الدولة والركشة وموية الفول ضد سعادة الانسان السوداني !!!!

الدولة والركشة وموية الفول ضد سعادة الانسان السوداني

الدولة والركشة وموية الفول ضد سعادة الانسان السوداني
استيلا قايتانو

في دراسة بثتها احدى القنوات كانت الدراسة تتحدث عن اسباب سعادة الفرد وربطت سعادة الفرد بسبعة أشياء أنا اختصرها بلغة العساكر بان اهم سبعة اشياء في سعادة الانسان هي خمسة التغذية السليمة (يتمثل في الغذاء الصحي) والرياضة وهدوء البال وهذا الثلاثي يؤدون الى الاربعة الباقية وهو النوم سبعة ساعات على الاقل وتاني البسهرك شنو اذا كان بالك هادي. والحب والمقدرة على المحبة والاحساس بحب الاخر ودي طبعاً يتوفر بتوفر

الاكتفاء من الاشياء الضرورية والاساسية والاحساس بانو مافي زول ذاريك ويهدد استقرار جيبك المادي والكل مبسوط منك لانو قادر نوفر التزاماتك ناحيتهم ومبسوط من روحك لانك قايم بواجباتك تمام بدون ما تحس بانو الحاجات فوق طاقتك.

الثلاثة الفوق في العنوان ديل مهددات رئيسية لسعادة الانسان السوداني الدولة القاعدة مركلسة ونحن بنصرف عليها هو نحن قادرين نصرف على رقبتنا وبعد دا كلو نقناقة وكلامها كتير ومشكلا اكثر من صوف راس كل السودانيين حتى المصلعين منهم ده غير نكد الشريكين الليلة اتصالحو وبكرة اطلقوا وجهجة قلب الطلقوها لا يصيب سواء الانسان السوداني المسكين الذي يفكر من يوم بكرة وياربي حيكون كيف!

ثانياً الركشة غير ازعاجها طررررر النهار كلو خلت الناس ما تتمشي وتمارس الرياضة المشي البقوموا بيها كل السودانيين ساي بعفو الخاطر لانو المشوار الكان بسيط وبتمشي بقت الركشة تقوم بدور التوصيل زمان ما كنتو بتمشو المشاوير دي اهو منها رياضة وتواصل اجتماعي لانو المشيوير دا تلاقي كم واحد نسلم عليهو ونسأل من احوالوا لكن الركشات دي جات وادتها الاحساس ببعد المسافات وراكمت الشحوم وزادت الكلوسترول في الدم بالذات اخواتنا ناس بري والله بعيدين ياود جيب ركشة او يضربوا لبتاع الركشة الزبون المعتمد يا اخونا امشوا المشي مفيد مادام مافي رياضية بتمارسوها والفين الركشة دي بالقديمة طبعاً اشتري بيها خضار وفواكه لأنها بتمنع السرطان يعني تشيلي برتكانة تقشريها وانتي ماشة افضل لصحتك الف مرة من الازعاج وضياع القريشات.

موية الفول نوع واحد للغذاء وجبة واحدة في اليوم ليس صحي باي حال من الاحوال اذن يدخل بجدارة الى مثلث عدم سعادة الانسان السوداني .

وبعد عدم الحاجات دي كلها نتمنى السعادة والصحة للجميع.

أجراس الحرية

طبعا قالو هسه أغنى اتنين فى السودان هم بتاع الركشه وعسكرى المرور.....الكلام دا صحى يا ابن عمى