المغربية زوجة السودانى و كفيلها العتيبى - تلك اول الحكايات

اخوتى الرائعين :
لكم منى كل الحب الود و الشكر اجزله على الثقة الغالية التى اوليتمونى اياها بمنحكم لى هذه المساحة و التى ساعكس عبرها حكاوى الغربة و طرائفها بل مآسيها الحقيقية التى يدركها كل من عرك هذه التراجيديا , اعدكم بان تكون كل هذه الطرائف حقيقية و ليست من وحى الخيال .
كما اعتذر عن عدم دخولى اليوم الموقع مبكرا و ذلك لانشغالى فى مطار جدة من الساعة الثالثة صباحا و حتى الرابعة عصرا من يوم الاربعاء 4 نوفمبر للمشاركة فى استقبال زوجة زميلنا الاتية من المغرب و لاول مرة للاقامة مع زوجها الذى اشترى لها فيزا بمهنة عاملة منزلية بتكلفة فاقت ال 20 الف ريال لعدم تمكنه من استقدامها بتاشيرة زوجة , و الفيلم الهندى الذى طبقه علينا كفيلها البدوى العتيبى بتمسكه بالبنت للعمل معه بعد قبضه الثمن و الدرس البليغ الذى لغناه له كسودانيين اصحاب حق حتى اشاد بنا كل عسكر المطار الذى تعاطفوا مع قضيتنا. وحتى يزداد شوقكم للمآساة ساحكى لكم هذه القصة الحقيقية بحذافيرها و انتم موعودون بسرد مشوق ممتع حين يسمح لنا الوقت القريب و الملىء اصلا بالمتاعب و المشغوليات فافتحوا آذانكم عند الموعد.
كما لا يفوتنى ان ابلغ سلامى الحار الى زميلى فى بنك الغرب الاسلامى سابقا - الاستثمار ياسر مصطفى اورتشى الذى كان لى اخر لقاء به حين سفره الى ايطاليا لدراسة ماجستير البنوك قبل عقد و نيف من الزمان و اظنه نسانى.
اخوتى لكم حبى واخلاصى
حبيبكم
محمد عيسى

افو.... أفو..... أسرع أدينا قصة الزول الحقار دا وكان دايرين مساعده فى رد الاعتبار أدونا خبر..... أما انو بدوى قليل أدب.
ول نويه عندو سكين أصليه خلى يشرطو ليكم.
.................................................. عشت محمد (عيثى) ابراهيم

صباح الخير اخ حسبو
الله يحلكم من البدي الجلف ده ديل الاقحاح
كان احتجتو لمساعة زي ما قال اخوي عوض السيد . نحن جاهذين وامين منقة بينكم وبينو الا البحر

صبحك الله بالخير اخي محمد وحقيقة شوقتنا للقصة العجيبة دي ومنتظرين بعد الفاصل واكيد حتواصل

يا ود أخوي عيسي أتا قايل نحن عندنا صبرا يبل الأبري ... ده شمار تقيل .. قبل ما أعرف القصة داير أقطع تذكرة وأجي أشوف القصة دي .. الزول ده داير كسر .... عليك الله قّوام أنا الليلة ما شغال لكن الموضوع شكلوا حيشغلني شديد.

حقيقة ماساة يعيشها الاخوة السودانين في دول المهجر اتمني ان يعم بلدنا الخير ويعود كل بلبل مغرد الي وكره من هذه الماساة
شكرا اخي ولا عمي ماعارف ان كنت مخطئ او صائب في هذه العبارة عموما مشكور كتير علي السرد الجميل ونتمني لك التوفيق في المنتدي الجديد
تحياتي لك