يسن محمد يسن من ابناء امبرمبيطه رغم كيد الحاسدين

كانت رحلة جميلة لم اشاهد مثل هذا الكرم وتلك الاريحية وحسن الضيافة في حياتي كما استمتعنا بمناظر الخريف والخور ولاحظت كل ناس الحلة يجيدوا العوم وكان البنات والاولاد الصغار يقعوا الخور ويمشوا يتسوقوا ويجوا وبجد استمتعنا بكرم وضيافة ناس امبرمبيطة وطبيعتها الجميلة طبعا الحتة الاخيرة دي عشان ودعشمان عشان ما يقول نحن ناس لبوجبيهة ما بنشوف اي مكان تاني زي ابوجبيهة..
تشكر يا ابا السارة على الشهاده التي جاءت في وقتها
اها يا فيصل وغريق شهد شاهد من اهلكم على مصداقية ود عشمان المطلقة
تحياتي راجع صنوق الرسائل يا الفاتح

انا ما عارف يا محمود انت حكايتك شنو كل ما الجماعة يلموا الموضوع انت تولع النار انا عايز اعرف ود عشمان ده اداك شنو مع تحياتي راجع الرسائل

ابوساره حمدله على السلامه

كلامك عن امبرامبيطه جميل

لكن المحيرنى انت الوداك بشارع امبرامبيطه شنو لحدو ما تتعزب العزاب ده كلو

على العموم شهادك مقبوله 00لكن براك شفت منصور بحرف الكلام كيف


عشان كده ناس منصور وول عشمان وول كوكو ديل


مزوراتيه كبار الكلام عدييييييل كده يقومو يلفلفوه ويجيبوه فى صالح امبرامبيطه


انا عتدى مقترح نديهم التابعيه

وقبل كده نخلى يس يكون كفيل لهم


تحياتى

تسلم يا زعيم الواضح ان الجماعة ديل عايزين يدولوا الموضوع ويدخلونا في شغلانة تانية وطبعا الرحلة دي كانت زمان لما كانوا تابعين لينا وكده لكن بعده الموضوع اختلف وانا اكيد بكون مع جماعتى مادام حتى الكلام بحرفوه ويظهر الجماعة ديل مغلاتيين
مع خالص تحياتي

تسلموا العزيزين فيصل وأحمد كوكو بس يا فيصل الجماعة ديل الظاهر ما ساهلين كمان وين صاحبنا يسين ما سمعنا صوتو اوع يكون الجماعة مهددنه بالحكومة

انت صاحبك ول عشمان ده لابد وين ورجع من رحلتو المشبوه ديك ولا يا توا

عود الصندل هووووووى ابقى لينا على جيهه واحده 000وبعدين يا ول كوكو زولك ول عشمان ده كده ورينا ليهو هو وين

شكرا يا ول كوكو زولك ده انحنا راجينو وحرابنا طران

الله يرحم استازنا حكم 00حسب علمى انو اولادو رحلوا الى الخرطوم ومنزلهم فى الحباك قاعد ومؤجر واعتقد انو عندو زميلو اسمو عبد الله شمس الدين على اتصال باسرة المرحوم حكم

شكرا يا زعيم ربنا يرحموا بالجنة كان نعم الاخ وهو سبب زيارتى لابوجبيهة وكان ذلك فى العاو 1999 ومن بعدها تعدد زياراتى ليها .

يا جماعة اخير ليكم امسكو فى كلام غريق دا وامسكو التبعية وخلو يس يكفلكم عشان وضعكم يكون مقنن

لانو عندنا كشات جاية

وهو عود الصندل انت الماك فى الناس ديل شنو ترى انقرع

ول كوكو سلامات ول عشمان ده مالا طول كي ؟وين الدار اللكلتا كان ناغمك سلم عليّ

عوووووول 00000عوووووول ول عشمان هوووووووى يا عيال امبرامبيطه الزول ده وديتو وين

يا عيال ابوجبيهه ..

السلام عليكو .. اول حاجه قرمان ليكم حار ..

