نم الروح / الي اصدقائي عاصم الحزين والراحل هيثم هاشم

نم الروح

بريدكي
أبنردي يوماتي
عطشان هواي
مخلايتي في يدّي
رهيد ألمي القلب صافي
قدّامكي شاقي التربه
لوليت النضم
فتّحت زهرة فمّي
ناديتك
ايا بنيّه قاصد أوريكي دمي
شوفيني بالعين المسودن رمشها
عصب الغنا الدافي
رقيص الرقبه
لون القرمصيص
أحمر
عروس في الميس
وحكّامة العيال
الهودنه
دهن السمن
والدندنه
هجعة بديريه
رحّاله ضربو الجو صعيد
دار بقر الجنوب
زرقا .. لا صغرا لا بيضا
بتشبه دقّة القلب البدائيه
وكت الحبيب يظهر لودّ العين
يبشّر ليك بي اصبع حنانا
وينتبه
فجأه ... ويفوت
وتموت عصاك
سنّادة الروح والجروح
تقع البيوت
يملاك غبارها وتشتهيك
لو زغرتن ليك الصبايا
حنّسوك
يا زول تعال .. يا زول تعال
قنّب معانا ما تهم
ننطيك هدم شوفنا السمح
شارنو في حبل احتمالك للبلد
غلبا التسويهو مع ام جركم
بتاكل في النفس درتين
ويااا ساتر عليك
ما النيّه كان مافي
صلاة العشق في درب القلب قاسي
اوعاك ما بتقدر تقيف راسي
لو شلت طول الليل جبل حمّاك
تخين الاسئله
هل ممكن الحب ينفطم ؟؟
او ممكن العين التعاين ديمه للجب
ما تقع تكسر ضهر لمّتنا؟
يااااااا فرقتنا
بس ليه الدواس
من اجل ترتيب المزاج في الراس
كما لو كنّا وحدنا في الارض
ما انحنا وسط الناس
بنعرف كم مقاس الحلم
او نعرف نفلّق ظلم حرّاس النوايا
حين ابو يدّونا حقّنا
في الغلط والصاح
و حقّنا في الكلام والتجربه والشوره
بيت الشوره ما بيخرب
اذا اتلمينا فلّينا من الجتّه
عضام الحسكنيت
و يا سوّاح ترا
اني بقدل في مهلتي
بفكّر في حبيبتي
وبتزكّر مصيبتي بلدي
واحد تاكي شملة ديوانا رحل
وواحد محل ما قبّل ضهب
ولي شدرة نعاسا فتل
وواحد فرح بي حق غيرا
نهرني ما تعاين لي كدا
حقّار
وفي كتفا الدبابير لامعه
ضوّت حرمة الدين للقنيص جوّه القلب
وطفاها بالطنّيش وورنشها الحرب
وواحد قال
سياسه سياسه سياسه
والسوس ينخر في ساسا
وقع فوقو السقف انطقّ في راسا
صابا العيا في مخيخ ثقافتا فطس
ما قلنا زمان يا ولد
وعيك بي عمق المسافه
البين الكتب
والواقع الشعبي
لفهم العام والخاص والذات والمخافه
بعني فيك الفراسه
ووحد حرن
قال البلد يا شيل تقاليدها وسمّحها
يا امش خلّيها
مسك الفهم نضّف كريعاتا
وجاب بت الحداثه فرك لها اللايوق
ودلّكها بزيت النيل
غرف من الشعر جردل حكي
قيّل معاهو في الضرا
ماركس
آرثر رامبو .. ود ضحويّه .. درويش
الخليل .. حمّيد .. هيجل
ابوي .. امّي .. اخوي
كوندير ا
واثينقو
وسنغور الحريف
والزنوجه .. والعربنه .. والاوربه .. والامركه
كاثرين اوبيانوجو
اوشلونو
زولو موليفي
شنويزو
شنوا شيبي
والاصدقاء
الاصدقاء من دردقوا من فوق هضاب الحب
فواكه للمقيل والاحترام
والالتزام بالشارع الهوزز
شراع عري الجسد
قال ياااااا مدد
عري التفاصيل الانيقه بين بنيتو والوليد
قال ياااااا مدد
عري القصايد منّنا
قال ياااااا مدد
يا ها المقيل
والحيل قبيل طرّن شبابيك الهوا الانساني
من كل فج
يخش الدم فناجرة القلم
من سنّنوا للعالمين الضو
سمين يا ها العلم
فيك العلم
بترف زمن .. ويرف حوليك الضلام
وسمينه حجوة قلبي
لمّاهم علي
انطاهم الشاهي المهبهن بالحبيبه
انطاهم المويه
فرش للدم بساط الكيف ونام
حلم بالعولمه والدوله والدين والفقر
والهولمه
والراحه والفكر التمام والكولمه
وصحي علي حسّ الصراخ
فلّاو فزع جلبو خبر
قالو العوين صرّن قلوبهن في الشدر
بلّنو بالشبال شعر عاطفة نهاراتهن صفّقن
ودّكنهو بالمحلب الريحان
دهن كركار وفاح التربلول
عطراً بشيش ينشمّ في آخر الضفيره
التوب وقع
كوراك رجال الحي لمع
نغمة شج
فرح الكرير
جرّاري
جر النم
مغازله واحترام
ياكم تراهن كلّهن متفردات
و يغالطن انفك
يشم تم تم
يشن عرقن ينقّط جوّ بيت الدم
وهن
ما برّدن فيك الحماسه
وفتّرن دلّوكة الربّه المكردف جلدها
يطّارين زي الفراشه
حين يكح الشوق اليهن
والجسم يتنّي
اباله ونجاض
يا سرعتن
خقّة مضايرة العري
عري البسيمات من زعل جوّه النهيد اندسّ
براقات سنونهن
والجسم يتنّي
ما بتهبش رجولهن رملتن
يتنّي
رقّاصات يمسكن فركتن
و قميصهن الحزّامه ام جلباب
رموا تيراب ايدينهن حنّه
ما اتمحنو بالهم
وفي الواطه
زوادة الذاد عشق مكوي بقضّيم الخدود
وفي الليل النجوم تسرح بدوباي النعيز
تعاين للتريا
وفي البال المرا
عشقك فوق معلّق
وفي الترا في محلّك
سعنك مويتا شويّه في شان كدا جلباغ
ابراك وكفاك
شيل برتالو جيتك
تعرف لون غناك
حين درّابا ينزل
بتّابها يفز
وريتك في المقايل يبقي ليها عز
يا الاجواد كريم
طلعك ما لفيف
وحسّك ماها زيف
وسواسك وحيدك ديما ما لطيف
ابعد منّو طب
ما الخازوك ركب
الّا الانتباهه والجري في فضاها
يوم ببقالا طب
ما الدنيا ام سأوريك
طول ما انت حي
فوق مرّت توديك
وتجت الانهزام بالاحزان تغطّيك
يا كتلاك غبن يا الحكمه تورّيك
أي والام تضاريك
من شوكة العويش يوم الناس تعاديك
ويا مشكاش ويا مشكاش
تعال نتلم
ولم زيفاً معطّن في الهدم
ما الويكه رتّبت الجسم
ضوّاي مكرّب بالفهم
غنّاي جبد طايوق حنينا قال
ولد امّي جنبي
رقد حفيان
يغمّز في عويناتا
راجي البلد ينمدّ جوّه الجوف خريف
هوي يالرديف
كوستي
دواس من اجل كاس نيل
مستحمّي بالطمي
رقّاص عرض وانهزّ راس الاندهاش
نشربهو نسكر بالرزق واسع حلال
حلّال
ابيّض واحتفال
هيثم:
صديقي مشتهيك
كيفك
هناك الازمنه كيفنّها
كل الشباب في منتهي حبّك بكو
يوم انطفي صافي حضورك قي رصيف الاسئله
تجدع سؤال بلدك يصفّق احترام
تجدع اجابتك
ينتبه ريق الجداول بالنشاف الركّ
في حلق المسافه
يا صديق فاقدك
وليل غربتنا يوماتي بتاتي جوّه بينات الوريد
الموت فضح فينا السكات
الموت لبد
وصحيت مشيت وحدك
وتاكيت القصايد جنب قهوة عرفتك
كوركت ما تنسو مزاج الارض
حريّه
وحريّتنا ان نعرف تماماً
كيف نفرّق بين وجع عمّالي
نتّاح في الضهاري
والنبيح الرأسمالي
مشتهيك انا والشعر في الروح قنع
لابسو مقدّد بالحزن
خرطومي مستنّيك علي حافة بهار ثوري
هتف
مسكين رهد حيلنا
ضامّيك بين جدل البلد
والام
تخج روّاب مساءات الحنين
زيّك ولد سكنا
فقرا ولا هامينا
ما الشدر ان مال بتّكي في اخيّو
والوجع ان طال سعي الصدق بي كيّو
وبرضو بريدكي
ابنردي يوماتي
عطشان هواي
مخلايتي في يدّي
رهيد ألمي القلب صافي .

