ماذا قال عبدالهادى الصديق عن الاستاذ الكابلى؟؟؟

عندما ولد عبد الكريم عبد العزيز الكابلي في الثلاثينات وحط كأبتسامة على ثغر بلادنا . . جاء يحمل في عروقه ثراء التنوع الثقافي في بلادنا . . شيء من الشرق . . وشيء من دماء الكنجاره في الغرب . . وشيء من الشمال.
بدأ تفتحه أول مرة عبر مسالك الأناشيد المدرسية وهو لا زال يعزف على آلة الصفارة وأدى تشجيع أستاذه ضرار صالح ضرار إلى نيله جائزة في إلقاء الشعر وهو يلقي رائعة صفي الدين بن الحلي . . (سل الرماح العوالي عن معالينا). وانتقل من المدرسة المتوسطة إلى الثانوية الصغرى بأم درمان وهو يجيد العزف على آلة العود وقد أكمل قراءة طه حسين والمنفلوطى وما إليهم، ولكنه لم يشبع فأخذ يدندن بأشعار المتنبيء. وفي أم درمان دخل ندوة عبد الله حامد الأمين فأنتقى منها عقدا منضدا من عيون الشعر السوداني . . مولد المجذوب وأنشودة تاج السر الحسن لآسيا وافريقيا. وإن تسألني عن مكان الكابلي في حركة الأدب السوداني أجيبك بأن تاريخ الشعر السوداني يحفظ للكابلي تعريفه للمتلقي بروائع كراسة الشعر السوداني. التيجاني . . توفيق . . جماع . . الناصر . . المجذوب . . الفيتوري والآخرين. وعندما بدأ المد الثوري ينتظم حركة التحرر في دول العالم الثالث غنى الكابلي لباندونق وفلسطين وفيتنام والجزائر والقنال . . غنى للومومبا وعبد الناصر وكينياتا وسوكارنو وغاندي وطاغور وجميلة الجزائر . . فأثبت بذلك بأن تاريخ الغناء السوداني ظل يرتبط بأحداث هامة في تاريخ العالم.
الكابلي يحبه أهل السودان لأنه عاد بهم غائصا في عمق التراث الشعبي والقومي . . تراث بنونة وشغبة وبت مسيمس ولم يقدم ذلك مغنيا وكفى بل قدم المحاضرة تلو المحاضرة والندوة تلو الأخرى في دور الثقافة والمنتديات محليا وعربيا وأجنبيا.
إن مكان الكابلي في حركة الثقافة السودانية كبير ومتسع كاتبا ومؤلفا موسيقيا ومغنيا ووطنيا محبا لبلاده كما أحبها خليل فرح وهو يصدح كما الكابلي من بعده . . (يابلادي كم فيك حاذق . . غير إلاهك ما أم رازق).

لك التحية و التقدير أختى سهاد.

الفنان الكابلى اضافة مهولة للثقافة السودانية كونه يوثق للتراث

عبر الفن.نال درجة الدكتوراة الفخرية و هو يستحقها اكاديميا كونه

باحث فى التراث السودانى و شاعر لا يشق له غبار.

له من الدراسات و البحوث و كم هائل من الكتب فى هذا الخصوص.

شكرا سهاد على تناول هذه المادة القوية.

تحياتى

القومة ليك يا وطنى ..يا بلدالسماحات...من علايل البروف ...فى عز الليل ...ليلة المولد ...حسنك ...كسلا...اكاد لا اصدق...الشيخ سيرو...اللؤلؤة...اكاد لا اصدق ...عيدبلادى..و...و...و القومة ليك ياكابلى ...ولو كنت ...لاخترتك وزير الثقافة لانك تستحقها...مشكور عزيزى فيصل على الاضافة والمرور الفخرى

Suhad Abduelgfaar كتب:عندما ولد عبد الكريم عبد العزيز الكابلي في الثلاثينات وحط كأبتسامة على ثغر بلادنا . . جاء يحمل في عروقه ثراء التنوع الثقافي في بلادنا . . شيء من الشرق . . وشيء من دماء الكنجاره في الغرب . . وشيء من الشمال.
بدأ تفتحه أول مرة عبر مسالك الأناشيد المدرسية وهو لا زال يعزف على آلة الصفارة وأدى تشجيع أستاذه ضرار صالح ضرار إلى نيله جائزة في إلقاء الشعر وهو يلقي رائعة صفي الدين بن الحلي . . (سل الرماح العوالي عن معالينا). وانتقل من المدرسة المتوسطة إلى الثانوية الصغرى بأم درمان وهو يجيد العزف على آلة العود وقد أكمل قراءة طه حسين والمنفلوطى وما إليهم، ولكنه لم يشبع فأخذ يدندن بأشعار المتنبيء. وفي أم درمان دخل ندوة عبد الله حامد الأمين فأنتقى منها عقدا منضدا من عيون الشعر السوداني . . مولد المجذوب وأنشودة تاج السر الحسن لآسيا وافريقيا. وإن تسألني عن مكان الكابلي في حركة الأدب السوداني أجيبك بأن تاريخ الشعر السوداني يحفظ للكابلي تعريفه للمتلقي بروائع كراسة الشعر السوداني. التيجاني . . توفيق . . جماع . . الناصر . . المجذوب . . الفيتوري والآخرين. وعندما بدأ المد الثوري ينتظم حركة التحرر في دول العالم الثالث غنى الكابلي لباندونق وفلسطين وفيتنام والجزائر والقنال . . غنى للومومبا وعبد الناصر وكينياتا وسوكارنو وغاندي وطاغور وجميلة الجزائر . . فأثبت بذلك بأن تاريخ الغناء السوداني ظل يرتبط بأحداث هامة في تاريخ العالم.
الكابلي يحبه أهل السودان لأنه عاد بهم غائصا في عمق التراث الشعبي والقومي . . تراث بنونة وشغبة وبت مسيمس ولم يقدم ذلك مغنيا وكفى بل قدم المحاضرة تلو المحاضرة والندوة تلو الأخرى في دور الثقافة والمنتديات محليا وعربيا وأجنبيا.
إن مكان الكابلي في حركة الثقافة السودانية كبير ومتسع كاتبا ومؤلفا موسيقيا ومغنيا ووطنيا محبا لبلاده كما أحبها خليل فرح وهو يصدح كما الكابلي من بعده . . (يابلادي كم فيك حاذق . . غير إلاهك ما أم رازق).