عندي كلام مهم موجه لغريق و فيصل خليل و اقبال عبداللطيف و من معهم .. و الكلام دا ما قلته انا قال الاخ الفاضل ( الفاتح حسن ابو ساره ) و انا داير الزعيم غريق و من معه ان يقرو الكلام دا مرة تانية و اليكم ما قاله العزيز ابوساره :

الاخوة الاعزاء والله الموضوع ساخن وغلبنا نقعد فراجة وكمان شايف الموضوع تشعب و لو ما حليتوه براكم بقول اكيد حتدخل امريكا ومعاها الغرب وما تنسوا ودعشمان ولدهم والظاهر مالي يده بيهم و عشان الجماعة ديل ها يسوا لينا مشكلة ثانية نقوم نفتح الحدود ونعمل جنسية مشتركة ما عندنا مشكلة خليهم يشتركوا معانا في يسن
بمناسبة امبرمبيطة واهلها اذكر في بداية الثمانينات كنا مسافرين من ابوجبيهة الي كادقلي في عز الخريف عن طريق تركتور (بابور وترلة) وكان السائق هو دودو والزيات مختار البانج ومعانا عمنا عبد الرازق الحاج و احد المهندسين الزراعيين رجل كبير السن اعتقد اسمه الطيب وعدد كبير من الركاب في حدود 14 شخص من حريم ورجال ووصلنا الى خور امبرمبيطة حوالي الساعة الثانية عشرة ليلا ووجدنا الخور مليان وكان مافي طريقة الا ان نرجع ونبيت في حلة العمدة وننتظر حتي يعدي الخور ونقطع وكما ذ كرت فقد كان الوقت متأخرا جدا في ساعات الصباح الاولى وقد حاولنا ان ندخل الحلة بكل هدوء حتي لانزعجهم في هذه الساعة المتأخرة لكن هيهات وما ان سمععوا بصوت البابور حتى صحيت الحلة كلها وفي ظرف دقائق معدودة وجدنا انفسنا في دفء الاسرة والبطاطين وقد حلفوا لهم بالطلاق ما ويلعوا اي نار في هذا الوقت وعندما فتحنا عيوننا في الصباح وجدنا شجرة العرديبة التي تتوسط الدار قد امتلات بالفرش وبراريد الشاي والحليب واللقيمات والكل يتسابق في اكرمنا ونفس الشيء في الفطور والله كأننا في مناسبة او عازومة اطيب انواع الاكل وياريت لو الحكاية كانت يوم واحد وبس الخور حلف ما ينزل وقعدنا اربعة ايام في فريق العمدة واصبحنا مقيمين وبقينا نقيل نلعب الكوتشينة ونسمع الاغاني من مسجلاتهم واذكر كان ضابط الزراعة في امبرمبيطة بابكر الحاج وما ادراكم من هو بابكر الحاج لما شاف حكايتنا طولت قام جاب تركتور تاني وقطر تركترنا وهو مبطل وحلف ما نغادر امبرمبيطة الا هو كمان يكرمنا انتقلنا الى استراحة المؤسسة ويا حليل المؤسسة الزراعية وهناك ذبح لينا تاني واكرمنا اخر كرم وقام الفراش بغسيل ملابسنا وكيها وقضينا يوما خريفيا جميلا واذكر طبعا الوقت داك كان لعب الحريق في عزو وبابكر بحب الحريق جدا وبدا الجماعة في اللعب طبعا بدون قروش وكل مرة بابكر الحاج يقول ليهم يا جماعة اللعبة كده ماسخة طعموها شوية الجماعة يقولوا ليه هوي يا بابكر انت الظاهر عليك داير تخرتنا وتتسد حق الخروف والله كانت رحلة جميلة لم اشاهد مثل هذا الكرم وتلك الاريحية وحسن الضيافة في حياتي كما استمتعنا بمناظر الخريف والخور ولاحظت كل ناس الحلة يجيدوا العوم وكان البنات والاولاد الصغار يقعوا الخور ويمشوا يتسوقوا ويجوا وبجد استمتعنا بكرم وضيافة ناس امبرمبيطة وطبيعتها الجميلة طبعا الحتة الاخيرة دي عشان ودعشمان عشان ما يقول نحن ناس لبوجبيهة ما بنشوف اي مكان تاي زي ابوجبيهة ..

شكرا يا ابوساره يا رائع علي الكلام الجميل دا .. بعدين يا ابوساره الحي القعدو فوقا دا حينا ( مقطاع الخور ) ..

حبابك مليونين لو جيتنا تاني لو الخور مليان و لا فاضي تقعد معنا اسبوع .. ابشر يا زول حبابك مليونين يا عزيز ..

الزعيم غريف / فيصل خليل / اقبال و بقية ابناء ابوجبيهه ..

ولدنا يسن محمد يسن شلنا منكم الشمس ضحا .. هذه نقطة .. اما النقطة الثانية هي موضوع الاخ عود الصندل .. كلوقي مدينة عريقة و لها تاريخهها و لن نقبل ان تمس بنوع من الاستهتار ..

