فقد فوتو علينا فرصة خور طقت وما ادراك ما خورطقت وقتئذ.
4-الاقامة الحالية:
بقعة من جنوب كردفان..خضراء ذات جبهة...يقال لها (الحباك)..(مشتقة من الحب الكثير)...تلك ابوجبيهة.
5-العمل:
اعمل مدير برامج لمنظمة رعاية الطفولة السويدية_مكتب ابوجبيهة.
6-الاهتمامات:
والله كانت كتيرة لكن الظاهر عجزنا...كرة القدم..حيث كنت سكرتيرا لاتحاد كرة القدم ابوجبيهة سبعة سنوات والان مدمن فرجة على كرة القدم خاصة الحيةlive التضامن ابوجبيهة..المريخ..الزمالك..النصر السعودى..برشلونة ثم ملوك السامبا البرازيل.
اهتم بالشعر الى حد ما واستمتع بابداعات الشباب الادبية..ياسرنى ابو اللمين ومصطفى سيد احمد..وعلى ابراهيم اللحو...
اهوى التجوال حول تخوم وارياف ابوجبيهة وبى بعض من شغف للصيد البرى من (جداد وادى) واحيانا غزلان فى الفو ولا باس ببعض من أرانب(تراث من جذورالجوامعة).
7-ارقام التواصل:
نحن نتواصل بالنية مع كل الاحباب ويعلم الله بما نكنه من مودة لكل من عرفناه اخ او اخت او قريب او زميل ولكن التكنلوجيا دعمت النية يارقام للتواصل هى:0912142216 او 0129067865
سنواصل اذا فى العمر بقية

عفوا متبقى من الاجابة على السؤال الثالث حيث الاسترسال انسانى :
التعليم الجامعى:
جامعة الخرطوم..كلية الطب البيطرى...83 الى 1987 ...والظريف ان بعد التخرخ انتظرنا سته شهور ليعيننونا اطباءبيطريين وعندما تأخروا شققنا طريقنا فى العمل الخاص ...وكنت فى صيدلية بيطرية فى امروابة بيجوا الزباين من الصعيد ..قمت سألت واحد :انتو بتجو من وين قال لى من ابو جبيهة ..قلت ليه هناك مافى اجزخانة بيطرية؟ قال لى مافى..ومن ديك عينك ما تشوف الا النور..سك للتصديق ما بين رشاد والابيض حتى تكللت بالنجاح وجيت ابوجبيهة فى 1988..وعييييييييييييييييييييييييييييييك...

شكرا يا دكتور وين الجامعه والجمعيات الادبيه وووووحاجات كتيره

المرحلة الجامعية فى الحلقة القادمة لانو دايرا ليه قعدة

المرحلة الجامعية فى الحلقة الجاية لانها دايرا ليها قعدة...(وام نخيل)لازم نكرمها ببوست براها..

شرفت واللة نعم ...الضيف الخفيف يسلم ويقيف... علا يا دكتور انا ما قايلاك دكتور بيطرى وكدة انا قبل كدة جيتك فى الصيدلية وشلت منك دواء كنت عيانة ...سجم... خشمى... ما يكون دواء ...بس واللة خلانى زى الحصان ...يديك العافية ويخلى ليك عيالك وامهم

شكرا يا دكتور ومنتظرين رايك فى الانشطه الرياضيه فى الحباك ورايك شنو وعاوزين كلام عن النجوم والصن دى وقف مالو

من منا لا يحب ذلك الرجل السمح القادم من دار الريح الحاضر فى كل مجال وكل نشاط.مرحبا باخى الدكتور الجنيد.

سلام اخي د. الجنيد ولا اقول ليك عمو لسببين متزوج عمتي ودفعة عموحسن وصديقه غايتو اختار واحدة من الاثنين
شكرا عوض السيد باستضافة القامة د.الجنيد

بل كان لابوجبيهه الشرف بان تكون احد ابنائها يادكتور الجنيد
من اهنا اعلن عليك الحب بلا هواده

عوض السيد حمد الله على السلامه -جات متاخره عفوا-ذلك كان لانقطاعى فتره ليست بالقليله عن المنتدى

