السفر في الخريف ... من أو إلى أبوجبيهه

وما تاخد بت اللفيف
يا اخي مرينا بلحظات حرجة في السفر لكن غير موثقة
بعدين يا الفاتح الترتل ده هو جارّي ولا جارنو؟

بالجد لفته رائعة منك ...والله سفر الخريف بمناطقنا متعب جداً جداً... وتعرف من يتعذب فيه كثيراً المساعد ...مساعد اللوري الصبور ...والذي يتميع باخلاق عاليه ويعمل بكل جد وإخلاص ..ولا حتي يطلب من أحد ان يمد له يد المساعده ... إلا إذا كانت المبادرة من المسافر نفسه فالمساعد لا يرفض مساعدته له ... والله العظيم انا من داخل اعماقي بحترم جميع أخواني المساعدية المخلصين الأوفياء ...ولاننسي ابداً طرائفهم البديعة ... وعبارات بمنتهي الذكاء ... والواحد يقول ليك : يا عمك تجيب لينا هوي ...وكادوك ...ورتينزا..للحجاب ... وبعدين بتعرف حاجه ...وشئ طريف ... هم بالجد إخوة لطفاء ظرفاء فلهم التحية ...وأسأل الله ان يمتد الظلط الدائري وحتي تقل المعاناة .... محبتي ..

يا ابو علياء كيفك
المساعدين كتار تقصد مساعد الحلة ولا مساعد الياي ولا كبير المساعدين ولا مساعد الرئيس ؟

الفاتح ارجع للخاص

انا راجل مسكين ...عاوز تضيعني ...انا بقصد مساعد الحلة ... وإنت الله يجازي محنك يا طارررق مشيت بعيد ...عاوز تسقط حجري ... ولك تحياتي دائماً ايها المتألق ... محبتي ...

سفر الخريف بأمجليلى ام الفارقو ولا لورى شاحن قرع

حبيبنا ابو عليا شنو يعني كتل ملف ومسحت مساهمتك
انا كنت داير اعرف يا تو مساعد
اسمع كلامي البسقط حجرك لسع ما ولدوه نحن قاعدين
يمين الابرشك بموية نرشو بدم
لك ودي يا انيق

يكفيكم فخراً أن كليكما أصبحتم لنا كالماء والهواء ...شكراً طارق ...شكراً غريق ... ولكم حبي ...

صباح الخير يا ابوعفراء.
حدّد لو سمحت.
الماء المقطر ولا الماء العذب.
انت شكلك عايز تسقّط حجرك براك

طبعاً يا عوض الماء المقطر العذب ... وعارفك عاوز توديني مدني !!!؟؟؟ واخرم بيك شوية : بتتذكر يا عوض برد المطر ؟؟؟ وطبعاً مع زنك حلة الممرضين صوته عجيب ...والله يا عوض كنا نتخاطفه ونحن نقف على عتبة الباب تحسباً لتساقطه وإلتقاطه بصورة سريعة جداً,لكنه سرعان ما يذوب في الفم، وسبب السرعة الخوف من صوت المطر ... لأن الأهل وبالخبرة حذرونا من الصواعق.... والحمدلله لبراءتنا جاااات سليمة ...وكان الثلج بالحباك في بيوت محسوبة بالأصابع ...صدقتي كنا نضحك بفرحة غامرة حينما نمسك بقطعة ثلج فرحة بالحصول عليها ...وفرحة ببرودتها ...وصدقني كانت أيام جميلة وياليتها تعود .... محبتي ...

بتتذكر يا عوض برد المطر ؟؟؟ وطبعاً مع زنك حلة الممرضين صوته عجيب ...


هل تصدق يا ابو علياء بالليل كأنو حبة فاليوم.... كنا تستمتع بالنوم من أثر (الطقطقه) على الزنك.

طق... طرق....طقطقطقطقطقطقطققطقطقط...طرق....طق

انتهت المطره وقمنا الصباح لبسنا الكبك

طق... طرق....طقطقطقطقطقطقطققطقطقط...طرق....طق

انتهت المطره وقمنا الصباح لبسنا الكبك

وبد داك مشيتو ين؟

الماء العذب من طبيعته الجريان في عيون او انهار والراكد منه يتعفن ولا يعد صالحا حتى يعاج بواسطة تقطير
ربنا حفظ المياة في المحيطات بتركيز الملوحة فيها كي لا تتعفن لان تخزينها لمليارات السنين ثم تتم تحليتها بواسطة التبخر ثم تنزل علينا ماءا عذبا سلس
يا ابن عمي ابو علياء بيقصد ماء صالح للشرب وليسى ماء ثقيل