هيثم:
صديقي مشتهيك
كيفك
هناك الازمنه كيفنّها
كل الشباب في منتهي حبّك بكو
يوم انطفي صافي حضورك قي رصيف الاسئله
تجدع سؤال بلدك يصفّق احترام
تجدع اجابتك
ينتبه ريق الجداول بالنشاف الركّ
في حلق المسافه
يا صديق فاقدك
وليل غربتنا يوماتي بتاتي جوّه بينات الوريد
الموت فضح فينا السكات
الموت لبد
وصحيت مشيت وحدك
وتاكيت القصايد جنب قهوة عرفتك
كوركت ما تنسو مزاج الارض
حريّه
وحريّتنا ان نعرف تماماً
كيف نفرّق بين وجع عمّالي
نتّاح في الضهاري
والنبيح الرأسمالي
مشتهيك انا والشعر في الروح قنع
لابسو مقدّد بالحزن
خرطومي مستنّيك علي حافة بهار ثوري
هتف
مسكين رهد حيلنا
ضامّيك بين جدل البلد
والام
تخج روّاب مساءات الحنين
زيّك ولد سكنا
فقرا ولا هامينا
ما الشدر ان مال بتّكي في اخيّو
والوجع ان طال سعي الصدق بي كيّو
وبرضو بريدكي
ابنردي يوماتي
عطشان هواي
مخلايتي في يدّي
رهيد ألمي القلب صافي

وكأن يومك في فجيعته * هو أول الأيام في الشجن

وكأنما الباكي بدمعته * ما ذاق قبلك لوعة الحزن !