شكراً سهاد على الإضاءة الرائعة لقامة من قامات بلادي الفنية وإليك النص الذي تغنى به الكابلي دعماً لحركات التحرر في ذلك الوقت والذي صاغه شعراً تاج السر الحسن

أنشودة آسيا وأفريقيا – تاج السرالحسن

عندما أعزف يا قلبي الأناشيد القديمة
ويطل الفجر في قلبي على أجنح غيمة
سأغني آخر المقطع للأرض الحميمة
للظلال الزرق في غابات كينيا والملايو
لرفاقي في البلاد الآسيوية ..
للملايو ولباندونق الفتية
لليالي الفرح الخضراء في الصين الجديدة
***********
يا صحابي صانعي المجد لشعبي
يا شموعا ضوءها الأخضر قلبي
وأنا في قلب إفريقيا فدائــي
يا صحابي وعلى وهران يمشي أصدقائي
والقنال الحر يجري في دمـــائي
وعلى باندونق تمتد سمــــــــائي
يا رفاقي فأنا ما زرت يوماً اندونيسيا
أرض سوكارنو ولا شاهدت روسيا
غير اني والسنا في أرض إفريقيا الجديدة
والدجى يشرب من ضوء النجيمات البعيدة
قد رأيت الناس في قلب الملايو
مثلما أمتد كضوء الفجر يوماً..
مصر يا أخت بلادي ياشقيقة
يا رياضا عذبة النبت وريقة
مصر يا أم جمال .. أم صابر
ملء روحي أنت يا أخت بلادي
سوف نجتث من الوادي الاعـادي
فلقد مدت لنا الأيدي الصديقــــة
وجه غاندي وصدى الهند العميقة
صوت طاغور المغني
بجناحين من الشعر على روضة لحن
يادمشق كلنا في الفجر والآمال شرق
*********
أنت يا غابات كينيا يا أزاهر
يا نجوما سمقت مثل المنائر
يا جزائر .. هاهنا يختلط القوس الموشى
ها هنا من كل دار .... كل ممشى
نتلاقى كالرياح الآسيوية.. كأناشيد الجيوش المغربية
أغني لرفاقي في البلاد الآسيوية
للملايو ولباندونق الفتيـــــــة

لمازا...الجندول ...كل الجمال...حليل موسى ...سعاد...اغلى من نفسى ...شمعةو...و...كابلى لو قالو ليك اوصف جمالك تفتكر تقدر تقول كل الحقيقة؟؟؟مشكور اخى ودنوية على اضافة السيرة العطرة للاستاز وبتمنى ان يجد منا مثل ما قدم لنا....عزيزى ودالبشرى لك الشكر اجزلة على نص القصيدة التى اثبتت حبة لتنوع الثقافى ودعم حركات التحرر فى العالم ....يا صحابى صانعى المجد لشعبى......

هل هو صديق مدثر ام الحسين الحسن يا عالم؟

عموما مهداة الى الاخت سهاد و الاخ الفاتح محمد توم نجوم فى سماء المنتدى.

تحياتى

ضنين الوعد

**********
يا ضنين الوعد
أهديتك حبي
من فؤاد يحمل الحب
إن يكن حسنك مجهول المدى
فخيال الشعر يرتاد الثريا
كلما أخفيته بالقلب
تنبيء عنه عيناك ولا يخفى علي
أنا أن شئت فمن أعماق قلبي
أرسل الألحان شلالاً روياً
وأبث الليل أسرار الهوى
وأصوغ الصبح ذوباً شاعرياً
لا تقل أني بعيد في الثرى
فخيال الشعر يرتاد الثريا
يا ضنين الوعد
كان بالأمس لقاءنا عابراً
كان وهماً ... كان رمزاً عبقرياً
كان لولا أني أبصرته
وتبينت ارتعاشاً في يدي
بعض احلامي التي أنسجها
في خيالي واناجيها ملياً
ومضة عشت على إشراقها
وانقضت عجلى
وما اصغت إلي
كلمة خبأتها في خافقي
وترفقت بها براً حفياً
من دمي غذيتها
حتى غدت ذات جرس
يأسر الأذن شجياً
وافترقنا وبعيني المنى
قالها الدمع فما أبصرت شيئاً
إن تكن أنت جميلاً
فأنا شاعر يستنطق الصخر العصي
إنت تكن أنت بعيداً عن يدي
فخيالي يدرك النائي القصي

والله يا جماعة اعفو لى لانى ( كجيت ليكم لابوالزهور )

قصدت من ضنين الوعد ان استدرج ازهرى لعلمى بالعلاقة التى تربطة بالشاعر

صديق مدثر و قابلتة معه بالرياض.

ابوالزهور يلا جيب الباقى و اعفى لى ياخ.

تحياتى

الله يخت محنك .....

