جنازة البحر عملت فيكم كدا..مازمبي كيف؟

محمد عبدالماجد ---------- قوووووووووووووون







• كل مرة يثبت ليّ ان مشكلة المريخ الحقيقية في (اعلامه)...وهو حقا كما

اطلق عليه رئيس المريخ (اعلام سالب).

• خلوا فريقهم (المهزوم)..وقعدوا يتحدثوا عن الفريق (المنتصر).

• اتخيلوا دي.

• فريق منتصر (جنازة بحر)...طيب الفريق المهزوم يكون شنو؟.

• يا ربي الناس ديل حضروا ليهم مباراة تانية.

• قالوا في القناة (البنغالية) كانت في مباراة منقولة بين (الكماشة والشولغ).

• الكماشة يعني في البنغالية الناس الصعبين.

• اها ناس مزمل ابوالقاسم الظاهر شاهدوا هذه المباراة وقام حصل ليهم (حول).

• زي ما قلت ليكم.

• سخن (العجب)...ودخلوا (ضفر).

• قلنا ليهم انتوا ليه عملتوا كدا ...قالوا لينا (ضفر) حالف قسم ..ما بسخن.

• بسخن (البارد ساخن) دا.. واشاروا لينا لي (فيصل العجب).

• غايتو نحن من محن الزمن..بنشوف لينا في حاجات غريبة.

• اعلام المريخ بعد أي مباراة قمة يخسر فيها فريقهم وينتصر الهلال يخرج

بعلل واهية مبررة للخسارة ..وبخففوا لاوجاعهم باقراص ومسكنات ...تسكت

الوجع ...ولا تزيله.

• بغشوا في الناس.

• وبقنعوا في (الكشافات).

• الاخ الحبيب مامون ابوشيبة الي الان مازال خصمه ومنافسه الاول هو (حكام

المباراة).

• ابوشيبة لا يرى في (الحكم) شيئا جميلا.

• ابوشيبة في أي مباراة قمة بخلى أي حاجة وبقبل على (الحكم).

• مشكلتو في الدنيا دي (الحكم).

• أي مباراة خسر فيها المريخ من الهلال بحث ابوشيبة عن (ضربة جزاء) وهمية

وقال ان الحكم لم يحستب للمريخ (ضربة جزاء).

• هكذا تكون ضربة الجزاء التى يتحدث عنها ابوشيبة ...ضربة واضحة وما فيها

أي كلام اذا كانت للمريخ.

• اما اذا كانت هناك ضربة جزاء للهلال ولم تحتسب ...ابوشيبة بشوف ليها

(مقدمات ومبررات)...موسي الزومة ما بتقنع بيها.

• انظروا ماذا قال ابوشيبة عن (ضربة الجزاء) التى ارتبكبها باسكال مع

سادومبا ولم يحتسبها الحكم.

• قال ابوشيبة ( صحيح ان احتكاك باسكال مع سادومبا في بدايات المباراة

كان يمكن للمعز ان يحتسب فيه مخالفة جزاء ولكن قبل هذا الاحتكاك تغاضي

المعز عن ثلاث مخالفات متتالية ارتكبها لاعبو الهلال قبل ان تصل الكرة

لسادومبا ..وربما خجل الحكم اذا احتسب احتكاك باسكال بالمقارنة مع

المخالفات الثلاث المتتالية من لاعبي الهلال التى تجاهلها وسبقت حالة

باسكال بلحظات).

• ابوشيبة دا بعتقد براهو كدا...وبصنف براه ...وبركب الحكاية مع بعض وفي

النهاية بكتب (الروشتة) للمريخاب.

• دعوني اعلق على كلام ابوشيبة هذا تفصيلا ..او نقطة ..نقطة.

• ابوشيبة سمى مخالفة باسكال مع سادومبا (احتكاك).

• احتكاك يا فندم.

• ادينا يا ابوشيبة من (الاحتكاك) دا كيلو ونص.

• سادومبا وباسكال ديل لو اتلاقو ..نار عديلة ...ما في أي (احتكاك).

• خلاص يا ابوشيبة بي نفس منطقك يمكن ان نقول ان لمسة علاءالدين للكورة

داخل منطقة الهلال التى حسبتها انت (ضربة جزاء)..يمكن ان نقول عن هذه

اللمسة انها (لمسة حنان).

• قول هبشة ....(لمحة)..حاجة كدا والسلام.

• معروف ان لمس اللاعب للكورة امر تحت تقدير حكم المباراة ..هو وحده

يمكنه ان يحدد هذه اللمسة متعمدة ام غير متعمدة ...لكن (الاحتكاك) الذي

اعترفت به انت وقلت يمكن ان يكون ضربة جزاء ما فيه (تقدير).

