الخط إتسرق يا رجــــــــــــــــالة !!!!

ساخر سبيل - الفاتح جبرا




الخط إتسرق يا رجالة

الخطوط أنواع ..وأشكال
فى الكتابة عندك خط الرقعة وخط النسخ وبقية الخطوط .
وفى الكوره عندك خط ستة وخط طمنطاشر وخط التماس
وفى الجغرافية عندك كمان خط الإستواء وخط قرينتش وخط الطول وخط العرض وبرضو عندك خطوط تانية زى خط المواصلات وخط الموبايل وخط الفقر وخط المشاة وخط الطيران!
جميع هذه الخطوط عزيزى القارئ تشترك فى خاصية واحده رغم تباينها .. هل تدري ما هى هذه الخاصية ! وما الذى يجمع بين خط طمنطاشر وخط الإستواء وخط قرينتش ؟ سوف تشحذ ذهنك عزيزى القارئ ولو أديتك ستين سنة عشان تفكر أنا متأكد تماما أنك سوف تفشل فى إيجاد هذا الشئ المشترك بين كل هذه الخطوط !
طيب أنا أوفر عليك الستين سنة وأقول ليك الإجابة وهى أن جميع هذه الخطوط لا يمكن أن تسرق !!
يعنى حصل يوم شفتوا ليكم (خط قرينتش إتسرق) وللا (خط مشاة إتسرق) وللا أى واحد من الخطوط دى زول (نشلو ونام بيهو) !
لكن طبعن لأنو نحنا عندنا ناس يسرقو (الكحل من العين) ويسرقو ليك خط سته ذاااتو لحدت ما (الحكم) يودوهو الإنعاش من المفاجأة فقد تمت سرقة خط (جوى) !! قامت جهه ما بسرقة خط (الخرطوم – هيثرو) الجوى وباعته (كسر) لأحد الجهات التى تتعامل في المال المسروق !!
فجأتن اكتشف أحد المسئولين إختفاء أحد أهم خطوط الطيران لديه فصاح بأعلى صوته :
- خط (الخرطوم – هيثرو) إتسرق يا رجاااالة !!
هنا تجمع الجيران وبعض المارة (بتاعين الشمارات) وأخذوا يهدأون من روع المسئول
- صوت 1 : يا سعادتك كدى فتش براااحه بررراحه إحتمال تلاقيهو !
- رد : ألاقيهو دى شنو؟ الخط ده مفقود وأنا ما شايفو ليهو تلاته أربعه سنين !
- صوت 2 : وإنتو يا سعادتك نايمين التلاته أربعه سنين دى وجايين تسألو عنو هسه ؟
- رد : هى لاكن نحنا قايلين فى زول ممكن يسرق ليهو خط طيران ويبيعو؟
- صوت 4 : والله يا سعادتك عندنا ناس يسرقو ليك الجنريتر والحفلة شغالة !
- صوت 5 : مش إحتمال يعنى يمكن تكونو إتزنقتو كده مرة لى قروش وقمتو مشيتو بعتوهو ؟
- رد : إتزنقنا وبعناهو دى شنو؟ مش كان على الأقل تكون فى مبايعة موجودة عندنا مثلاً
- صوت 6: أها يعنى يكون الخط ده مشى وين يعنى؟
للإجابة على تساؤل (الصوت 6) نقول ليهو إنو (أمنا الحكومة) ما سكتت على (السرقة العارفاها ليها تلاته سنين وشوية) وقامت طواااالى شكلت لجنة تحقيق عشان تحدد الجهات المتورطة وأعطت اللجنة دى الحق فى إنها تتعاقد ليها مع (متحري إنجليزى خاص) عشان يتابع الموضوع في بريطانيا ولمن يعرف الناس (السرقوا الخط) يقوم يفتح ليهم بلاغ فى (القسم الجنوبى الإنجليزى) ويختو الخط (معروضات) !