سأكتب لكم اليوم عن مريم الأخرى للراحل الحبيب مصطفى ... وكيف عندما تحصلت عليها
كانت ناقصة وماذا فعل بها الأستاذ صديق وما تعليق الراحل أبو سامر مصطفى .. نخلة السلفاب

الله الله...على الحسن البديع
يا سهاد ..شكرا..
كل قامات المنتدى هنا....جذبهم العملاق كابلى...الفنان الشامل..ليس مغنيا فحسب ولكنه معلما للاجيال....
فيصل : شركك والله حبيناه لانه قبض صيده سمينه واستدراجك جميل والليله حنشوف البدع....
يحكى ان احد الرؤساء المصريين عنف شعبه وهم يضربون بسبب البطاطا وارتفاع سعرها فقال لهم:
تبا لكم...تصيحون :البطاطا البطاطا...يا عينى ع البطاطا..,والاخوة فى جنوب الوادى يغنون رائعة العقاد:
شذى زهر ولا زهر
فأين الظل والنهر..؟
ربيع رياضنا ولى
فمن اعطافك النشر
وبى سكر تملكنى
وأعجب كيف بى سكر..؟
رددت الكأس عن شفتى
لعل جملك الخمر
فرق يا جماعة...والله فرق...وأكيد الرئيس المصرى سمعها من المبدع كابلى....
سكر...سكر...سكر...واكتر

واللة يافيصل يا اخوى كجامتك قوية جابت لينا استازنا العزيز ازهرى يدية العافية.. وكلنا منتظرين قصاصاتك وكل المدسوس يا استازى والتحية الى الاستاز القامة صديق مدثر ....سلام يا اخى الفاتح وسلام لامن نلم يا خلة فى الحلى الحنينى خلاص...ومنظرين مريم الاخرى

عزيزى الدكتور تسلم و يسلمو كل قامات المنتدى و يسلم الكابلى ومنتظرين المزيد ..

عووووووووووووررررررررررررووووووووووووووررررررررررررررررك.

الحقنى يا الفاتح محمد توم البوست سخن سخانة ما يعلم بيها الا الله.

يا جماعة والله السودان دا واقع عليه ظلم الحسن و الحسين.

تحياتى

فيصل انا عارف حادينا الذاكر المستنير ... ذاخر بكل المناقب " ديل زاتهم ماأولاد الحسن والحسين

الاخت سهاد لك التحية والتقدير وفتحت بوست رائع عن الفنان الكبير كابلي فهو فنان وباحث في التراث السوداني الجميل انا من المعجبين جدا باغانيه ولكني اجدني اطرب كثيرا عندما يتنغي الكابلي باغاني السيرة او اغاني الحماس
الحسن صاقعة النجم البحمي الشهادة والنضم
كل ليلة من السيف مابهم
ماهو الفافنوس ما هو الغليد البوص ود المك عريس خيله بجن عركوس ياكا علي اب سيفا بحد الروس
ومتين يا علي تكبر تشيل حملي
ياكا علي الخلاك ابوي دخري
مادايرالك الميتة ام رمادا شح
دايراك يوم لقا وبدميك تتوشح
الميت مسولب والعجاج يكتح
وتجلي في قصيدة يزيد بن معاوية
وامطرت لؤلؤا من نرجس وسقت وردا
وعضدت على العناب بالبرد
وغني فضة ولها قصة لا اذكرها يرويهاابوالزهور
اغلي من لؤلؤة بضة صيدت من شط البحرين
لحن يروي مصرع فضة ذات العينين الطيبتين
لم تبلغ سن العشرين واختارت جيش التحرير
والكثير الكثر من القصائد بالفصحي .





وغني ود المك عريس خيل

(يا ابو أومر النادر)....فيصل..تبكى بس....(البشرك للأسد لابد يضوق كجماته)....
ابو الزهور: اضفيت على الموضوع ألقا وتاريخا (عبقريا) بحديثك عن العقاد..ابو العبقريات وابو الرائعة(ساره)...هذا العبقرى فيه جزءمن جنوب الوادى..الا ترى انه احب معاوية نور من اول لقاء به وتنبأ له بالمستقبل..ومنح الكابلى شذى الزهر...وأسمه الاول يشيهنا ..محمود العقاد...هات ما عندك من تاريخه يا ابو الزهور....
فلس وطيلة عشرتى معه ما قال لى جدى اسمه (الجنيد) يا ابو الزهور...هذا الرجل يحسدنى على الانتماء لاسرة الابداع...ما تشغله الا تشاورنى...
لكم الود

أبشر يا جدّي الجنيد الرازقي

لك منى الشكر اخى الحيدر ولك منى اهداء من ارض الضباب كل اغانى الحماس والسيرة التى تغنى بها استازنا العظيم..و ...و النصيحة دى البريد الشيخ انا يا ناس بريدها الشيخ سيرو ...

أوبريت سودانية ...
تأليف : الشريف زين العابدين الهن

ألحان و اداء : عبدالكريم الكابلى.


أنشودة الهجرة والإغتراب ؛ أغنية حب وتصد وعرفان .. فداء الذين خرجوا من أجل أوطانهم ، فالتصــقت بأرواحهم
ووجدانهم ، وظلت تتفتح صورا يعيشــونها بأعماقهم ؛ ترطب لهم هجير الغربة ؛ وتحدولهم ركب العودة الحثيث . إنها
ليسـت من تأليف أحد ، إنما هي مشاعر قوم وموال أمة ؛ إنها ليست غناء ، إنما هي عزف هادئ رزين على أوتار
الحقيقة ؛ إنها ليست ذكريات ، إنما هي دفق حي لواقع ملموس معاش مستمر؛ إنها ليست رثاء ، إنما هي ملحمة
الحماس اللاهب .. لانطلاق الشباب المغزى بحكمة الشيوخ ؛ إنها عروة وثقى تشد أهلها برباط محكم متين .. فلا يسقطون في المحن ، وإنما يحطمونها ؛ ولايتراجعون للعقبات ، وإنما يتجاوزونها ؛ ولايضعفون للصعاب ، وإنما
يطوعونها .. إنهم جيل ضــرب له موعد ثان مع القدر ؛ وتعين له لقاء جــديد مع التاريخ والحرية .. إنهم جيل البطولات ،
وجيل التضحيات ، وجيل الفداء .
إنها من تأليفهم جميعا ؛ بعزف موقع من ســيمفونية الخلود ، مع أوركسترا الحق والصدق ، في مهرجان الشروق
الجديد ، بعد ليلهم الطويل الوبيل ...


.................................................. ........