• ضربة جزاء ...ضربة جزاء.

• احتكاك وإلا زكي جمعة.

• اول مرة اشوف لي (احتكاك) حنين كدا.

• ابوشيبة ما فاضل ليه إلا يقول عن (سادومبا) بين الزهور متصور.

• مرة كنا قاعدين بنحضر لينا في (مطرة).

• في زول بحضر ليه مطرة ...نحن (الشفوت) بنحضرها.

• المطرة عندنا زي الفيلم الاجنبي.

• فجأة كدا جات (ضربة جزاء) ماشي فينا.

• في واحد مننا ...قال انا ضربة الجزاء دي شفتها وين؟.

• نط واحد تاني قال ليه تكون شفتها في مباراة المريخ والزهرة في الدوري

المحلي سنة 1973.

• الشيء الطريف ان ابوشيبة برر عدم احتساب (احتكاك) باسكال مع سادومبا

بان الحكم (فوت) ثلاث مخالفات لصالح المريخ ..عشان كدا الحكم (خجل).

• كويس معاكم يا ابوشيبة ..جات معاكم باسطة تلات مخالفات بي (ضربة جزاء).

• نحن لو لقينا النظرية دي نغلبكم عشر.

• بعدين تعال هنا ..شنو قصة (الخجل) الظهرت لينا من الحكم دا.

• اول مرة اشوف لي حكم عندو (صلعة)..وبخجل كمان.

• جابت ليها (خجل) كمان.

• يا ابوشيبة بنفس المنطق ...ممكن نقول ليك المعز خجل يحسب (ضربة جزاء)

وهمية للمريخ ...عشان (فوت) ضربة جزاء اوضح من (الشمس) للهلال.

• وإلا الحكم دا (بخجل) بس من ناس المريخ.

• صدق يا ابوشيبة ...نحن الحكم معانا عينو قوية ...ما بخجل.

• بطرد من طرف.

• يا ربي انا قلت حاجة غلط.

• ابوشيبة يوم ما يلقى ليه (حالة) يتشبث بيها ويقول ان الحكم لم يحتسب

ضربة جزاء للمريخ برجع للتاريخ (16) سنة ..وبقول عندنا ضربة جزاء ما

احتسبها لينا الحكم سنة 1996 م ..يوم ان ارتكب احمد النور مخالفة مع

عبدالمجيد جعفر.

• طبعا لو جبت عبدالمجيد هسه بنكر الكلام دا.

• يا ابوشيبة تصدق نحن عندنا (كورة رايحة).

• رايحة عديل كدا.

• عندنا ضربة جزاء ما نفذناها.

• احتسبها لينا الحكم.

• لكن ما نفذت.

• عارف ليه؟.

• عشان (زيكو) شال الكورة وطلع.

• انتوا ليه بتنسوا الحاجات دي.

• لكن ما مشكلة.

• اقترح على حكم مباراة القمة القادمة اول حاجة يعملها شنو؟.

• اول حاجة يعملها يصفر ضربة جزاء لصالح المريخ.

• في شنو؟.

• في المخالفة التى ارتكبها احمد النور مع عبدالمجيد جعفر.

• عشان نحن نرتاح في الدنيا دي.

• ناس المريخ ديل ...ما بعرفوا (يهاجموا) زول غير الحكم.

• مزمل ابوالقاسم هو ذاتو بقى زي ابوشيبة.

• عارفين مزمل قال شنو؟.

• مزمل قال الحكم دا مرة ظلمنا قدام الموردة قبل اربع سنوات.

• شوفوا الهواجس دي.

• الدخل الموردة هنا شنو؟.

• والله يا مزمل لو احتجبتوا امس (لظروف فنية)...كان احسن ليكم من الكلام

البتكتبوا فيه دا.

• ناس اكرم ديل بصدقو.

• وما بعيد يطلبوا حافز المباراة من جمال الوالي.

• ممكن دا يحصل ما دام في اعلام بقول ليهم نحن عندنا كورتين ضربت في القايم.

• لو بقن تلات كور ضربن في القايم ..بنحسب ليكم التلات ضربات ..(هدف).

• يلا ان شاءالله حد ما حوش.

• انتوا حكاية (ضربت في القايم) دي مفروض ما تجيبوها.

• عارفين ليه؟.

• عشان وقت الكورة ضربت في القايم ...المعز جدع الكورة لي مهند ...ومهند

جدع الكورة لي سادومبا ...وسادومبا لي بشة ..وبشة جابها في الشبكة.

• هدف يدرس عديل.

• بكرة عندنا حصة عن الهدف دا.

• القون بدخل عديل بي تلات لمسات ...تقولوا لي (القايم).

