سناريو اليابسه ... كما غنّاها مصطفى سيد أحمد

سناريو البحث عن اليابسة كما غنّاها الراحل المبدع مصطفى سيد أحمد

كثيرا ما كان يعدّل مصطفى فى كلمات أغنياته بما يتفق مع رؤاه وضرورات اللحن ومتطلبات أخرى
ولم تسلم هذه القصيدة من مقص مصطفى وهو يملك حس شعرى عالى ، وفى إعتقادى أن ما حذف من هذه القصيدة ،كلمات فيها حده أو خروج عن ...................

النص:

الهدهد

مخدوش الفضاء طويل الحزن

مفتول الحنين

مُصاب بالديانات والشرود

نوح يبلغ من الطول

مسافة يشتهى الغرقان شهيق

اليابسه فِركه

مدخوره لي يوم فيهو ساير النيل

قطّاع رحط كل الجزاير، والبنات البفتحو الباب للمطر

وانا جدولك

شارف علي كل الجناين الصاحيه فيك

والغباش في دمى منك

لو كسر ضلعين عذرتو

لكن نهر كل العصافير البتلعب في الوريد

وفناكي جواى زى حجر،

والبينا ما فات الدواير

الليل خمار القمره

مجدوع في الفراغ

والرقصه للبت فينا

فوق كل المسامير الندقها في البساط

والريّاح حّكامه بى دلوكه مرّقت كل الشياطين المنها

إتجنن فقير الحله

دقيناهو بى نفس السياط

كل المجرات

النيازك والشهب

ودع راميهو الله علي السماء

والدنيا ظار

ويا هُدهد هنا

مرت مراكب نوح محمّله بالبخور

مين اللى شال

من طاقة الطين البعيد

قنديل حبيبتى

وطّيب الجرح المثير

مين السرق من بابها مفتاحو الملون والصرير

منهوبه مقبرة الفواكه فيكى

قولى معايا يا شرف القبايل جَّر

الشاف تباريح الطلح في النار

شافنى مرقت من عندك ضرير

أنا ليه

تجينى الموية حفاينه

وأدنقر ألبسها فى شبط أخضر

وأبيت مبلول أصلح فى رباط

أنا ليه

شبابيك البيوت الواجمه

والناس البُساط

وليه يرجانى النخل فى السكه

يفتح قلبى خمّاره

وخلاوى

وبيت بكاا

تعبت من المساسقه والهتاف

يا غيمة ،أتبنى جبهة القمره

السهر والحمى طول الليل تهضرب

ويا هُدهد لقيت أمك

ترشرش فى السعف من عينها

تجبر خاطرها المكسور عليك

ينكسر خاطر السعف فى إيدها

يا هدهد قيام

من السماء الأول قيام

من السما السابع قيام

وأنزل مسافة تهبشك غنوة

وأناولك كاس

ومرّت مراكب نوح محّله بالجنود
ركعت على الموج الجنود

من كل جندى تفوح ضحيه

ودم مشتت فى الأبد

دسيت جبهتى من السجود

بكى فى مخاض الخوف ولد

إشتبهوا فينى وراء الجبل

شافونى دسيت الهدهد بالزبد

صفا

انتباه

وقعت من الهدهد بلد

نهبوها واتقسموا الحدود

ومرت مراكب نوح محمله بالطيور

واقف مع نوح الغراب

ينضم ويأشر فى إتجاه

باقى الطيور يتوسوسوا

إلإ الحمام إتوضأ مارق للصلاه

القانقرد فى حزنو يغزل شاله صوف

الطواويس شاره قمصانها المزركشه فى الضحى

الزرازير بى عراريقها المغبشة جات عليّ

أرجينى يا صالحه

ومشيت فى الموج

يا النبى نوح أصل سالم

يا النبى نوح اصل ...

حجر الدغش في المويه يقلع ضفرى

يادم

دا ما وكت الرسم واللون

جات المغارب

حننّت إيدها ومشت

سبحانك الأديتنا من حزنك فوانيس

الغراب يا نوح طفش

واليابسه وين؟ يا الله ما يبس سوى حلقى

المجرح بالدعاء

طير يا حمام

الحمام يا نوح يجامل فى السماء

وبياع مناديل خضراء فى كل العصور

أنا ما خلقتك يا ظنون

شان تبيتى الليل معاى

وتجرى من فوقى الغُطا

ما تشّري فى حبلى الوساوس

والمعانى الداكنه

الليل والشتاء

الهدهد تميمة الموت معّلق فى

بيوت الناس نعش

من خرافاتم تعال

من دياناتم تعال

نفّض نعاسك

من كل بيت من كل حجوه حكوها عنك

في الليالى البارده والأطفال نيام

مين يشترينى من الملوك

الخايده فى الدم القديم

مين اليوصف للنحل ريق الحبيبه

وحبة القمح التقوم فوق محفضة حبوبه

في الزمن اللئيم

ومرت مراكب نوح محمله بالحجيح

وين ولدك

تركتوا على الجبل

وين بلدك

ضربتها فى مثل

وين نحن

مرقت على عجل

يا نوح تخلينا

زيتونك مخلل بالشمس

نار الله والرجل الغربيه

نحن البلاد الشاكيه جرحها للصديد

جاتنا القوافل بالضجيج

جرّتنا من حلبة رقيص

ورّتناك كيف صلبوا المسيح

ورتنا كيف كتلوا الحسين

وبكينا اكتر منها

وساقتنا فى الآخر عبيد

مين يشترينى من الملوك الخايده

فى الدم القديم

مين اليوصف بيتنا لى هدهد يتيم

يا هدهدى المهدود

مين هدهدك نمت

كل الطيور غنت

منك يجينى سكوت

مين الهداك للناس

أو هدّ فيك الموت

يا أوسم الجايين ، انا قلبي حِله حنين

والشوف فتحنى بيوت

يا صالحه

لا جنبك لا فت منك فوت


أدخل ضلام الناس

نورك يجيني خيوط

قبال أقع فى الضو

جواك سندنى خفوت

أنا برضى حِلة شوق

ومرت مراكب نوح محمله بالعبيد

الجنه زى هدهد معلّق فى الكتاب

ونحن العبيد

باب الحياه السِّرى

وحرير فى فكرة الدوده الموجّعه

بالنسيج


الهدهد يرك فو قدفه المركب يدندن

الريح سكن خيمة حريمو الأربعه

البحار مكتوفة الأيدى

الشموس فاقت

ونوح يعاين فى مفاتن اليابسه

تغسل فى حصى متبرجه

سبحانك الأديتنا

من ملكك سلاطين


وأنزل مسافة توجعك غابة

رقيصنا الحى

طبولنا

وليك

شبال من اليابسه الممشطه

بالملح

وهُدهد