الاخ الفاتح ..لك التحية ...والشكر علي الموضوع الحي الجميل ...الجماعة ديل كابين الزوغة..من الموضوع عملوها ...طق ...طرق..التقول شغالين يطقوا في صمغ في اليوي...
والله ماأجمل السفر في الخريف ...لنا مواقف ..كتيره...واول مره اسمع للفنان مبارك حسن بركات في رحله من ابوجبيهه الي الخرطوم ..في عام 1986..عبر العباسية بطريق كرمل ...قضينا سبعة ايام من العباسية الي كوستي ...اتزكر من المناطق ..تب الزراف ..وتجور (حلة ابوزيتونه)والدبادب...
من وقتها عشقت الرائع المبدع مبارك حسن بركات ...حفظت جميع اغانية ...وروائعة ...
واطرف موقف لي مع الخريف كان عام 2005...المطر عينك عينك ...حرمني من حضور حفلة زواجي ...تصدق ...وهو موضوع طويل ...وشيق ...
ودمت...

الخريف جاء ياجماعة يلا اتزكروا الايام الجميلة ...والحلوة...
وبعد شوية حاجات الدرت بتطلع ...

للأسف السفر في الخريف عندي مرتبط بذكري عير طيبة
عندما امتحنت الشهادة لاول مرة قررت الدراسة وعدم الاعادة مرة اخري وسافرت مع الوالد في لوري مشحون بطيخ وقد أخذ التحرك من ابوجبيهه "لِأرميّأٌو" يوما كاملاً وليلة كانت من اسوأ الليالي في حياتي ولم اذق طعم أكل او حتي ماء!لاسباب احتفظ بها لنفسي وكان اليوم خميس . وعندما اشرقت شمس الصباح انتظرت حتي صلوا الجمعة ثم تحركنا وكان يوماً كسابقة لا ماء شربت ولا طعام اكلت...
وجدت والدي يتحدث مع صاحب الشحنة" الطماع" ولكنه لم يرق له حديث والدي عن ان العربه بها ركاب وهذا العدد من جوالات الليمون لا مكان له..قال والدي :"انا ما حاسدك بس خايف عليك!" لم يعر ابي إلتفاته وتحركنا وبعد 5 دقائق فقط كنا في الارض واغمي عليّ ولم ادري اين انا إلا بعد مده ليست بالقصيرة وما ن افقت من غيبوبتي حتي تذكرت ابي - اطال الله في عمره- وهو يجلس في الجانب الذي اصبح ينام كٌليه علي الارضِ وصرخت صرخة ارتجت لها الجبال وخفت كما لم اخف من قبل وظن ابي اني قد اصابتني جنة.
وسارعت بالقول اني بخير هل انت بخير ؟
وحملني ابي كالطفل الي مكان قصي حتي لا اري الذين ماتو في الحادثة او اصيبوا بجروح.
حمل علي ما اذكر صفيحة واجلسني عليها.
لم اري ولكني سمعت الانات والصرخات..صوت سيدة اجتمع الجميع لتهدئتها وهي تصرخ "بنتي ...بنتي" لاحقاً علمت انها انجبتها بعد6 سنوات انتظار!
نواصل

لا لا يا اخوانا رجعتونا كتيييييييييير خلاص ...ازكر اخر مره سافرت فيها الى ابوجبيهة سنة1992..انا والوالده يديها العافيه يا رب ..طبعا كانت فرحة ماعادية بعد موافقت الحاجة لمصاحبتها بالسفر الى العزيزة الحباك ولكن لم تكتمل الفرحة عند وصولنا المقرح وفى وسط المقرح انهال علينا الرصاص من كل الاتجاهات وهاك يا صراخ وتشهد وقراة القرأن وربكم ستر والحمدالله هرب السواق بسرعة من غير ان يحصلوه وهم جارين وراء البص ويطلقو فى الرصاص ونجونا بحمد المولى ...المحيرنى كيف عرفو ناس ابوجبيهة بالحادث لاننا وجدناهم فى الموقف منتظرين بالفرحة والزغاريد وبعديها هاك يا خرفان واستمرت السعاده الى حين مقادرتنا ابوجبيهه بعد شهرين ...وكنا حينها راجعين مع دكتور القونى واولاده وكان معنا اخى المرحوم انور ناصر رحمة الله علية ...وقبل الوصول الى كوستى تعبت الحاجة ودخلت فى غيبوبة ولم يتمكن دكتور القونى من السيطره على الموقف واظهر قلقه على الحاجة مما زاد الطين بلى ...وحينها دخلت فى غيبوبة وبعدها فقت بصوت الوالده تقول لى يا بنت قولى بسم الله انا تمام الحمدالله ووعيت وفرحت فرح شديد بان الوالده تتكلم ...ووصلنا امدرمان بعد شقى وعزاب ...وازكر سالنى الفاضل دكتور القونى بانى حاجى تانى قاصد ابوجبيهة وقلتها من غير تردد طبعا