• خلاص هاجموا (القايم).

• ما بعيد مباراة القمة القادمة زي (مرجان احمد مرجان) يمشوا يحفزوا (القايم).

• كلتشي يواجه المرمى ..ويشوت في (الكشافات)..ويهاجموا ليك في (الحكم).

• الحكم ذنبو شنو؟.

• الحكم قال ليه (شوت) في الكشافات.

• كلتشي دا بقى يشوت في (الكشافات)...الظاهر كدا شايف ليه (شوفة).

• يكون وقع مع هلال بورتسودان.

• عشان كدا بقى يشوت في (الكشافات).

• كلتشي دا اسألونا منو نحن ..بنعرفو كويس.

• من يشوت في (الكشافات) معناتو ماشي فريق تاني.

• وسكواها.

• سكواها المرمى قدامو فاضي ...شات في القايم.

• الحكم يعمل ليك شنو؟.

• ضربة جزاء اوضح من الشمس للهلال ما احتسبها.

• كاريكا بدون سبب منحه الكرت الاحمر.

• واكرم والشغيل تقول في (هجليج).

• شغالين (فرم) ...ما في زول قال ليهم حاجة.

• وبعد دا كلو كمان بتشكوا.

• حاسبوا (بلة جابر) قبض حافز التأهل لدور الـ (16) فى البطولة الافريقية

3 الف دولار ..وعمل فيها مصاب.

• ساعة (الحافز) كان زي الطلقة.

• وقت جينا لي مباراة الهلال ...بلة جابر طلع (مصاب).

• بلة جابر دا زي نجم الدين ...عاوز يتخارج ساكت.

• يقبضوا في (الدولارات) وبتغلبوا عادي في الميدان.

• ومن جنازة البحر كمان.

• 16 انتصار للهلال في الممتاز مقابل 4 انتصارات للمريخ.

• وبرضو بهاجموا في (التحكيم).

• باسكال مطبق ايدهو تقول سايق ليه (ركشة)...زول قال ليه حاجة مافي.

• ريكاردو ذاتو لعب باسلوب غريب ...ساعد الهلال على الانتصار ...وسهل من

مهمة الازرق.

• ريكاردو دا وقت كان في الهلال ما كان كدا.

• كان عندو فكر.

• ريكاردو وقت كان في الهلال ..المباراة كلها بكون واقف على الخط.

• هسع الموضوع بقى ما شغال بيه كتير.

• يكون اكتفى بحافز التأهل الافريقي.

• قالوا الهلال (جنازة بحر).

• المريخ يكون شنو؟.

• لا احسب ان هناك (جنازة بحر) يمكن ان تنتصر على فريق كبير ...حتى لو

كان جنازة البحر دي معاها (105) حكم.

• نحن خلونا.

• جنازة بحر وانتصرنا على (الزعيم).

• مازمبي كيف؟.

• اذا كان جنازة البحر بتعمل فيكم كدا ...ورونا (مازمبي) بعمل فيكم شنو؟.

• والله بفريقكم الما (جنازة بحر) دا تاخدو تسعة من مازمبي.

• كان يمكن ان يستفيد المريخ من الخسارة من الهلال ويراجع حساباته قبل

مباراة مازمبي.

• لكن الواضح ان المريخ سوف يزيد سوءا.

• نعم المريخ سوف يكون اسوأ في مباراة مازمبي ..لأن اعلام المريخ حاول

وعمل على اخفاء عيوب المريخ ومشاكله.

• اعتبر ان انتصار الهلال كان بسبب (الحكام) وان ريكاردو وباسكال وموسي

الزومة ما عندهم أي مشكلة.

• المشكلة في (القوايم والحكام).

• ناس اكرم ما عندهم أي مشكلة.

• عشان كدا من الان انا بتوقع هزيمة كبيرة للمريخ من مازمبي.

• بس بعدين اوعكم تجوا وتقولوا لينا مازمبي (جنازة بحر).

• اصلو نحن حفظناكم حفظ.

• كورتكم بقت زي (كسرة الفتريتة).

• وبرضو عاملين لينا بيها (سافوتة).

• يا مزمل اقول ليك حاجة.

• الايامات دي اعصر على اهلي شندي..(المريخ) خليه لي ناس ابوشيبة.

• مالك ومال (جنازة البحر).

• ناس ابوشيبة بتصرفو.

• بشوفوا ليهم (ضربة جزاء) سنة 1981 يكتبوا عنها.

• اها يا مزمل قصرت معاك.

• الاهلي لاعب مع منو المباراة القادمة؟.

• يا زول درب السلامة للحول قريب.

• اخير ليك اتخارج من بدري زي (نجم الدين).