مساهر؛ مساهرليلك الطول نجوم وهجوع ..
وغرقان قمره في جو السحاب مصروع ..
بصارع فيك ضلام تمن سنين واسبوع ..
واراقب فجرك الآذن زمانه سطوع ..
وشايلك سيف نصر لا يطيش ولاهوبزوغ..
ورابطك في حشاي من العطش والجوع ..
واســـقيك مــني دم ... ودمـــوع ..
واوقــــدلك جحـــيم وشــــموع .
واقش منك دموع الضيم على خدودك بتتحدر ..
واقبل فيك جبين مرفوع .. كراية النصر .
وبيرق عزة رفرف في ركاب فاتحين ..
واغسل ليك تراب الهجرة باليدين ..
ويجيك المجد مدخورلك سنين وسنين ..
من حبوبتك الوقفت ترد الدين ..
وتطرد حملة الباشا .. ومع الغازين ..
حليلة مهيرة كاسرة التوب وحد الزين .
ومن جدك بكبر فوق جبل سرخام..
ودافن ضهره في كرري ومتكنتر ركاب ولجام ..
وسال في إيده سيف العود ببعج بيهو كبدة وهام ..
وقبال دمعه مايرشح مع البارود ، يكون شتت عليك اجسام .
أجسام من غزاة ما قدروا يسبوك ..
ولاكشفولك المقنع ، ولافي الشينة ختوك ..
ولاخلولك أحداقم ، ولاهم قدروا يدنوك ..
ومما فاتوا لي هسع .. بدوروا رضاك واطروك .
وكيف إنساك ؟ وكيف إنساك وذكراك لي دماهو عروق ..
ومما الهجرة حلت ليهو، لابسك إنت عمة وطوق ..
وعايشك جو وجدانه ، معايشة الحنين للشوق ..
وممزوج فيك .. ممازجة اللسان للضوق .
بشوفك في عيون النيل ، وفي الأطفال ..
وفي تاريخك الأخضر، على الأجيال ..
وفي بحر الدمي ، اللسع بجم سيال ..
وفي مستقبلا ، واعد كبار وعيال ..
بشوفك بشرى فيك ، شقق جبال ورمال ..
وفي حدقاته مفتوحات ، تلاتة ليال ..
بترسم لي طريق نجم العشاء الولوال..
وتكشف فيك ، أسرارا كتار واهوال ..
ويلقاك ؛ ويلقاك حتى في رمش الغريب الضال ..
مهموم في اليمن ، لا الحامدي لا السلال ..
ويلاقيك في الخليج ، مشرورة حالك حال ..
ويسكّل فيك .. ببيعوك بالدهب والمال !
فلذاتك مبعثرة في البلاد مأجورة ..
تبني على الرمال أحلامها ثم قصورها ..
خلوك سايبة في أيد الطغاة مأسورة ..
شان ما يسلموك الحلبي ، روب في كورة ؟
أبشري ؛ أبشري نحن لسع في الخلا مرابطين ..
ونحن عقاب عهود ، أنصار مع مهاجرين ..
ونحن سهارى ما بنعرف غمضة العين ..
ونحن فداك ، نذود عنك بقالنا سنين ..
حالفين بيك قسم ، غالي وعزيز ويمين ..
مانضوق راحة ، لانشوف زوجة لا والدين ..
ولاندفن رؤوسنا على الرمال خايفين ..
حتى نودي من أشلانا ، أعلامك على القصرين ..
وحتى نسوي للقصفوك مقبرتين ..
زي ماصنع تارا ، علي الألف ألفين ..
وحتى نكسر السد ، وينقسم نصين ..
ويكون عيدنا الكبيـــر، في مقرن النيلين .
وما بنساك ؛ وما بنساك عشان يطراك في الأزمان ..
قريـــــــب منك ، قرابة الحدقة للإنسان ..
وجايل فيك ، جولة الدم علي الوردان ..
وقيمتك عنده ، زي قيمتك معاه زمان ..
بعيشك هضبة ، بتشارف تلال قيسان ..
ويحياك موية في دارفور، تبل عطشان ..
ويديّم فيك من سنار، ترع خزان ..
ويدفق خيره بي عند الرهد بستان ..
ويقول للدندر الغاضب ، كفاك قيسان ..
ويسهر لي وليداتك ، يعشي الحاري والجيعان ..
منو الزيك ، منو الزيك ولد واستالد الأولاد ؟
منو الزيك ، بجيبم ديمة عشرة اولاد ؟
منو الزيك ، ببز الدنيا موية وزاد ؟
منو الزيك ، ضروع وزروع ونيل مداد ؟
منو الزيك ، بطانة وغابة دون حداد ؟
منو الزيك ، سهول وادي وجبال اوتاد ؟
منو الزيك ، أصل موروث من الأجداد ؟
منو الزيك ، جراتق دم .. قدام وجداد ؟
قشي الدمعة يابت الرجال ، ما بحكموك أولاد .
بت الحر .. وأم الحر .. وأخت الحر ..
وست الضنبه مردوم .. بي وراه يجر ..
ست الفي الخشش من العصير بنتر ..
وست الخيل ، وست الفي القلوب بنقر ..
وأم الحلفوا بيك ، وبي العذاب المر ..
ما بختولك الشينه ومناحة كر ..
أولادك ؛ أولادك فضلة الموت وبتلجوبو ..
ودايما سيرته في لسانم ، وبتسلوبو ..
وزرعك من زمان المهدي ، طارح دوبو ..
واحدين بحصدو ، وواحدين بفكو دروبو ..
تيلادك مسكّر في الخزن محروس ..
هجليج واندراب ، ومهوقني وأبنوس ..
من صمغ الهشاب ، سوّى السنط كرتوس ..
ومن شجرالتبلدي ، المويه كوس في كوس..
ومن ضل النخيل ، الشمش دايرة تكوس ..
ومن حرب المطر، فرع الحراز مدروس ..
ومن شوك السدر، جيش السلم هكسوس ..
ومن زهرالتبر، البادية باقية عروس ..
وبي توب البرم ، سوى الطلح ملبوس..
ومن شدرالأراك ، عطر الدعاش مبثوث ..
ومن سيف العشر، جيش هكس صار مهروس ..