أولاً رحم الله أخي العزيز أنور ناصر و أسكنه الجنة ....والتحية للشــامخ د. القوني ,,قصتك صراحة يا أختي سهاد مليانه بالمآسي و الخوازيق بتاعت الزمن الأليم ...... الله لا أعادها تاني .....وبصراحة كلما إزداد الشوق و الإلتيــاع الى شئ تقصده " مدينة ".... " بيت" " صديق " " أخ" دايماً تزداد العقبات الكؤود وتقف الحواجز و المصدات عائقاً للوصول الى المبتغى دي طبعاً تجربتي الشخصية لذلك عند السفر أكثر من دعاء السفر و أقول يا ألله الســلامة.... فحمداً لله إنك أرضيتي طموحك في شوفه للحباك..... وما أجمل أن تأتي من السفر ويجوكي الجيران والأهل بسلامهم الحنين الذي نعرفه .....وسفرتك دي فيها خرفان... نتمنى لك عودة للحباك تاني كمــان.....

الرحمة والمغفرة لك اخى الغالى انور ...اكيد حنجى تاتنى وتانى وتانى انشاءالله والمرة دى حيكون الاستقبال فى مطار ابوجبيهة انشاءالله ؟؟؟؟..مشكور اخى الفاتح وجهز لينا تيس من غنيماتك

ذهب عقل البعض وكانت هنالك اصابات ولم تكن هنالك مستشفي او حتي شفخانه قريبة ولك ان تتخيل كم البطيخ المكسر وجوالات السكر وبراميل الوقود وجوالات الليمون وعدد 29 راكباً في الخلف ..ابي احدهم. في المقاعد الامامية تجلس سيدة من ذوات -الحجم العائلي - وشخصي وسائق شاب ليس له خبرة حيث اخبرني ابي انه من نهر النيل وله عام فقط في الجبال!
بعد ان تم الاسعاف بالطرق البلدية للمصابين بجروح وكسور...سافر السائق وصاحب اللوري وشهود بعجلات الي رشاد لفتح بلاغ! وتركونا في العراء!!والمطر لا يتوقف والارض ليس بها شبر جاف!!! بعد مدة وصل لوري طوب وقال لي ابي يجب ان نترك كل شئ نحمله في مكانه وكنا نحمل جوالات من المانجو والهالوك هدية لعمتي في كوستي..وصعدت مع ابي في اللوري وتحركنا صوب رشاد ...مكثنا ثلاث ايام بلياليها...وبلغنا كوستي بشق الانفس..ولا تفوت عليكم اننا لم نستحم ولم اذق طعم النوم او الاكل او حتي الماء!!
نسأل الله ان ينصلح الحال ويتم الطريق لنستمتع بجمال الطبيعة كما الآخرين..
انتهت

[right]الإخوة والأبناء عيال أبو جبيهة الحُبّاك .. مسواك الأراك .. جنّة منِّي وجنّة منّاك .. كان ما دايرني .. طلقني وشيل جناك.
السلام عليكم ورحمة الله وبركاته. والعيد مبارك عليكو .. زايدين مانا ناقصين يزيدكو زايد الخير .. يعلي مراتبكو.. ويعليكو فوق المابيكو .. يطوِّل عمراكو ..
لنا ذكريات جميلة في السفر من وإلى أبو جبيهة في الخريف .. وذلك في نهاية ستينيات القرن الماضي وسبعينياته أيضاً.
تصوروا الردمية كانت مافيش... والكباري الهسع دي كلها مافيش.. ومافيش تركترات في أبو جبيهة خالص لا للزراعة ولا للسفر إلا تركتر عمك بابكر.
السفر إستمر عشر سنوات كاملة يعني عشر خرايف وزمان الخريف خريف نجيض ما فوقا لعب دوت. المطر كلا أم دالوق .. يعني كأفواه القرب.
استعدوا للمزيد في المرة القادمة. تحياتي

[right]وردت مداخلة في مكان ما في المنبر من الأخ أزهري الحاج بها بعض الأخطاء وقام الأخ الزميل والدفعة فضل بتصحيحها .لكن يا فضل ما برانا كتيرين كبروا معانا. برضو عندك أخطاء وهاك الصواب.
1- الأول: أحمد الطاهر منقة: داخلية الدائر
2- الثاني: التوم محمد حامد (كلوقي):داخلية قدير
3 الثالث: الحاج الجعلي ابشر : داخلية تقلي.
4 الرابع: كباشي النور : داخلية كُرن.
5- الخامس: علي حموده صالح: داخلية الدائر.
6- السادس: محمد النور سوار: (رشاد) داخلية قدير.
7- السابع : التجاني عربي حمد (أم برامبيطة): داخلية تقلي.
8- الثامن: علي آدم (الموريب): داخلية كرن.
9- التاسع: فضل الحاج البشير: داخلية الدائر.
10 - العاشر: خليفة مصطفى مهدي: داخلية قدير.