• ولو الامور اتصلحت تعال راجع للمريخ سنة 2019م.

• يمكن وقتها المريخ يتصلح ..ويقدر ينتصر على (جنازة بحر).

• ملحوظة : الاهلي والله كورتو ما كعبة.

هوامش

• عاوز اسأل سؤال محرج شوية.

• انتوا فيصل موسي وين؟.

• في مباراة القمة لما فيصل العجب قام يسخن ..اتوقعت يدخل (ضفر).

• اكرم قالوا نجيلة الهلال (طعمها) اتغير.

• يا اكرم نجيلة الهلال هينة.

• قالوا ليك ناس مازمبي ديل عندهم جنس (نجيلة).

• نجيلتهم زي (الشعيرية).

• باسكال في مباراة القمة واضح انو ما صبغ شعرو كويس.

• الكلام دا كان واضح في كورتو.

• يا باسكال والله انت مفروض تجي تقعد مع ناس كمال حامد في الاستديو.

• عشان تحلل على راحتك.

• المباراة كلها تتكلم.

• انا ما عارف ناس موسى الزومة ديل بستحملوك كيف؟.

• غارزيتو لعب مباراة القمة بتكتيك عالي.

• غارزيتو عارف نفسو بعمل في شنو؟.

• الهلال مباراة القادمة مع فريق الخرطوم ..والمباراة بالتأكيد ما ساهلة.

• خاصة في ظل غياب كاريكا وبشة.

• لكن عودة اتوبونج وتوريه يمكن ان تعوض الفرق.

• الهلال مازال يفتقد لقائده هيثم مصطفى حفظه الله ورعاه.

• البرنس لو كان لاعب ...المباراة كان بتكون بطعم اخر.

• الفرق بقى 4 نقاط.

• والظاهر كدا ...الموسم دا الفرق ان شاءالله ح يكون 18 نقطة.

• الهلال وقت يتقدم تاني ما برجع.

• المريخ لعب شوط كامل غلبو يدرك التعادل.

• بل ان الهلال لعب ناقص لاعب ...والمريخ برضو غلبو يعادل.

• نعمل ليكم شنو تاني.

• بالمناسبة في مباراة القمة لعب في المريخ 5 محترفين ..مقابل محترفين في الهلال.

• وبرضو يقولوا ليك (بطيخة مقفولة).

• هسع البطيخة المقفولة الدخلها هنا شنو؟.

• جماهير الهلال في التلفزيون اتفألت بالاستاذ كمال حامد.

• كمال حامد مع الهلالاب مية المية.

• باسكال قالوا قال عاوز ليه (اذن).

• قال عاوز يسافر.

• عارفين ليه؟.

• عشان مازمبي.

• الموضوع واضح.

• نجم الدين في مباراة القمة كانت معنوياتو فوق ...حتى عندما خرج سادومبا سلم عليه.

• عارفين ليه؟.

• عشان ما لاعب مباراة مازمبي.

• الهم شايلو الباشا.

• انت يا نجم الدين وقت زول اخلاقك عالية كدا ..وبتسلم على سادومبا

...مالك كفت لاعب بلانيتيوم (بونية).

• جمال الوالي قالوا ح يحفز لاعبي المريخ بنص القيمة.

• عشان المريخ اتغلب واحد بس.

• مفروض تكرموا.

• يا جماعة تعالوا هنا.

• ناس المريخ ديل بدأوا في الاستعداد لي سيكافا وإلا لسع.

• مفروض جمال الوالي يكون بدأ اتصالاته بالاندية المشاركة.

• غارزيتو شكلو بالحسابات الدقيقة التي يلعب بها ...ح يجيب لينا بطولة.

• لأن الاسلوب الذي يلعب به غارزيتو اسلوب بطولات.

• صالح الامين كان حقا النجم الاول في المباراة.

• وتألق ايضا عبداللطيف بويا.

• وعاد مساوي الي قمة مستواه.

• وكانت كل الكرات العكسية في حيازة دفاع الهلال.

• دفاع الهلال احسن التعامل مع الكورات العكسية.

• يا ديمبا شكرا ليك.

• كتر خيرك ...تاني (كنبة) ما عندنا ليك.

• لا والله.

• بنحتاج لي ديمبا امام الشلف ..عشان ميساوي ح يكون غايب.

• كما ان ديمبا بعرف الاسلوب الجزائري.

• نقيف هنا.

• عشان الايام القادمة عندنا ان شاءالله تغطية خاصة لمباراة القمة.

• ح نمشى خطوة ...خطوة.

• بس اصبروا لينا انتوا ما تضيقوا.

• نحن أي حاجة عندنا بي نظام.

• عاجل : يا حليل حسام البدري.