فيروس المظاهرات

فيروس المظاهرات

أكاد أشك في الخواجات، وانهم اشتغلو على فيروس انفلونزا الطيور وفيروس انفلونزا الخنازير وفيروس جنون البقر لخبطوهم مع بعض وانتجو فيروس جديد وطوروهو لحدي ما بقى فيروس جنون الشعوب. يشبه في مراحله الأولى وباء الكوليرا الفرق بينه وبين الكوليرا في الكوليرا المصاب يكورك (الشعب يريد دخول الحمام) أما فيروس المظاهرات فالمصاب يكورك(الشعب يريد أسقاط النظام)، فيروس المظاهرات أو مرض متلازمة جنون الشعوب ،فيروس سريع الانتشار،العائل له الفيسبوك،يلتقطه الإنسان سريعاً جداً،فترة الحضانة من أربعة وعشرين ساعة إلى عشرة أيام، أعراضه المصاب يطيّر عيونو ثم يعضعض شلاليفو وحكة بفروة الراس، هلاويس بتغير النظام، المصاب تغلبو القعدة عند اهلو وفي بطن بيتو يكوس للسهلة يشيل بطانيتو ويمشي يرقد هناك و يشوف ويتوارى ليهو الرئيس حق البلد بتاعتو قدامو ويقعد يكورك فيهو ( شتت ،شتت،شتت) ينتقل الفيروس بواسطة الإنترنت أو بواسطة الموبايل أو بواسطة قناة الجزيرة أو بالخشم يصيب الفيروس كل الأعمار من عمر يوم إلى عمر تمانين سنة نسبة الوفيات تتراوح بين خمسة من عشرة في المية، إلى خمسة بالمية تعتمد زيادة الوفيات على سرعة العلاج وطريقة العلاج تزيد عند محاولة العلاج بالكي وتقل عند استعمال المكمدات الباردة المسكنات ما بتنفع معاهوالمسكنات زي قطع الإنترنت التشويش على قناة الجزيرة قطع شبكة اتصالات الموبايل مقاوم للحرارة والرصاص والبنبان يمكنه التحوصل والبقاء بالتربة لمدة خمسين سنة ينشط عند زيادة الأسعار وتفشي الفساد المالي والإداري والبطالة والخبيّرات التحت تحت عن ثراء الرئيس و أقارب الرئيس أو أي زول عندو سُلطة حتى لو كان رئيس لجنة في حي صغيروني لمقاومة الوباء لابد من وضع الاحتياطات اللازمة زي محاربة الفساد، توفير الوظائف، الحكومة تقعد في بطن الواطا دي وتراجع نفسها وعلاقتها بشعبها وتخلي أمور التلاتة ورقات البتسوي فيها دي، ترجّع القريشات من ناسها الشالوها ايدية و حُمرة عين وقالو حقتهم تخلي شغل دا زولنا نديهو ونحميهو ونوديهو لي قدام ودا ما عندنا بيهو شغلة نخليهو في سجمو ورمادو ونسجمو ونرمدو اكتر(ويا عاجبلكم الزول السجمان و الما عندو شي يخاف عليهو وشقيان، الحياة والموت عندو وااااااحد) علاج الفيروس والوباء أولها استقالة الحكومة جججججججت،محاكمة الفاسدين والمفسدين من أصغر رويس لأكبر راس كل شي اتشال من غير وجع حق يرجع في بكانو الاتشال منو،من أهم نتائج المترتبة على انتشار وباء مرض فيروس جنون الشعوب، انو الناس بتقعد في الشارع طوااااالي ودايرين مظاهرات طوااااالي، وتغلبهم القعدة في البيت،حسي عاينو انتشار الوباء في تونس ومصر سوا شنو؟بعد ما مساكين مبارك وبن علي شتتو ،لي حسي الناس في السهلة وكل يوم والتاني دايرين يكوركو ويظاهرو،وحالفين علا يحكوها لمن تجيب الدم، الخبر الكعب انو الفيروس دا ما عندو لا لقاح ولا مصل تب! ولا بتنفع معاهو لا حجبات لا كواديك غايتو الله يكفينا شرو! قفل الباب:- الأعادي، يتسلون بتطويع السكاكين، وتطبيع الميادين، وتقطيع بلادي،

منقووووول