شفتوا طقش نضيف نحن 6 جينا في العشرة الأوائل. لكن في حاجة غريبة . أنا وعلي حموده أحرزنا درجات متساوية في كل المواد والمجموع متساوي بس ما عارف جابوني الرابع وجابوه الخامس كيف ما عارف.
مما أذكره: أنه في امتحان اللغة العربية طُلب إدخال كلمة (مظهر) في جملة مفيدة. هل تصدقون أناوعلي حمودة ادخلناها في الجملة التالية: (صلاة الجمعة مظهر إسلامي رائع). الناظر محمد أحمد خاطر عليه الرحمة، قال لينا إنتو بتبصوا من بعض ولا شنو؟ علي حمودة رقم جلوسه 45 وأنا رقم جلوسي 33 في فصل سنة أولى .. أول فصل من ناحية الشرق.
معليش يا شباب دي حاشية يعني بالعربي سندوتشتي بعدين نواصل معاكم سفر الخريف لمن اللواري بتقيف وبتكتر التعاريف.

[right]نبدأ بتعريف أبو جبيهة في الخريف أو المدينة زمان. الحدود الشمالية بيوت ناس الزين عبد السلام. الحدود الشرقية بنك التنمية التعاوني الإسلامي.. دي كانت اسمها أم شريتي ببيعوا فيها المريسة. الجنوب الشرقي الحد: المدرسة الأولية القرينا فيها.. وتاني إلا المقابر بعيد عنكم. جنوبا: المحلج. غرباً: خور البطحة. حلة سمبو وأم خماشة دي كلها كانت خارج نطاق المدينة. من سور المدرسة الوسطى الشرقي (ثانوية البنات حالياً) يوجد ميدان كورة .. وبعده ميدان كورة .. تاني خلاء حتى خور الضكير. بيت وكيل البوستة وبيوت الشرطة الحالية دي أقصى نقطة في الشمال الشرقي للمدينة. بيت عمنا عثمان حتيلة ومصطفى الجاك عليهما الرحمة مافيش بيوت غرب منها. مافي بيوت بين منزل عمنا محمد علي الطيب والمغواري وأحمد عبد الماجد عليهم الرحمة. نقعة دلدلاية ..هناك نقطة البوليس.
السلخانة بعيدة دايرة ليها عجلة عشان تصلها.
في السوق الشغلات رخيصات: 5 طعمية بتعريفة. (التعريفة دي نص القرش يا عيالي).والزلابية 5 بقرش وإمكن اكتر. 3 هالوكات بتعريفة. 5 وينا بتعريفة. كوز صلصة صغير مليان فول مدمس بتعريفة وعليه زيادة. الرغيفاية أم قرش بتشبع الزول وأم قرشين بنسميها طُباعة الجمل ما بتنكل للزول وحيدا. طلب لحمة بالصلصة بثلاثة قروش وفي المطاعم الراقية بخمسة قروش. مافي زول بياكل الفول.
لوح الصابون بقرش وقرشين. والظهرة بتعريفة. 3 قناديل عيش ريف مبوشات بتعريفة. ربع رطل بلح بقرش. 3 حلاوات بتعريفة. حُجاب البسكويت بقرش. كيلو اللحم يتراوح بين 6 قروش و9 قروش يعني عجالي وضأن.
حذاء باتا 99 قرش. سفنجة 39 قرش. ضراع الدمورية 4 قروش وضراع البفتة البيضاء 5 قروش وضراع الدبلان 6 قروش. الديك البقول أنا 10 قروش. ورطل اللبن قرشين. وقزازة السمن 10 قروش للزريقة و12 قرش للبيضاء. (الزريقة رطل وربع، البيضاء رطل ونص سمن). رطل الزيت 6 قروش سمسم أصلي البُلك. وكوم البصل بقرش بسوي حلة مدنكلة.
خليكم منتظرين. تحياتي