الاخ عود الصندل زي ما انت شايف نحن بالحجه و المنطق لمينا ولدنا علينا .. الان نحن معك قلبا و غالبا لنصرة اهل مدينة كلوقي الشامخه و الكلام القالو ازهري فيكم حار و بوجع .. الان يا عود الصندل الشراره ولعناها ليك .. اتا انفخ و الباقي خلي علينا و ( الرهيفه تنقد )و ما تخاف من ابوهريره المحامي جابو عشان يرافع في قضية يسن محمد يسن .. طلع محامي فشنك مرافعاتو كلها طلعت جعجعه بدون طحين ..

لكم التقدير

محمود ..

انت رجل رائع جدا .. شكرا للصوره الجميله ..

و يا اخونا الاحتفال بالاخ يسن محمد بعودته لاهله بامبرمبيطة تأجل للاسبوع الاول من العيد و ذلك قرار من السيد ريس اللجنة العليا للاحتفال الاستاذ محمود منصور ..

و الدعوه عامه ..

يا منصور الحديقه دى سوها فى امبرامبيطه بالخيال ولا ايه يا شيخ؟؟؟؟؟؟

جاور الكضب مجاوره عشان ناس احمد كوكو وول عشمان يعرفو يلايقو

الحبيب ول عشمان حمدله على السلامه حقيقه خفنا عليك من السفره المشبوهه دى وبعدين انحنا طبعا حسمنا الملف بتاع يس واديناكم التابعيه وخلينا وليدنا يس المسلبطين فيه دا يكون كفيل لكل افراد الجاليه امبرمبيطاويه والكلام ده تم بمباركت اخونا وحبيبنا محمود منصور والخ الوجيه احمد كوكو 000ونصيحتى ليك ان تنضم للاتفاقيه وتبسم بالعشره عشان الجماعه المعاك ديل انا شايفهم بخلوك فى الطبنقعه 000والطبنقعه دى كن قلبتك اسال منها ول ابوى الزبير

تحياتى

الزعيم غريق ..

الله يسلمك .. انا طيعا مشيت اليونان لزياره رسميه و الاخ محمود ذكر اسباب الزياره و الغرض منها بناء علاقات استراتيجيه ما بين امبرمبيطه و اثينا هذا كل ما في الامر ..

اما بالنسبة لموضوع يسن محمد يسن انا بعتبر كلامكم دا فرفرة مذبوح .. انتم مدعوون لحضور الصراع و النقاره و المردوم بميدان الحرية مدينة امبرميبطة احتفاء بأبن امبرمبيطة البار و الدعوه عامه لكم ..

انحنا جاهزين

وبعدين يا ول كوكو ناس عجيله ورفاقتو ما كرهو ناس امبرامبيطه الصراع جو مره قارونا فى الحباك عندكم فارس اسمو سلوى رموه 5مرات

وناس السمبك قارو امبرامبيطه رمو ناس جارت الوادى 21مقابل اربعه

ههههههههههههههههههههههههههههههههههههههههههههههههههههه

كن كشجرة الصندل تعطر فاس قاطعها

كلام والله... غريق .. فيصل .. احمد كوكو
ياجماعة الخير انا انسحبت من ودعشمان وما عاوز تاني ادافع عنو خالص لانو ورطنا نحن وانسحب وطنش الموضوع
وتانيا عود الصندل يولع النيران ويرجع طفيها
وابوهريرة المحامي ومتلقي الحجج الوهمية عصا نايمة وعصا قايمة المهم عندو الضحاكات,,
بعدين الاستاذ ياسين بلعب على الحبلين ....
وشايفين الصورة بتاعتي الجديدة دي انا اتصورتها امبارح في امبرمبيطة والحمار ده حق ودعشمان
تحياتي

هههههههههههههههههه

الاخ محمود ياخ قربت افطس من الضحك .. اول ما شفت صورتك قلت يا اخونا الدحش الراكب فيه محمود دا البشبه دحشنا دا جابو من وين اتاري دا هو زاتو ..
ههههههههههههههههه ههههههههههههههه هههههههههههههه

يا عزيزي محمود ..

الان ناس امبرمبيطة مرشحنك تكون رئيس محلية و كنا الموضوع دا خاطنو ليك مفاجئه .. انسحابك من الدفاع عن جارة الوادي مرفوض جملة و تفصيلا انت الان بقيت لحم و عضم و ناس امبرمبيطة بسلمو عليك ..

الاخ فيصل ابن حتيلة ..

