وعن بت أبو جبيهة بقول لكم!!!

وعن بت أبو جبيهة بقول لكم!!!
لما
اصبح حال السودان هذه الايام على حافة الانقسام والانفصال الذي سيكون مرير
نسبة لانعكساته السياسية و الاجتماعية و الاقتصادية كان لزاما على الجميع
ان يلتزم مبدا المسؤلية تجاه هذا الوطن العظيم
فالتراب واحد والنيل
واحد والشعب واحد الاله واحد والنسيج الاجتماعي واحد اذن فلما الاقتتال
ولما التشاكس فلوحة الوطن متجسدة عين في كل طفل يولد و في حدقة كل جد سالف

لكن في نهاية الامر ان تم الانفصال لا قدر الله فعلى الساسة ان
يعلموا بان عواصر التمازج ستظل باقية بين الشمال والجنوب ستظل انذارا
تكسيرا لكلمة انصار ومنطقة امادي بلغة عربي جوبا تكسيرا للمهدي
نعم ايها
الساسة سيظل اهل السودان متنوعين كتلون ثياب امهاتنا ولكن ستبقى لهم قلوب
محبة لبعضهم بيضاء بياض جلاليب ابائنا وسيحموا وحدتهم الاجتماعية باصرار
وعزم وبجدية لن تقل عن جدية حمياتهم لشرف بناتنا
ولما كانت عزة الوطن تقترن بشرف بناته حاولت ان اكتب لكم قصيديين عن البنت الوطن اتمنى ان تنالا اعجابكم

(1)
يا بت ملامحك هي الوطن

يا بت ملامحك هي الوطن
كل الخلوق ديك عشقتك......
ما الشمس غابت وغمضت
لامن جهرتيها بطلتك......
وخريف جوبا أعلن
حروب الغيرة على خضرتك......
ونخيل دنقلا امتد ماس
عايز يكون زي قامتك......
وتاكا كسلا أشراب بعنقه
مسرور بيلمح هيبتك......
وجبل مرة فجر ينابيع حنان
شان تكون زي جنتك......
وربابة عزفت في كردفان
فرحانة حاكت رنتك......
الوازا والبالمبو الحنين
سطر ملامح فرحتك......
مردوم يقوم طنبارة صف
دارت تموج بي بهجتك......
دي الكمبلا ما اجملا
بلغة النمنج كم غنتك......
ضرب الكرنج كشكوش يرن
كش كش كرش زي خطوتك ......
بكل صدق قلبك خفق
نوبات تدق درويش غرق
لامن نقع على نظرتك......
نقاقير تدق ونحاس يضج
يبين صور من عزتك......
جداول النفط دي الضفاير
بسواد ينافس حنتك......
عيونك والرموش تقابة وحيران
بايات من جمال زانتك......
الملسة خدودك ليحان دارفور
محايتاالشافية دموع رقتك......
يا بن ادروب وشاي بقارة
الناس مزاجا يجوط لو فقدتك......
الزهر بيفخر بعطروالحلو
اتاريهو سارق ريحتك......
وعسل النحل الفي الأرض
عارفنوا سال من شفتك......
والأزرق الدفاق هدر
ذكرني لحظات ثورتك......
والأبيض انساب بي مهل
تكنو بيقلد مشيتك.......
اتوحدوا النهرين في نيل
زي عاشقين أنا وحضرتك......

(2)
سماح بلدي في عينيك

في مسرح عينيك يا بت يا دي....
بشوف طيبة سماح بلدي....
بشوف الخال والخالات والأعمام
والعمات بشوف حبوبة بشوف جدي....
بشوف ميري معانقة رقية
في جلسة بن مع العصرية
وحدى الكانون براد الشاي....
وأمحمد يصنقع فوق وبي فرحا يقول:
قرب ينجض الباباي ....
بشوف أوشيك وسط دارفور
ماسك لوح وجنبو دواي ....
وإساكا وسط التاكا
بخلالو سديريهو يجابد الماري تفضل جاي....
وفي عينيك أبريت الوحدة في تنوع
يا عجبا عليه يا سلام ....
وسط جمهرة الرموش إتغني بكل إنسجام ....
في فاهك يحلو إبتسام ....
فارداهو للوطن السلام ....
بيهو الوطن إتلفح وئام ....

في مسرح عينيك يادي....
بشوف طيبة سماح بلدي....

يابت ملامحك هي الوطن
كل الخلوق ديك عشقتك
تسلمي اخي علي الرائعيتين ونتمني ان تصبح من القامة باذن الله..
دمت..

وعن بت أبو جبيهة بقول لكم!!!

وعن بت أبو جبيهة بقول لكم!!!

رد: وعن بت أبو جبيهة بقول لكم!!!