مبـــــــروك يا أبـــــو علياء ...نجاح عليـــاء ...

الف مبروك نجاح علياء ... كانت تدرس مختبرات طبية ... وأنا فشلت وأخفقت في تسديد الرسوم الدراسية نسبة لإلتزاماتي المتعدده!!!...ودرسة البنت السنة الأولي مختبرات وجمدت الثانية ...وبرضو ما كان في تقدم في ظروفي ... وأخيراً تركتها لتمتحن ثانياً ...وأخيراً إلتحقت بجامعة السودان تقنية معلومات ...وبتقول لي يا أبوي كمل لي مصاريف الدراسة عشان أشوف نتيجتي ...,حينما أرسلتها لها ...ذهبت أمس وسددت رسومها ...وأنا في الصلاة والتفلون يرن ...وحينما أكملت صلاة الظهر إلا وأم علياء تتصل ..وتقول مبروك علياء نجحت وإنتقلت للصف الثاني دون ملاحق ...وبالجد كدت أطير من الفرح ..وعلياء كان بتبكي بكاءاً مراً ...فرحاً بهذا النجاح ...وبعد ما راقت إتصلت فيها وقلت ليها بكره بإذن الله أدخل موضوع نجاحك لزملائي بالمنتدي .... وعلى طريقة أختي الظريفة ســــومة قلت أبارك لنفسي برااااي ...محبتي لكم جميعاً...

الحمد لله يا ابو علياء فرحت وفرّحتنا معاك.
نبارك لبتنا علياء وأمها وأبوها القابع فى الرياض.
إنشاء الله يا عثمان تفرح بباقى أخواتها ويا سيدى تستاهل الفرح وتستاهل كل خير لأنك رجل طيّب وعلى نياتك.
كسره:----------------
بس ورينا الضبيحه متين وأكيد ما بنقصر ليك مع اللحم.
*ول نويه بتعرف تضبح ولا نشوف توحه بتاع الدوادمى.

أبو أحمد الظريف ... إنت رجل طيب ..حنين ..كريم ...عطوف ...أخو أخوان .... ويا أسرة المنتدي هنالك جوانب خفية في حياة أخي ابو أحمد الإنسان ...لقد قدم لي مساعده فوق الخيال ...وسوف أكشف عنها في يوم ما ...لقد أخجلني بتعامله الراقي معي ...وإذا بي أجده أول من يهنئني في إبنتي علياء ...شكراً لك أخي ابو أحمد يا فارس هذا الزمااان ... بس ربنا يقدرني على جزاك ...وعقبال لأحمد وبقية أفراد أسرتك الطيبة .... محبتي

أخي عوض السيد ... يعني عاوز تورطني بالذبيحة ...طيب يا عوض السيد ..!!! أولاً شكري لشخصك بلا حدود ...وصدقني دائماً عوض جاويش اخوي بقول لي أستاذ عوض دا فلته ... وكتااااب ومواضيعه مليانه حية ...وشكراً لك أخي بتهنئتك بنجاح علياء ...وعقبال لأبنائي صغارك ...وربنا ينجح جميع أفراد أسر أسرة المنتدي ...ولك تحياتي ...ومحبتي

العم الراقي عصمان
الف مبروووووك نجاح الاخت علياء والله عجبني وربي ينجحها كمان وكمان يارب
ونتمني التوفيق لك ولاسرتك الكريمة قادر يا كريم
تحياتي وتبريكاتي لعلياء وامها

أحبتي ول نوية ، الغالي زهير ، المحترمة : دولة ، الأستاذ/ ياسر ، الفرنساوية : صباح. لقد أثلجتم صدري ، وتبريكاتكم ، رفعت معنوياتي عاليةً خفاقة..شكراً لكم ...أنتم الذوووق ..أنتم الأصالة..وتحياتي موصولة لكل أسرة المنتدي العزيزة ...ولكم محبتي ...