[right]هنالك شخصيات من سكان أبو جبيهة من مختلف المهن كانت تعاملنا معاملة خاصة لا يمكن مهما فعلنا أن نفيهم حقّهم علينا. كان مصدر الإحترام والمعاملة أننا دخلنا الثانوي كمجموعة وواصلنا للجامعة وكان الجميع يفتخر بنا بلا حدود وحتى بدون معرفة. ركبت عربة كومر تتبع للشرطة من أبو جبيهة لأبو نوارة. كان الركاب يتحدثون عن طلاب أبو جبيهة بالجامعة. وبدأوا في ذكر الأسماء. ذكر أحدهم اسمي قائلاً: وبرضو أخونا الفكي النور قالوا عندو ولد في الجامعة. ويبدو أنه لا يعرفني. سأله أحد الركاب: الزول الجنبك دا هل تعرفه؟ قال: لا. قال له السائل: دا كباشي النور. فرح بي الرجل وكأني إبنه. عندها علمت أنني أحمل أمانة ثقيلة مصدرها كل سكان أبو جبيهة وعليّ أن أحافظ عليها مهما كلفني.
سابدأ بطبقة السواقين الذين كانوا يقودون اللواري التي يملكها تجار أبو جبيهة. أحب أن أؤكد نقطة مهمة جدّاً وهي أنني لم أدفع أجرة مشوار في لوري من لواري أبو جبيهة منذ أن كنت تلميذاً في المدرسة الأولية وحتى تخرجت في الجامعة. بل كان عمّنا المرحوم خليل حتيلة يستخرج لنا التصاريح ، يصرف القروش من المجلس .. يدفع لنا ما صرفه من المجلس. يركبنا في مقاعد أمامية مع السواقين الذين لا نعرفهم. يقول للسواق: دا ولدي تصرف عليهو لحد ما توصله الخرطوم.
وعندما نركب مع سواقين أبو جبيهة بتكون الحكاية عميان نام. والسواقين بدون ترتيب لفضائلهم علينا هم: عثمان الفكي. محمد يسن. عبد الماجد صالح. ميرغني دقاقة. شرومة. الطاهر أبو عويش. أحمد الدنقلاوي. علي الزاكي. علي خالد، عمر منقة وتجاني منقة ومحمدية وحسن برقو. مصطفى أب بوري..ثاني.. ومن المساعدين من أصبح سائقاً ماهراً عبيد جبر الله عليه الرحمة وسيدالتور وأبو رفارف. وقدوم كلب. ولوممبا - الذي إنتقل لرشاد للعمل مع عمنا المرحوم سيد مصطفى غيث. برنو. محمد دفع الله (إبن عمي) وكثيرون غيرهم لم تسعفني الذاكرة بهم .. فهذا حكي من قبل 30-40 عاماً مضت.
فاصل ونواصل تحياتي.

[right]هنالك شخصيات فريدة هي من أصل أبو جبيهة .. أذكر أن الأخ عثمان خليل حتيلة قال لي: ياخي في ناس كتار شابكننا من أبو جبيهة .نحن نعمل ليهم إمتحان كان الواحد فيهم ما بعرف الجماعة ديل يكون ما من ناس أبو جبيهة. والجماعةهم: جان كرن.. ود الشيخ.. كجو .. حسن القدم - مشهور بحسن منزولة لأن والدته كانت إمرأة فاضلة وكانت تطبخ لنا في داخلية المدرسة الأولية- عمك صامولة كك. منو منّكم بعرف الجماعة ديل؟
والله يا جماعة نعست الساعة عندي 3 صباحاً بتوقيت لندن .. باكر كِن الله حياني بحكي ليكو عن أبو جبيهتنا الزمان.. إلا حقتكو اليوم دي غايتو
تحياتي