والدوم واجي ، بي قيف الأتبراوي خروس..
فيكي الفيل ، وفيكي العنجة والجاموس ..
وفيكي التيتل ، الليّات قرونه تروس ..
وفيكي الأصلة ، والدّابي اب درق وجروس ..
وفيك أسد العرين ، رب العراك والدوس ..
وفيك ريل الودي ، البي نالو راتع إجوس ..
وفيك فهود ، وفيك نمور، وفيك طاؤوس ..
وفيك صقر الكواهلة ، العينو كالفانوس ..
وفي نيلك عشاري ، إشيل من الجاقوس.
فيك الأزرق ، البي عرقو هد القيف ..
وفيك الأبيض ، الماش منطرح ما بقيف ..
وفيك رهد المفازة ، الوعده ما خلّيف ..
وفيك الأتبراوي ، اللي الشواطي أليف ..
وفيك الدندر، البهجم هجمة السيف ..
وفيك الباسلام ، الفي الفشقة عامل هيف ..
وفيك سيتيت ، منبّت من قناه صريف ..
وفيك القاش .. بوري الرعدة والصاقعة الدوادم كيف.
وفيك بحرالجبل ، حاقب عرى الرجاف ..
وفيك بحر غزال ، والجور وبحر زراف ..
وفيك سوباط ، ملولو زي دبيباً خاف ..
وفيك بحرالعرب ، مليان نعام وزراف ..
وفيك بحيرة قال نو، سيدها ماالأسلاف ..
وفيك خور أب حبل ، شاقي البلد كشاف ..
وفيك تمت العظيم ، شايل الكليت والشاف ..
وعندك مقرنا .. حرّم سواك ما إنشاف .
وعندك ألف خورفي الوادي ، والفين رافد ..
وحسبان الجزاير والجروف ، ما وارد ..
والنبروالحبيب ، لي عودو سيدو يقالد ..
والساقية الحنين توريقها ، باكي وساهد ..
والبلدات .. ونجاضات حليلة فايد ..
وسمسم ، وام صقور، وسهل قبوب ود زايد ..
وصقيعة ام بليل ، براقها قايم وقاعد ..
والمطرالبكب ، أربع شهور ودارد ..
وفيك قدمبلية ، وكمبو ستة الوارد ..
وأم سينات ، تغازل دوكة ماشه تحادد ..
الكفاي بقول للفشقة ، بهمك شارد ..
كونوالفاو بقت .. ترع ، وجناين ، وموارد .
في غروبك ؛ ربوع خصبة وتبرمبهول ..
وديان من عقيق ، مغسولة مطروسيول ..
وكثبان تابة ، بطرزحواشي سهول ..
تجود بالكركدي ، وصمغ الهشاب والفول ..
وتدى القنقليس ، طول الشهوروالحول ..
وفيك حفرة نحاس ، وأبوتولو غير مصقول ..
والعيش ، والسماسم ، والصمغ ، والكول ..
والتور ، والخروف .. والناقة ، والكاتول ..
علي دينار، كسب ليها الشرف والطول ..
أبو زكريا أداب العصاة ، زول زول ..
من وداي مكربت في ربوعها وجول ..
لي الكفرة وصحاريها العجاف والفول .
وجبل مرة الشمخ جايب مناخ لبنان ..
فجر من ينابيعه العجاف بستان ..
طارح عنب والزيتون مع الرمان ..
وجاب من يافا تفاحا كبار ومكان .
من مليط مكربت شاقي دار الريح ..
نازل بارا وام فتنه بتسر وتريح ..
وتياسرعلى التياره ، وصوتها بيصيح ..
ونوخ تقلي ، في السهل الكبير وفسيح .
ومن تقلي ، امبرم شايل جبال النوبه ..
عامــــر قلبه ، بي برشم عريس الحوبه ..
جلجال واللحيمرالنارم إدفوبها ..
وين مجدوب وشامبي ، الحارة بتسلوبها ..
وفي شروقك ؛ في شروقك ربا العنافي قاطع تيهو ..
وفي ضهرو الدوم ، دوباي حرارتووتيهو ..
وفي الشبرية ، راكبة حمامة بتغنيهو ..
مسدارابشوارب .. ياخدو ووديهو .
أمانة عليك بطانة أب سن ، بتنسي الكاعه ..
يوم أكلت كباد ســـــاكت ، رخم وضباعه ..
يوم محمود وناس عوض الكريم سمساعه ..
واقفين في الشمش دايرين يغطوا شعاعها ..
في ضحوة عجاج وسيوفم اللماعه ..
ياكلن في التراقي .. ويقطعن في ضراعه .
يا المعزوزة بي دمانا وعضام ابواتنا ..
عارفنك مقريفة لي شراب قهواتنا ..
زغرتي يا ام شيوم ، خلي الندق نحساتنا ..
ونحاسب عقاب الجاتنا والماجاتنا .
هسع قومي ، سوي السيرة جري النم ..
خلينا النهشك فيك ونملاك دم ..
ندفنلك شقوقك ، شورعضام ولحم ..
ندفق ليك نحيراً لا وقف لا جم ..
نشبع فيك صقور، وضباع ، وطير، ورخم ..
لامن ترضي ضيفك .. ودورهناك انتم .
كيفن عاد ؛ كيفن عاد بتــــعادينا ..
وشوفي عزيمة للحمل ، الوقف راجينا ..
شوفينا بنتر، ولا بنكف الشينه ..
شوفينا بندكدك ، ولا ما هامينا ..
شوفينا بنبشر فيك ، طوال إيدينا ..
ولا نغطي بالطين والعجين إضنينا.
وفي شروقك ؛ في شروقك ، أرض مليانة خير ومعادن ..
وفيها السارح الناشق وفيها الساكن ..
وفيها المن حلايب جايي غاشي سواكن ..
وفيها الأركويت نسام أراك وجناين ..
وفيها غزال جبيت وقل قصاد الشادن ..
ومن صمت إنطرح لي أربعات .. بعاين .
وناس أوشيك إخنقو في الربابة وغنو ..
وأوهاج سل شوتالو وبركلو يسنو ..
تمباك الدمك جو الكدوس حاشنو ..