مبروك يا ابو عليا ومبروك لعلياء وعقبال التخرج والماستر والدكتورا كمان 000

بقلوب مليانه فرح..... نزف التهنئه الحــاره من جوّه...... ومبروك نجاح ابنتي ...... بالمناسبه علمت بالخبر من الخال / موسى المكي أمس عبر مهاتفه... ,,,,وكانت الدعوات والضراعات بأن يوفقها الله وترتقي ســلم المجد .. اللهم اجعل لها نصيباً من اسمها في العلم و الصــلاح والبر........(آمين )

الف الف بل مليار مبروووووووك يا ابو علياء لعلياء وربنا يوفقها ونشوفها في اعلي المراتب والدرجات يا رب ..
وربنا يديم عليها وعليكم نعمة الفرح والنجاح يا رب
ويا ريت توصل التهاني لام علياء واخواتها
وتهنئة خاصة لعمو عثمان

أحبتي : غريق ، توحة ، الدكتورة ، الخواجية .... قالوا العز أهل ..ووالله العظيم رفعتم راسي عالياً ..وتأكدت فعلاً أنا ورايا رجاله وحريم كماااان ، بل أصحبحتم جزء مني ..أصبحتم سندي ...بل أهلي وأحبتي وأعتز بكم كثيراً .. وأعتز بكم حضوراً وغياباً ...شكراً لكم جميعاً ...شكراً لكم ...وتحياتي لجميع أسرة المنتدي .... محبتي

أبو رزان قدها وقدود ...أثلجت صدري أيها الحبيب ...والعقبال لمحمد ورزان ...وشكراً لك على هذه المداخلة الرائعة كروعة شخصك الخلوق ...ولك محبتي

الف الف مبروك لعلياء بهذا النجاح وان شا الله عليا دائما الى العلياء جعلها الله قرة اعين والديها .
ونعم الاله على العباد كثيرة واجلها نجابة الابناء.
التحية للنابغة علياء وابوها وامها وعقبال الدكتوراه

العزيز العزيز الفاضل ...المحامي الرشيد أبوهريرة ...مداخلتكم بطعم السكر ..وقد أخجلتموني وأثلجتم صدري أيها الأحبة ...وبالجد الواحد بيفخر بيكم شديد ...وربنا لايحرمنا منكم ...وقبال النجاح لكل أسرة المنتدي ..... محبتي

تسلم يالخوجلابي على هذا الإبداع ...وماذا بعد أن يخجلك الإنسان طيبه وذوقه وبإبداعاته ...شكراً لك أخي التقي النقي ...وربنا يقدرني على جزاك ...وعقبالك النجاح ولأسرتك الكريمة ...والتحية لكل المبدعين ...الذين طوعوا التكنلوجيا : الأستاذ/ ياسر ، وتوحة الظريف ، والخواجية سهاااد ، والغالي دوماً الفاضل ، وشخصك المبدع ...والتحية لكل عزيز غالي أسهم بيده الطاهرة وخط حرفاً لتهنئتي ...وصراحةً لقد أخجلتموني بالجد بهذه المشاركة والمساهمة الرائعة والتي ما كنت أتصورها ابداً بهذا القدر...والثناء والتحية والتجلة والتقدير من علياء وأمها وأخواتها على هذه التهاني الرائعة ...ويوجد عندي كمبيوتر بالمنزل ..ولكن لم أوصل النت (الشبكة ) مع ثقتي ...ولكن قلت أخلى الحكاية شوية ...ونيابةً عنهم ببلغكم بالتحايا الحارة ...ولكم حبي يا من أصبحتم أهلي وأصدقائي وأسرتي واحبائي .... محبتي لكم جميعاً دون فرز ...عصمــــان .

العزيز شاويش

متعك الله بالصحة و العافية

و مليونيييييييييييييييييييييين مبروك للبنية و انشاء الله عقبال الدكتوره و ربنا يوفقها في مشوارها الاكاديمي

لك التقدير

يا من انت كريم يارب الحمدالله الذى عوضَكم خير

عمنا شاويش والله وبالله الحق عندما قرأت البوست بكيت فرحا لفرحتك وان شاءالله دائما ايامكم كلها نجاح وفرح ونحنا كلنا فى المنتدى فرحناين عشان عليوه بنتنا واخيتنا
والف مبرووووك ليك وليها ولينا كلنا

ونتمنى لعلياء واخواتها مذيد من التوفيق والنجاح
وانا بالجد اسفه جدا للتهنئه المتأخره