تحية واحتراما

هكذا انتم دائما ايها الاحباب...تخجلون التواضع...ودا الخلانا (نحتل عندكم)...يديكم العافية...كلكم متداخليين و Hypernating)
معليش لم اتداخل الجمعة والسبت لكثرة الاجتماعيات هذه الايام فى المدينة ولسبب آخر جميل...هو
ان
ان اخونا القامة عثمان ود الشاويش بيننا واوفى بوعده..والله ما جاب يو شكره....
المرحلة الجامعيه:
بعد احرازى نسبة 76.1 % تم توزيعى فى كلية الطب البيطرى جامعة الخرطوم..وكان التوزيع عبر اذاعة امدرمان وكانت فرحه عارمه لكل الحى والوالده الله يرحمها اطلقت من الزغاريد الكثير واخوكم اتنفش قرب يطير...والغريبه بعد اليوم داك طوالى شعرت بأنى زول تانى...زول كبير...لازم اتميز بشى..قمت اشتريت علبة برنجى وقررت ان أدخن ولكن والله من اول سيجاره اتخنقت وعشرقت..وغلبنى اجيب الدخان فى شكل كل حلقات..ورميت العلبة للليلة والحمد لله....
فى اول يوم وطأت قدماى جامعة الخرطوم شعرت بالرهبة وانا ارى اشكالا من (البنات والاولاد) ..شئ هدوم سمحات وشى عربات ...واول ما اتخيل لى انه الناس ديل فى القراية ما بنقدر عليهم...لكن الحمد لله بعد التسجيل لقيت ليك اولاد الغبش من كردفان ودار فور والجزيرة يسدو عين الشمس وما مر نص العام الا وذابت كل الفوارق الاكاديمية والطبيقية..وبعد العام الاول فى (السنتر) ارتحلنا الى شمبات وما ادراك ما شمبات حيث الخدرة والنيل...وذكر انى انتخبت سكرتيرا ثقافيا للجمعية البيطرية..وهذا ما اتاح لى التواصل مع شعراء الجامعة آنذال بل تخطاهم الى التعرف بشعراء كبار كنا ندعوهم لاحياء ليالى ثقافية وتلك الحقبة وطدت ما بينى ةالشعر وصرت مولعا به بل و (اتشاعر )احيانا)....خلال سنوات الجامعة ومن اجمل الذكريات الرحلات العلمية الى كوستى ومدنى والابيض حيث قويت علاقتنا بالمهنة وتعرفنا على زملاء بال(فيلد)هم الان ملء السمع والبصر على مستوى الدولة...وذكر منهم الدكتور سلامه محمد آدم من ابناء الابيض وهوالآن مدير عام وزارة الثروة الحيوانية بجنوب كردفان....ثم بالطبع لا انسى زميل وحبيبنا و (نسيبنا) الدكتور حسن الحاج البشير الذى كان علامة فى وزارة الثروة الحيوانيه....(حليل زمنك يا دكتور)....
من ذكريات الجامة التى لا انساها ظرافة الفنان الرقيق زيدان ابراهيم:كان دعيناه فى واحده من ليالينا الثقافية وقدمنا ليه بيبسى قبل الحفل والظاهر ما كان بارد شديد..قام نادانى وقال لى يا دكتور:قزازتى دى عندها حمى........

8-كل من عرفك احبك وانا اولهم طبعا.. ما الذى يجذب الآخرين أليك..؟
عوض السيد..انا احبكم كلكم..سؤال صعب الاجابة عليه ...دا تواضع منك بل الذى جذبى اليكم هو كم الحب وهالته التى احطونى بها منذ ان وطئت قدماى ارضكم الطاهره...

الدكتور الرائع انت والله رائع 00وبالجد امتعتنا بزكريات الجميله ومستحيله(جامعة الخرطوم)وبالله كنت تكتل حفلات زيدان 00هنيئا لكم جو الحباك وابو علياء

مااروع ان تعيش محبا ومحبوبا يا دكتور تتلقي القبول من الناس ومن البشارات ان يكتب الله جل وعلا لاحد القبول من الناس قال صلي الله عليه وسلم تلك عاجل بشري المؤمن.

شكرا يا د. على السياحة الممتعة.

تحياتى

شكرا يادكتور علي هذه السياحة الجميلة ماقصرت تب ياابواحمد(بكائية)لكن زي ماقال غريق ماذكرت فريق الصنداي وطرائفه واين هو الان
ومبروك ليكم عثمان شاويش ابو الحكاوي(ماشي كنغو سوقني بعجلة)

لك التحية د.الجنيد أيها المتفرد الزاهي..حوارك دوزنا بالحيل..تحياتي وسلامي

لكل مقام مقال
وكذا انت ايها الرجال الهمام احببت ابوجبيهة فادمن حبك اهلها وكنت لهم الاخ والصديق وابن البلد وفوق كل هذا وذاك كنت الجنيداحمد سليمان

لكم الشكر ايها وايتها الاحباب..مروركم زاد مساحات الحب لكم فى الحنايا...
يا ول نويه:ألحق..اجبت امس على متبفى الاسئلة وارسلتها ولكنها ما ظهرت حتى الآن..التكنولوجيا مالها..؟؟

اخوتي الاجلاء الاعزاء احباب وأبناء منتدي مدينتي أبوجبيهة لكم مني اطيب التحيات والتقدير ولكم مني العتبي بسبب انقطاعي عنكم طيلة هذه الفترة وان دل هذا فليس علي شيء من التجاهل أو غيره بل كثرة المشغوليات وانتم جميعا تعلمون ماهي ظروف العمل في الغربة وما ادراك ما الغربة ولكن انشاء الله عائدون لكم وللتواصل معكم وضربة البداية أحي أخي صاحب الخلق والأخلاق وكامل التهذيب صاحب الابتسامة الدائمة ورجل التواصل والانسانية ( مش الانسانية بتاعت المطاعم ) الانسانية التانية أخونا دكتور الجنيد وكل الذين يقفون من وراء هذه البوابة العظيمة (أبوجبيهة ) لكم من كل الود والتقدير

الجنيد منور كعادتك

يديكم العافيه ايها الاحباب..دوما سند..
اخى عوض السيد :لقد اجبت على متبقى الاسئلة ولم تظهر حتى الان..لى محاولات مع ول نويه للعلاج...
ول نويه: ارجو مراجعة الخاص..
لكم الود