جبنات يابنات ، هريوا .. قامن وجنو.
دبايوا؛ دبايوا أوجات كيها يا أدروب ، أبوك كيفنو ..
روح تندلاي ، ولا الصهب فاتنو..
قالوا الليله هبباي بركة زايد جنو ..
ناس باكاش وحامد .. في أروما استنو.
الكور دلو والمربيت بتمشي الوادي ..
خت الدرقة والهاري السنين بي غادي ..
وادني اللي انقلب قرب علينا ينادي ..
والهوشاب برد .. بروي الغليل لي الصادي .
وفي شمالك ؛ في شمالك نخيل بازخ ، يداعب الريح ..
بقول للبركل الشامخ كفاك تبريح ..
إت عارف كلامي ورايي بالتلميح ..
جيب رايا قديــــم ، بيهو بتفيد وتريح ..
قش دمع السواقي البي العذاب بتبيح ..
واطرى العضام .. تحتك تنين وتصيح .
أطرى السناجك ووقعة الخشخان ..
واطرى النحاس وكتين إزم بطران ..
ونادي أولاد جعل والينم ينم القرمان ..
والخيل عركسن واتروقن ريقان ..
وصقر الجو بحلق في السماء جيعان ..
يا الكدك بدور.. كبدة ، وكلى ، ومصران.
نادي المك نمر؛ نادي المك نمر، معلم أباة الضيم ..
شاي الباشا شي ، خلاي جناهو يتيم ..
ودفتردار بدك عند المتمة زميم ..
أرفع صوت ، لعل الناسي يبقى فهيم ..
أرفع صوت خلاص ، شرطنا شرب الهيم ..
وكاد عاقلنا يصبح .. من سكاته بهيم .
مر بالدامر البي ذكرو عز وجل ..
واتنوخ فســيح ، وادي المجاذيب طلة ..
شوف النارمتلعبه في المساجد ، ولا ..
مات نورالضيا ، وجات بعده نارالجلة ..
شوف المصحف ، الأربع قرون بدله ..
ماسك وردو.. أم سحرتو عين خلق الله .
حبابك عشرة يا بت مقرن النيلين ..
حبابك ياأم عجن ، بعد العديل والزين ..
حبابك يا المحكرة في المشاعر، والفؤاد ، والعين ..
حبابك يا المغسلة ، بي طهور مويتين ..
حباب أهلك بلاعبوا الموج ، مع البردين ..
حبابن كتفوا بوطليح ، علي اللضنين ..
حباب قصرك ضبح غردون من اللضنين ..
حباب الخندق .. العجن الجلود بالطين .
حباب المهدي فيك ، كبر حرارة ودين ..
حباب أسد العرين ، عبد الله ود تورشين ..
حباب النور، عقيد الخيل ، عقود الشين ..
عنقرة المعزة .. الأصلو مابتلين .
حباب الزاكي أداب النقز في الحين ..
حباب ود النجومي القبرو في توشكين ..
حباب عثمان سواكن دقنه في الدورين ..
حباب يعقوب ؛ حباب يعقوب ، حباب محمود ، وشيخ الدين ..
سلام يا البقعة ، مبروكة الإله والدين ..
حباب الحرروك ، لا إنتماء لادين ..
حباب السودنوك ، خلوك سماره وزين ..
حباب الأزهري ، النكس ذرى العلمين ..
حباب الراية ، هفهافه وتكيل العين ..
قولوا معاي تبارك ، أقول دقر ياعين ..
وزغرتي ياام رشوم ، وقولي البطان وين وين ..
بركزلما سيطانم تبيد وتلين ..
ولما يشوفوا قطع إيدي بالسكين ..
ولما تقول حمامة ، كفاك .. دقرياعين .
سلام ياالقلعة بي بدورها وجواهر تاجها..
سلام يااب عنجه خورك لاقى نيلو الناجا ..
سلام يااب روف وودنوباوي ضوى سراجها..
سلام ديم أب سعد نارالخيم وجاجه ..
سلام - الله أكبر- في الفتح دجاجه ..
بسيوفها ورماحها ، ولي الحمد سجاجه ..
بحرأبيض فتح أبوابه وقت الحاجه ..
زي ما موسي عد .. بلا تعب لا حاجه .
كلـــــك أدباء من عشاق وفنانين ..
شالوك في عيونم وصوروك تلوين ..
وشاشوبك شعر مطبوع جزيل ورصين ..
فيه أم در.. وفيه الأسكلة وستين .
وعازة الفي هواك ، نحن الجبال ثابتين ..
يا فلق الصباح ، قول لي نهارك وين ..
ترعاك في الفؤاد ، بعناية الحارسين ..
يا كروان كرومه .. خليل فرح ما يلين .
يا ود الرضي القلبه انقطع نصين ..
ترى العبادي ماسك الدابي بالليدين..
مع أبو صلاح ونورالكهربائي الزين ..
فيك الحاج سرور، غني الفراق لي متين ..
وما عارف المفارق ، قدموماش لي وين ..
وياعازة الفراق .. طال بي ، وكله حنين .
مطروحة الجبين من سوبا لي سنار ..
نيليك من غرامن لبسوك سوار ..
أكنافك موطأة فيها ماء وخضار ..
ولي عزازالقبائل .. صرتي أحسن دار.
محصولك دهب ما بكيلو بالعبار ..
مواسمك عدة محسوبات طوال وكتار..
أرضك في الجمال محسوبة بالأشبار..
مشكلة بالتراب .. لكن لجين ونضار.
ترعك زي بحار لبنان طوال وعدال ..
واب عشرين يفوق ناس بردى في الأمثال ..
لياليك بالقمر رويانه نور وظلال ..
مطرزة بالنجوم .. في إحتفال وجمال .
قرآنك بزين من قمت إنت بلاد ..
تقاقيبك تضوي الليل زناد في زناد ..
ما شقاك ضلالي إلا انشبح وانحاد ..
وما جال فيك ظلوم .. إلا انكبح وانقاد .
عزك من قديم ، محسوب جدود واحفاد ..