عليكم الله دى مش حاجه تحير؟ لجنة شنو؟ وتحريات أيه؟ وبتاع مين؟ هسه الموضوع ده عاوز ليهو لجنة؟ هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
وبعدين المشكلة وين؟ هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى) !!
غايتو على الشعب السودانى الفضل أن يمتثل إلى الحكمة الصينية القديمة التى تقول : (يهاو فينج زهاو ينج بينج) وترجمتها الحرفية (الجاتك فى خطك سامحتك)

كسرة :
لولا أن (التومة الوداعية) الشافت شركات الحكومة (الرايحة) فى العمرة ولسه ما جات .. كان ختينا ليها (النية) عشان تشوف لينا الخط ده (النشلو) منو؟ .. بعدين يا جماعة مع (رايحاتكم الكتيرة دى) حقو (التومة) دى تشغلوها معاكم إن شاء الله (مستشار لمعرفة الرايحة( !

2/07/2011

تحياتي يالفاتح ....كل يوم نكتشف فنون جديدة من الفساد مع هؤلاء القوم غير مسبوقة ، ولا أظن أن هذه قد سبقهم عليها أحد في هذا الكون ، أخي الفاتح هذه من طراز "لا عين رأت ولا أذن سمعت" هذه هي تجربتهم التي يقدمونها للعالم ..مشروع حضاري مبني على الفساد..لذلك لا تستغرب تلك المصائب التي تحل عليهم ..مصيبة تلو الأخرى ..ثم نعلقها على شماعة الإستهداف..عجبي..ومن ثم يرغون ويزبدون "هي لله " ويستغفلون هذا الشعب المغلوب على أمره بهذه الشعارات الزائفة

نعم أخي الفاتح "جبر الله كسر هذا الوطن" . ....

سلام عليك اخى..اشرف بشرى ..علمت انك بالدمام..ام معلومتى..مضروبة..فيصل هل وصلت الحباك ومع الافراح لك الشوق..
الساخر الفاتح جبرا..بتفشى من الكمد بكلمات ساخرات..
الفاتح انا قلت للتومة الودعاية تشوف ..متى يرن اخوتى كرنكة والفاتح ود التوم..
اما سرقة الخط دى سرقة خفيفة..
ديل ((همبتو)) الإرادة..
ــ الكتل البشرية التى كانت تغير الانظمة شتتوها..المحطة الوسطى زنك الخضار ..زنك اللحمة..باعو ميدان ابوجنزير برفاته..
ــ افرغوا داخليات الطلاب وخلوهم يجروا خلف صندوق دعم الطلاب ...اصبح لا ركن نقاش ..ولا كديسة تبحث فى درام ..
ــ الخدمة المدنية ..خصخصوا الشركات العامة والمؤسسات ..وهاك ياتشرد وهاك هروب الى مرافئ الجفا القاسية..
ــ مدن حمراء ثائرة دمروها..فوبيااليسار..مدنى وعطبرة وكادقلى ..ومدن خضراء مشروع الجزيرة ومؤسسة جبال النوبة وكل ديسك حايم..دمروه..
وين الإرادة التى تقول الشعب يريد تغيير النظام..
اين ميدان التحرير او ميدان التغيير ..ام ساحة الحرية..اين الطلاب..تراهم اطفال يتبارون فى انواع الموبايلات..
اين الخدمة المدنية والنقابات..اين اللمة..
فكوا للشعب كلاب ..ذئاب ..مافيش إرادة..تقول هووووى جر..
حلايب..ماكفاية..10مليون مستجلبيين للشمال ..من مصر المؤمنة..وتمهيد 2.25مليون فدان..وخدمات مجانا..والمواطن السودانى ؟؟؟..مالاقى سمسم..وكليو اللحم يرتفع ..وعجول تمشى برجولها لمصر ام بلادى ياشقيقة.. .
اخوتى هذه فضفضة ..
والله غالب على امره..
هناك تغيير إلاهى بصورة والله لا تخطر على بال..
والله بقلع زراعتوا بمواسم يعلمها هو جلا فى علاه
والله اعلم

كل ذي عهد جبار .....
لكن لا محال من التغير
الطلاب ممكونين من التنظيمات الام
لانها لا تقف معهم وتساندهم
وفي جماعة تابعين لي احزاب البهجة والمسرة
وما جايبين خبر ذي ما قلته الواحد همه تلفونه يكون
سمح وبنطلون شيك وقعده لذيذه مع الشلة في الكيب وست
وانه شريحة تكون منشطه عشان يواصل الفرد في الفيس بك
وهلمة جره .......
لكن بيني وبينك قربت الساعة المنتظره