حذاء باتا 99 قرش
35 قرش وأنت الصادق

99 قرش لشبط باتا الصندل ويبدأ من 79 قرش وإنت طالع والشدة ب 25 قرش

لك التحية وأنت تناضل وتكافح بأرض الضباب من أجل كسب لقمة العيش الشريفة ...وهذا دليل رضاء المولي عليك ووالديك وأهلك...لبذلك وكدك..وعرقك ومجهودك ..وكفاحك الطويل ...ونيل الشهادة الدراسية بشق الأنفس ..في معترك منافسات قوية ..للخروج من عنق زجاجة ضيق جداً ...لنيل شهادة النجاح..ومع معاناة الترحال ..والمواصلات ...والغربة داخل الوطن الواحد ..مع كل هذا تفوقت وكنت من الأوائل ...وهذا شرف لنا ..ولا تنسي :أنت أخي رمز من الحبااااك نعتز ونفتخر بك وبانك من أبناءه الأذكياء النجباء..فأهلاً بك دائماً وبمواضيعك الحلوة الشيقة ..الجذابة بأسلوبك العفوي الجميل المتواضع ...والتي تحن النفس إليه حينما نسمع كلمة حبابكوا أولاد أمي ...ماهذه الحنية ..ماهذه الطيبة والمحبة والصفاء والنقاء في أهلنا الشرفاء البسطاء ..وقد قرأت مداخلاتك الرائعة ..من طق ..طق وحتى السلام عليكم ...بالجد رجعتني ورا ..كتير كتير ...وقد وقفت معك ..في أن كليو اللحمة كان ب 8 قروش إلى تسعة قروش ..واشكرك قد دعمت كلامي مسبقاً ..لأن نميري حينما إستلم كان كليو اللحم البقري ب8 قروش فقط ...وفجأة إرتفع إلى 10 قروش ..وسلمه للحكومات من بعده ب 25 جنيه ما هذا القفز السريع ..وبالزانة كماااان ...الله لا كسبك...وحتي اليوم اللحمة في الإرتفاع الجنوني المحموم... والكبلو طاير لفوق فوق ..ممكن الآن يكون وصل ل 14 الف سوداني ...ولا تعليق ...وأذكر حينما إستلم نميري كان سعر الدمورية 6 قروش للذراع ...واذكر أيضاً أن سعر رطل السكر ب 6 قروش أيضاً في حكومة نميري علي طول إرتفع رطل السكر ل6 قروش ونصف ...وهاج الشعب وماج بالنسبة لإرتفاع السكر ..وحتي إستقال نميري وقتها ..ولكن الجماعة رجعوه ..وياليته وقتها لم يرجع ...ولا اريد الخوض في الفلاشا ..او التعليم أو النسيج أو تأميم الشركات المستثمرة بالسودان (ومصادرة أموال أصحابها ..والله حرااام)...أو الأمن ..لو تذكروا ما كان لنا غير الجيش والبوليس ..وفقط البوليس السري ..وكنا نخاف من البوليس السري ..حيث كان في ابوجبيهة بوليس واحد سري هو عمنا حسن ...لو موجود أطال الله في عمره ...وما أدري اليوم كم توجد تسمية للأمن بالسودان ؟؟؟!! وننتظر أخي كباشي منك المزيد ..ولا تنسي طفشات أهلناالحلوة ...ظرفاء ابوجبيهة الحباك :أمثال حياة العم تيبر ..والكنضو ... وأبو خال مجيدة والعم قرينات ...محبتي

[right]السلام عليكم ورحمة الله وبركاته
نجيكم لموضوع السفر بالخريف من أبو جبيهة. طبعاً في ذلك الزمن المدارس كانت بتقفل يوم 15\مارس من كل عام وتفتح في 15 يوليو. مما أجي من المدرسة بقعد أسبوع في أبو جبيهة. بعد داك بمشي أبو نوارة.. وهناك مع البقر والغنم. في منتصف شهر مايو المطر بنزل. طوالي بنعزِّب بالبقر (بنعزِّب يعني بنمشي مع البقر محل الموية لكن عزّابة بدون نساء). لحد أول شهر يوليو المطر بكون عمّ كل الدار. بنجي راجعين بنسوق العوين وبنطلع في إتجاه القوز. أنا بتخلف في أبو نوارة. وبعد يوم أول يوليو بتحرك لأبو جبيهة. طبعاً راكب عربية ذات دفع رباعي ههههههه أقصد حمار أبوي (الله يرحمه) بصل أبو جبيهة في نفس اليوم لأنه حمارنا داك زي اللاندكروزر بين الحمير.
بلقى الجامعة جاهزين القيام بعد يوم أو يومين. كنا الشلة التي ورد ذكرها من قبل وبعض البنات. كل الشباب كانوا في الفاشر الثانوية. أنا في أم درمان وخليفة مصطفى وصديق الباشا في الحصاحيصا وحامد الطيب ناصر في النهود. وبعض البنات في الأبيض الثانوية بنات وكوستي بنات.
في حتة اسمها النبقاية .. زي ما بقولوا السواقين: كان المطرة شالت العربيات بيوحلن فيها. طبعاً متصورين الطريق من أبو جبيهة وحتى حدود تجملا طينة سوداء بدون رمال ولا جبال. من أم خمّاشة وحتى حلة سمبو بنقضي يوم. من حلة سمبو لكنجارة بتاخد مننا يوم. من كنجارة لدبيكر يوم. في دبيكر عضمها كي بناخد يوم. وبعدها يوم لتجملا. ولو محظوظين بنصل في 3 ايام حسوما. والرجوع بناخد نفس الزمن في حالات الإضرابات وقفيل الجامعة بعد مادخلنا الجامعة.
من تجملا وحتى الموريب مافي مشكلة. من الموريب وحتى سدرة دي مشكلة كبيرة. طين أسود ومزلقانات وخيران كتيرة نازلة من الجبال على يمينك وإنت متجه شمال. وخيران الجبال عجيبة .. نقطة مطرة واحدة وتلقاها جاتك جارية في الخور ما بتصبر أبداً. طبعاً المرور بمناطق ناسها الله يديهم العافية.. طرائفهم ما بتنحكي حتى لا نتلوم معاهم كما تلوموا معنا في ذلك الزمان. الأخ خليفة مصطفى مهدي وجوده هو فاكهة الرحلة .. لولا قفشاته ونكاته وحكاويه التي لا تكمل يساعده الأخ عبد الرازق محمد عبد الرازق كانت الرحلات حتكون هم وبلاء ما بعده بلاء.
على الحظ بناخد ما بين 3-5 أيام من الموريب لسدرة. من سدرة ما في إلا مشكلة بسيطة قريب من أبو حبل وبعدها بنطلع القوز. والقوز رحمة في الخريف. القطارات كانت منتظمة وبنلقى الحجوزات جاهزة للطلاب وبنتفارق من هناك على أمل اللقاء.