عمروك الرجال ، تيلاد قصاد تيلاد ..
زرعوك بالسلاليك ومنجل الحصاد ..
وجرنك في التقي ، تمتم قرافو وزاد .
مبسوطة ومحكرة لاهبك لا تقوب ..
وقطنك زي لتيب الحقنه ، خاتي عيوب ..
نعلات منتني ، ولوزا عفي ومكروب ..
وتيلته طويــــله .. زي خيط الحريرفي التوب .
دواوينك مفتحه للضيوف مفروشه ..
وحلالك مجندره لاوسخ لاكوشه ..
شاربه الهمبريب بالساريات مرشوشه ..
والعجب الأماسي .. تقول ليالي الروشه .
في مدني الكبيرنشأتلك الحيثية ..
فجرتي المواهب ومنبع الوطنية ..
بذرة مقدسة اتربت علي الحرية ..
من المؤتمر.. لي الليلة نامية قوية .
من يومك كسبت الكاس وشلت الراية ..
وافكارالمحافل باقية ليهم تاية ..
بالتعليم سقوك وشبعوك قراية ..
وادوك من شبابن .. كل حب ورعاية .
حليل قلب الجزيرة المستقيد النابض ..
حليل جمعة رجالها وجيل شبابها الناهض ..
حليل جمع الصراط زي الهزبرالرابض ..
كل واحد .. علي وطنيته عاضي وقابض .
يا أم الزهورماتسوي قبض الريح ..
كان رايك زمان بشفي وبفيد وبريح ..
قشيلنا السواكب وامسحي التبريح ..
فاتوك الرجال .. لسع جناك بصيح .
ما برضالك الخوف والضياع والحيره ..
مابرضالك اليوم تبقي إنت أسيره ..
مابرضاك أكلت الحلوة تنسي مريره ..
والتاريخ رهيب .. مابنسى ليك تسطيرها .
حاشاك الملامة ؛ ومابتسوي العيب ..
إيدك لسع تجدع من بعيد وتصيب ..
ويومك في المحاص ، شايفنو جايي قريب ..
ودورك بتلعب .. قبل الشمش ماتغيب .
أكسري المين كنار؛ خلي الأراضي تعوم ..
سويهن بحر، من ريبه لي الخرطوم ..
ولعي في الفبارك ؛ غيظ ، ونار، وسموم ..
خلي الهايفه تنقد ؛ والنصيحة تقوم ..
سوي الترع ساتر، والمصارف كوم ..
وسلي سيوفك .. الجبابه مامسلوم .
أعقب سنجه طوف الدالي والمزموم ..
روح للقرابين والسماسم كوم ..
شوف كرمك شرف ، قال للردوك ماتلوم ..
أنسى الفاتت .. أيامك بجيهن يوم .
أرفع ساعديك ؛ أرفع ساعديك ربك العظيم بتشوفها ..
حيي أبا القديم وجديد ، بقت معروفه ..
قول للشهداء نارنا متلعبه ومكلوفه ..
لا ماتت .. ولاغمضوا البجيبوا ظروفها .
أرجينا ؛ أرجينا بنجيك موحدين صادقين ..
شايلين المدافع وبالسماء طايرين ..
صواريخنا بتسكل تطرش اللضنين ..
وفي الجاسرنقيف ليك .. بالنصرهازين .
ديل أولاد حشاك لاإرتزاق لازيف ..
وديل الكلهم صنديد وأصلوشريف ..
ديل دخريك لسنين الجفاف والحيف ..
وديل دفقة ينابيعك .. شهورالصيف .
ديل نيلك وكت قطع البرك والقيف ..
وديل ديم السواري الأصلومابتقيف ..
ديل الرضعوا حرلبنك بدون تحريف ..
وديل البقعوا في نارك .. بدون تكليف .
ديل إتباشروبك إنت درقة وسيف ..
وديل بفدوك بي ارواحم نقيب وعريف ..
ديل أخوان صدق ، في الله دون تحريف ..
وديل ياهم .. عيونك ، وقلبك الوليف .
خايضين فيك صحاري تقيد لهيب وشرار..
وطالعين فيك جبال عاليات علي الطيار..
ونعرف أرضك المحدودة بالأشبار..
وننزل في ربوعك لينا مليون دار..
وندخل فيك ضحى ونمرق مع الأسحار..
ماحجبوك علينا حيارى .. أوأغرار.
نارك ماانطفت ؛ نارك ما انطفت من يوم رماك الغادر..
وسجنك مافضى وأهلك عليهو تدافر..
وللموت كمبلوا ولادك مغني وشاعر ..
وكل عام ليك عيد بالدم موشح وظافر ..
خلي عدوك مجهجه في حكومته وحاير ..
وقيدك هسه بنكسره .. ونجدلوضفاير.
نحن أولادك العارفانا دون تذكار ..
ونحن الجينا في نسلك من الأبكار ..
ونحن الليله شمعك في الضلام سهار..
ونحن الفجرلي الليل كان قعد كان طار..
ونحن نضري ورتابتو ونشيلها عصار..
ونحن بلابل الحرية .. تصدح حتى في الأوكار .
أقول فيك تاني يا ست الشرف والطول ؟
وعزك في الأرض تريان فروع وأصول !!
أرقدي قفى بنجيك ، مهما زمانا يطول ..
ومهما الدهريردم ، في حمولنا حمول ..
ومهما نموت فداك ، نترامى زول في زول ..
برضومنيعة إنت .. علي القدروالصول .
وانت كبيــــرة ؛ كبيرة أكبرمن صغارة العسكر..
وانت عظيمة ما بزلك سلاح البقهر..
وانت عزيمة لا بتلين ولا بتتكسر..
وانت أنوف .. أشم من بيله ، ما بتتعفر.
قوديلنا الرسنة وخلفي الأشتام ..
خنقي لي دلاليكك وصحي النام ..
أرقصي الفاشرالهضليموكب ونام ..
وقولي الليلة شبالكم علي حرام ..
لما تكسروا القيد أب عشرأعوام ..
ولما تقنعوا الكاشفات وراء وقدام ..
ولما تجيبوا سجانكم خزي ومنضام ..
ولما اولادي يبقوا جنود .. ومش خدام .