نحن دائما بنتعامل بالظاهر و بالحجة و المنطق و لدينا ما يثبت ذلك .. نحن عاوزين نعرف منو من ابناء مدينة امبرمبيطة انضم عليكم ؟؟ في تقديري معلومة غير دقيقة لو قلت العكس لسالنك السؤال ذاته من هو من امبرمبيطة ترك ابوجبيهه و رجع الي منطقته الاصل علي كل حال نحن ماشين بخطي ثابته لكن هنالك مشكله يجب ان تحلوها يا ناس ابوجبيهه و هي مشكلة الاخ عود الصندل لانو الاخ ازهري قلل من شأن كالوقي و دا كلام نحن نرفضو جملة و تفصيلا و نحن عاوزين الاخ محمد ادم سراقة يتدخل في الموضوع و المحامي الكبير ابوفارس كذلك الكلام القالو ازهري حار و بوجع ..
و الزعيم غريق بقوه زعيم عشان يحل المشاكل لكن يبدو شقال العكس بربط في المشاكل ..

اما النقطة الثالثة و الاهم هي كيفية الاحتفال بالاخ يسن محمد يسن طبعا نحن عاملين صراع ضمن برنامح الاحتفال و انتم يا ناس ابوجبيهه اذا دايرن تصارعونا .. نحن جاهزين و انا في تقديري احسن نقلب الشقلانيه صراع و اذا غلبتونا نرجع ليكم الاخ يسن .. بشرط الصراع دا يحضروه جميع مدن و حلاال و قري المنطقة الشرقية و الشرط الثاني الصرع يبدا الساعة الثانية ضهر بعد سوق الخميس في مدينة امبرمبيطة و يستمر حتي نرميكم مائة رمية .. و اكيد ح نقدم الدعوة للوالي و المحافظين ..

الاخ احمد كوكو .. جماعتك بنشوفهم نجوم القايله بس خليهم يجو ..

و لكم التقدير

ووالله يا عيال امبرمبيطة حكايتكو حكاية..نصيحة مني شوفو ليكو حاجة بلا الصراع تكسبوها ..جالوا ربا او اي رقصة..عيالنا مابصارعو...مادايرة اقطع قلوبكم بس ماتخاترو.

اقبال ..

ههههههههههههههه هههههههههههههههه ههههههههههه..

اذا ما دايرن الصراع نحن ولدنا يسن و شلنا .. معناة بالمنطق و الحجة و الصراع غلبناكم يا ناس ابوجبيهه ..

لك التقدير

ول منصور راكب ليهو حمار

والله لوركبت فيل يس ما نتنازل منو

وبعدين كده خلى الدرت يجى وناس الحباك يغيرو جارت الوادى

وبعدين شوف ليك بهول

الاستاذ غريق
انت ما عارف قصة الحمار ده ول شنو؟؟
الحمار ده انقليزي مهجن ومن سلالة عربية نادرة مستورد من فرنسا عن طريق ود عشمان ومعروض للبيع في امرمبيطة وارسلناهو مع اللواري عشان يربطوه في مزرعة ود عشمان..
الف تحية

العزيز احمد كوكو ..

انت عارف الكلام القلته دا صحي .. الزعيم غريق كمبال الحاجه العرفتها قالو عندهم جدهم فكي كارب بكون حوض لينا الاحتفال دا .. لكن لو عندك تلفون الفكي ( تلاف ) رسل لي .. طبعا عمك الفكي معروف في امبرمبيطه .. لكن الموضوع دا خلي بيني و بينك سر ..
و طبعا انا اتصلت للاخ ولدنا يسن و لقيت معه حبوبتي عسكريه بتسلم عليك و الاخ يسن مبسوط جدا من الشقل السوينا دا ..

تكدك شنو واحتفال شنو

يا ود منصور حمارك الانجليذى وديتو وين ولا باعو ناس الحباك

بعدين يا ول كوكو احتفالكم ده الا ترسلو لشباب الحباك عشان يجو يامنو ليكم

انت عارف ود عشمان بتاعكم ده بقى بهضرب ساى


الاحتفال ده يمين لو مشيتو دار فور ما تقدرو تسوه اهاا

اسالكم كده سعال واحد

يس محمد يس من ابوجبيهه ولا من جارت الوادى بتاعتكم


كده قولوها براكم

تحياتى

في رأيى الشخصى لا يوجد فارق كبير بين ناس أبوجبيهة وناس امبريمبيط الناس الفى أم بريمبيطة وناس الكور هم اهل بعض والكل يحن لبعض.

ناس أمبرامبيطة من الحوازم هم دار فايد, والطوقية ـ أو كما يسمونهم عيال أبو طوق عصا تحت وعصا فوق.
كدا خلو الموضوع دا على حالو.
انا بمسك ليكو العصا من النص وبقول
ناس أمبرامبيطة يقولو يس من ام بريمبيطة
وناس ابو جبيهة يقولوا يس من ابو جبيهة

اها كلام زين ولا لا

يعقوب النو حامد