[right]حصلت لخبطة في جدول الدراسة بقت المدارس بتفتح في منتصف شهر سبتمبر بدلا عن منتصف شهر يوليو. دا زاد لينا الطين بِلة. طبعاً بنركب العربيات مجاناً ولكن بنقول لأعمامنا أصحاب العربات: هسع منو فينا بوصل التاني؟ نحنا ماشين الوقت كله كداري وبنلز وبنحفر وبنردم وبنجر العربية لمن توحل. كانت الزوادة في العربية كميات.. ولا انسى أن عمنا المرحوم عبد الرازق أبوعلي بيشحن نص العربية فول سوداني. ماعلينا إلا نحرِّق وناكل لمن العربية توحل.عمنا عثمان الفكي متّعه الله بالصحة والعافية طوالي لو لقينا فريق عرب رحل بشتري لينا خروف.
طبعاً أبو جبيهة لا فيها سينما ولا تلفزيون ولا كلام من النوع دا. كنا مسطحين خالص .. أها ونحن بالقرب من الموريب العربية وحلت وحلة تمام. خلينا المساعدين بيحفروا ونحنا نقلنا حطب وتراب قنطور ناشف وراجينهم يكملوا الحفر عشان نردم التراب والحطب حتى تخرج العربية.
قلنا أحسن نعمل تمثيلية ونتقمص شخصيات الممثلين المصريين. كل واحد فينا إختار ليهو ممثل ليقوم بدوره. واحد مننا ( مش قلت ليكم مسحطين) قال هو حيقوم بدور شويكار !! ضحكنا قلنا ليهو يا فلان ليه تقوم بدور شويكار؟ قال دا ممثل كويس وعاجبني! قلنا له دا ما راجل دي مرا اسمها شويكار.. طبعاً عمكم أكثر تفتيحة من الباقين أنا بتاع أم درمان. ضحكنا حتى ادمعنا. قال والله ياجماعة المرا دي الوقت دا كلو قايلها راجل.
في سفرية راجعين أبو جبيهة خريف الجامعة قفلت بسبب نميري. من تجملا وصلنا حلة أرمياو في 3 أيام .. كنا جيعانين جوع شديد وماشين كداري. الجماعة قالوا نخرِّم طوالي الناس ديل مساكين وما عندهم حاجة والدنيا خريف. قلت ليهم يا جماعة دي حلة أرمياو والزول دا أنا بعرفه كريم كرم لمن غلط وعنده الشئ ما نحرمه من الأجر وكمان المسافة بعيدة لسع.
نزلنا جابوا لينا الموية والشاي وبعد شوية جابوا لينا رُز مفلفل في الطشادة - صدقوني ليست صحون أو صواني إنما طشادة مليئة بالرز البوخو يلوي.. أكلنا (راجل كلدماي) دي دايرة ترجمة لمن ترجعوا أبو جبيهة أسألوا أصحابكم من عيال أولاد حميد والحوازمة. وفضلنا الأرز في مكانه ما كمّلنا نص الكمية. دعونا للرجل بالصحة والعافية والرزق الحلال. أدعوا له من فضلكم فهو رجل ولا ككل الرجال. هذا الأرمياو يمكنني أن أقسم أن ماله حلال بنسبة 110%. كان يعمل عتالي في لواري المنقة. بدأ بشحن 5 كراتين في اللوري مجاناً. زادت الكمية لعشرة كراتين ومنها إلى 50 كرتونة بالأجرة. وبعدها 100، 150، كرتونة.إلى أن تمكّن من شحن لوري بمفرده 250-300 كرتونة. تطور الرجل حتى إشترى أحد اللواري الذي كان يعمل به عتالي. وأشترى لوري ثاني جديد من عرقه وتعبه. متّعه الله بالصحة والعافية. نواصل إن شاء الله.