واقعدوا عافيه

الاخ الاستاز عثمان شاويش الف الف الف مبروك نجاح الابنة علياء لقد اسعدنى بل واثلج صدرى هذا الخبر الذى قراته خلال هذه العشرة دقائق ولم اتمالك نفسى الا ان اهنئك واهنئ الاسرة والى المزيد ياعلياء

أخي أبو الزهور ...تهنئني وتقول لي معليش جااات متأخر ...وتعرف خلاصة العطر ما يتبقي بآخر القنينة ...وأنت أحلي ...ودعشمان ..العفوي النبيل ..لك التحية دائماً وربنا يرد غربتك بالسلامة ياراقي وأنا بالجد فخور بمعرفتك... إبنتي الرقيقة الإنسانة دائماً ناهد ... أتابع في كتابتك معزتك لأسرتي ...والله العظيم أنتم لكم معزة خاصة وفي أعماقنا بكل طيبتكم وسماحتكم وحنيتكم النادرة وتسلمي دائماً أيتها الشامخة ... أخي محمود منصور ..الأصيل النبيل ... لقد تعلمت منك الحرص وكيف أحافظ على شعرت معاوية ...بحسك وإخلاصك لأبوجبيهة لم تنقطع عنا لحظة ...وهذا ما يدل على أصلك الطيب ...ودعوتك لي بزيارتك في دارك حينما آتي إلى مكة ...ما هذا إلا دليل كرم لفااارس من بيت أصيل ...شكراً لك أخي محمود ....ولكم التحية جميعاً على تهنئتكم لإبنتي علياء ...*** وأمس كنا مدعووون في إستراحة بالرياض لتناول وجبة الغداء وإلتقيت مع أخي النبيل عوض جاويش ..وكان ممنوناً من الترابط والتواصل الحميم بين أسرة المنتدي ..وبالجد هذا شئ رائع وربنا يحفظكم لنا جميعاً في هذا المنتدي الشامل والتحية الخاصة للقائمين بأمره ...وسوف أدون بعد قليل رسالة علياء لشخصكم .... محبتي

رسالة علياء بالحرف ...كما وصلتني في جوالي :
والدي العزيز ، تحياتي وإحترامي ، على تهنئتي في المنتدي التحية لك ولأفراد سربك الكرام في المنتدي ، ولك تحياتي ، وإنشاء الله أكون عند حسن ظنكم بي ....إنتهت الرسالة .
** وحينما إتصلت عليها قالت لي علياء: أبوي رسالتي وصلتك ؟؟ قلت لها أيوه ...قالت لي بالله رأيك شنو في كلمة سربك .... ضحكت وقلت ليها حلوة ..قال لى إنت بتجامل ...قلت ليها بالجد حلوة ...ولكم تحياتي أحبتي ، وبالجد أنا أعتز وأفخر بكم كتيراً كتيراً .... محبتي

العزيز شاويش

متعك الله بالصحة و العافية

و انا كمان يا عزيز اعتز بمعرفتكم و فخورا جدا بها .. لكن كلمة سربك دي فاتت علي ما عرفتها عليك الله اشرحهها لي .. و بعدين يا اخوي خلي بالك من البنيه و اهتم بدراستها علي ما اظنها نابغه و شد حيلك معها و ما في داعي لجغمسة القروش في حاجات تانية

لك التقدير

رسالة علياء بالحرف ...كما وصلتني في جوالي :
والدي العزيز ، تحياتي وإحترامي ، على تهنئتي في المنتدي التحية لك ولأفراد سربك الكرام في المنتدي ، ولك تحياتي ، وإنشاء الله أكون عند حسن ظنكم بي ....إنتهت الرسالة
****** يا علياء يا بتنا نحن أهلك ودمك ولحمك وشحمك.
كل الأقلام التى خطّت فى هذا البوست هنأتك بصدق المشاعر لأن والدك رجل صادق وقلبو أبيض.
يا علياء بصراحه من أنعم نعم الله عليكى إنك والدك هذا الرجل الطيّب.
عثمان الله يخليك ليهم ويخليهم ليك وزى ما قال ليك الخواجه ود عشمان بطل جغمسه وشد حيلك مع علياء واخواتها لأن الإستثمار البشرى أفضل من كل الإستثمارات الأخرى.
مبروك مره أخرى يا ابو علياء يا عزيز.
تحياتى

ود عشمان يا صباح الورد والجماااال ... والله ضحكتني ...وإنت عارف وأنا عارف ...وكلمة سرب أعتقد علياء إرتسمت لها من أسراب الطيور ...أي حينما يسير السرب بطريقة جماعية تضامنية متحدة متجانسة ...وبعدين يا ود عشمان سيبنا من أسئلتك المجغمسة دي !!!.... محبتي لك أيها الرائع دائماً ...