الكابلى...والهندى
وتلاقت قمم يا مرحى...
شكرا فيشل

لك التحية والوقوف والقومةلك يا اخى فيصل وربنا يجمعنا ويجمع كل الغائبين و كابلى يترنن بالليلة عاد والشوق زاد ...

شكراً للغالية سهاد ان فجرت ينابيع ابداع القامات في منتدي الحباك..
ما زلت احفظ مقدمة محاضرته الاولي في لندن عن الفن والتراث السوداني التي بدأها بجملة:
Am from Sudan the heart of Africa....
[left]
ولكني احببت اغنية الجميلة " شن أسو"
شن اسو
هيّ انا الجنيت قلت هو
إنبهمبي الرار والدليل
النجوع يا ناس والفليل
من هوي المو حايق قليل!
وفي احدي المقابلات التلفزيونية معه حكي مناسبة القصيدة.
تحياتي

تسلمى يا غالية وحقيقى كابلى مبدع وقامة على راس قامات السودان والمبدعين ...ازكر اننى من ولعى بة لم كنت اعرف كلمت among التى زكرها فى شريطه لمحاضرتة فى واشنطون عن التراث فى السودان وزهبت الى الدكشنرى وبحثت عنها ولم انساها ابدا حتى الان ...انت كل الجمال يا كابلى

متين يا على تكبر تشيل حملى ..اياك يا على الخلاك ابوى دخرى......انسيت أنك فى شعورى وفى دمى..مهما بعدت وزاد منك تألمى......نعم عزيزى الفاتح سوداننا ملئ بالروائع ...والروعة فيكم اهلى واهل الحباك

كنت قد وعدت الأخوة فيصل والجنيد بقصتي مع الأستاذ صديق مدثر ومريم الأخرى لنخلة السلفاب ..... وتطرقت
إليها اليوم في بوست آخر مع الإبن الشفيف الحاج عبدالرازق والشئ بالشئ يذكر

تجدون ادناه الوعد ومن بعده القصة وعفوا للتكرار


رد: ماذا قال عبدالهادى الصديق عن الاستاز الكابلى؟؟؟

من طرف أزهرى الحاج البشير في الأربعاء يونيو 23, 2010 7:05 am

ا

سأكتب لكم اليوم عن مريم الأخرى للراحل الحبيب مصطفى ... وكيف عندما تحصلت عليها
كانت ناقصة وماذا فعل بها الأستاذ صديق وما تعليق الراحل أبو سامر مصطفى .. نخلة السلفاب


****************************

أحكي لك هذه القصة مع أستاذنا الشاعر صديق مدّثر في مريم الأخرى ..................
في آواخر عام 1987 أو أوائل عام1988 عثرت على مريم الأخرى فى شريط كاست للأستاذ وكانت في نهاية الشريط الجزء الأول ووقف التسجيل عند:
ما الذي قد صب في عينيك شيئا من تراجيديا الصراع ....
***
والمدى ...............................................

ثم قمت بإدخال الشريط من الجانب الآخر لأستمتع بهذا الكشف المذهل
وبكل أسف بدأ الغناء من
.................. أولد في عينيك طفلا من جديد
أرتدي اللون البنفسج أعتلي شكل الهوية
.................................. إلى آخر الأغنية

كان إستمتاعي بهذا العمل الكبير لا يعدله شئ وأيقنت تماما وقتها أن هذا المصطفى شئ آخر
ولكني لم أحتمل عناء البحث عن النص المفقود فحملت الأغنية لأستاذنا صديق مدثر وطلبت منه إكمال النص المفقود والمدون باللون الأحمر

فعلى هذي السفوح المطمئنة
نحن قاتلنا سنينا ةأقتتلنا
نحن سجلنا التآلف في إنفعالات الإجنة
وأحتوانا البحر والمد اليقاوم والصراع
ياهذه البنت التي تمتد في دنياي سهلا وربوعا وبقاع
ما الذي قد صب في عينيك شيئا من تراجديا الصراع

***
والمدى يمتد بعدا في متاهات المظنة
كلما أملت وصلا عدت بالخيبة من وادي الضياع
غايتي الحمقاء أن أولد في عينيك طفلا من جديد
أرتدى اللون البنفسج أعتلي شكل الهوية .............................

سعدت بما أنجز صديق وأبلغت مصطفى هاتفيا لاحقا ضحك الرجل
وأهدانا الأغنية في شريط كعاداته حتى رحيله المبكر المفجع .... عليه رحمة الله

مشكور عزبزى على مريم الاخرى وكلنا كنا منتظرين القصة ...ويا لك من محظوظ ان تتدحث مع العملاق رحمة الله عليه قبل مماته ...ربنا يديك العافيه ويدى العافيه لكل من حاول يحيى اغانيه ويحافظ عليها ....بتمنى من كل الاعضاء الكرام ان يترحمو على روحه ....ومنتظرين اخوانا فيصل والدكتور

Am from Sudan the heart of Africa....


شكرا سهاد

فيصل ذكّرنا ذلك الألبوم الرائع شذى زهر الذي إستهله الأستاذ بالجملة أعلاه
بالفعل يقع السودان في أعلى الجزء الإيسر للقارة السمراء وذلك موقع القلب من
الجسد


التحية لكم جميعا