بت العمدة الإنسانة الرائعة ... صدقيني إنضمامك لهذا المنتدي إضافة حقيقة من شخص أمين صادق مخلص ...وتهنئتك لي أثلجت صدري ...وربنا يحقق أمانيك دائماً يا سومة يا ذووووق ...ولكي إحترامي

إنت يا عوض السيد يعني مصر لازم تبكينا مع الصباااح دا ....والله العظيم بكيت ...لكلامك الجميل ...لكلامك الحنين وصدقني أنا لا أستاهله لأنه أكبر مني قامةً ...وأسأل الله أن يقدرني دائماً على جزاك أيها الصفي الوفي ...وأكرر تحيتي لك على تهنئتي مجدداً وقبال لأبنائي صغارك ..أحبابي أنجالك ... أعزائي أطفالك .... محبتي

أبكى يا اخوى طلّع كل الجوّاك وما تنسى دموع الرجال غاليه لكن ما غاليه على فلذة كبدك التى من أجلها وأخواتها بكيت وتعبت وسهرت ولعمرى إنك لا تريد تكريما بقدر ما إنك تريد تشريفا.
إنشاء الله دايما فرحان ولو تانى بكيت ما مشكله

قمر الدين القمر ...تحياتي لك بقدر أشواقي ...وبالجد لقد أخجلتموني يا نااس المنتدي الرائع ... في تهانيكم الغالية بنجاح إبنتي علياء، ولك كل الود ...وكان يدور سؤال بخلدي ...كان لنا زميل يدعي قمر الدين الصديق ...فما عارف لقد إختلطت على الأمور ...ففضلاً أشرح لي وصوبني ...وكان يسكن غرب المدرسة الشمالية جوار منزل التاجر ابسامه محل إمتداد السوق الحالي ...وتهنئتك لي قد اثلجت صدري أيها الحبيب الغالي ...ولك محبتي ..

يا ود الشاويش زميلك دى كتيره و الأجابة على سؤالك محولة للأتيه أسماؤهم
أزهرى الحاج
فيصل خليل
معتصم مصطفى بابكر
عوض السيد أبراهيم
والخال/ احمد قمرالدين
واحد من المذكورين أعلاه سجيلى ودفعتى

والله دا إمتحااان دا ....وسعالك صعب لي فهمه ...ولكن يبدو لي أقرب عمر لك هو الأستاذ/ عوض السيد ...فما عارف إجابتي لسؤالك صح أم خطأ ؟؟؟ وفضلاً صوبني ...ولك تحياتي وإحترامي ،،،،

أعزائي : عوض السيد ، قمر القمر ، ول نوية ...مداخلتكم بطعم موية الكور .. ( الملم )وإنت أصلاً رائع يا ول نوية ... أستاذ عوض السيد ...إنت حقيقة مرجع وملم بكل ناس أبوجبيهة وماشاء الله تبارك الله ...الغالي قمر القمر ...أيوه كدا الصورة وضحت ...بس ما قلت لي شمال مدرسة البنات ...وين لمنزل العم تكلوم ...رحمة الله عليه ....معليش بنحكها كدا ...عشان نفهم أكتر .... معزتي لكم ....

ممكن سعااال يا قمر ... يوجد منزل لحاجه كبيرة شرق منزل العزيز ميرغني دقاقة ...هل الحاجه دي جدة :محمد يوسف الضو ...والذي يسكن مع أسرته شمال منزل العم / مصطفي الشفيع رحمة الله عليه ؟؟؟؟
يا أستاذ/ عوض إنت طلعت عجوووووز .......... محبتي

أيوه والدة عمنا يوسف الضوء منزلها غرب مرغنى دققا
وليس شرقه طبعا لانى أصغر من عوض السيد ما زالت الذاكرة حديد
ولك محبتى أبوعلياء