[right]في إحدى الرحلات الظريفة قمنا من الموريب ووصلنا حلة اسمها كالنج ومنها وصلنا حلة اسمها غربلة (هم يقولوا عليها قنربلة). العربات كانت لوريين. وقدامنا خور جاري موية .. المطرة شالت وكبت في الجبل. اللوري الأول مرقناه. التاني تلّب بيهو ثاني ووحل. عملنا سد عشان نقفل الخور وننظف لللوري عشان يطلع. جهزنا الحطب وتراب القنطور الجاف. زي ما قلت ليكم مطرة الجبال ما بتصبر دقائق والموية في الخور زادت. من الساعة 10 ص وحتى الساعة 4 العصر نحن بنحفر ونردم. أنا تعبت شوية وقعدت في قيفة الخور.
عمنا المرحوم حاج مختار أبو نخيلة قال لي: يا ود فكي النور إنت مالك يا ولدي كسلان كدا قوم على حيلك. قلت له: والله يا عمي الحاج أنا ما كسلان.. بحفر من الصباح قلت أنجمّ شوية. والخور كمان مويتو زادت.. يعني شغلنا كله راح ساكت. إلا الموية دي تفوت وبعدين نردم تاني. قال لي: والله يا ولدي لمن كنا قدركم كدا، لمن الترعة تنكسر الواحد فينا برقد بقفلها بجسمه وبقول لأخوه أجري أملآ الشوال تراب. نحبس الموية لحد ما يجي التراب. قلت ليهو: ياعمي الحاج الترعة بتسقي بيها زراعتك .. الخور دا انا عندي ليا بقر ولا غنم. وكمان زايد .. الله كريم وضحكنا.
في نفس هذه الرحلة الطريفة كان ثاني سايق العربية بتاعة مصطفى الجاك رقمها 1803 خ6 وجاري طيران في منطقة اسمها ملولو .. فجأة اللوري يشيلوا ليك مزلقان يخلي يغيِّر إتجاهه بدلاً من الرهد إلى أبو جبيهة. يعني بدل كنا ماشين شمال نتجه جنوب.. ثاني ما كضّب أداها ليك نمرة 3 وواصل . كو كو كو دقينا التندة. مالكم يا جماعة؟ قلنا ليهو ماشي وين؟ ردّ: الله ما ماشي الرهد! يا ثاني إنت قبّلت على أبو جبيهة يازول قول بسم الله. الرجل استغرب واستعدل اللوري ورجعنا في الإتجاه الصحيح.
مع كل السفر في الخريف وسوء الطرق ما حصل لينا حادث واحد خلال 9 سنوات. والسبب السواقين بسوقوا بعقل وكلهم ناس محترمين زي ما وريتكم أسماءهم في البداية.
في المرة القادمة نحكي لكم رحلتنا مع عمنا عثمان الفكي و3 سواقين من أبو جبيهة للرهد في آخر رحلة على طريق الهواء الذي كان يمنع فيه السفر بالخريف. تحياتي.

كباشى النور الصافى......كم أنت رائع وجميل.
ما كتبته يجسّد شخصيتك الذكيّه ويؤكد رجاحتك عقلك.
صحيح هذا الرجل(كباشى)لم ألتقيه سوى مره واحده فى حياتى قبل عشرات السنين الا أننى سمعت عنه الكثير وللأمانه كل ما سمعته عنه يصب فى ذكائه ورجاحة عقله.
أنا فى غاية السعاده أن تبدأ معرفتى بهذا الرجل العملاق من خلال منتدى ابوجبيهه ولا شك أن استمراره سيفيدنا كثيرا خاصه فيما يخص التوثيق.
تحيه كبيره تليق بمقامك أخى الأكبر/كباشى الفكى النور الصافى

بالجد أنت مبدع ...أسلوبك سهل ...بل سهل ممتنع ...وقد عجبتني بالجد الفقرة التالية :
نزلنا جابوا لينا الموية والشاي وبعد شوية جابوا لينا رُز مفلفل في الطشادة - صدقوني ليست صحون أو صواني إنما طشادة مليئة بالرز البوخو يلوي.. أكلنا (راجل كلدماي) دي دايرة ترجمة لمن ترجعوا أبو جبيهة أسألوا أصحابكم من عيال أولاد حميد والحوازمة. وفضلنا الأرز في مكانه ما كمّلنا نص الكمية. دعونا للرجل بالصحة والعافية والرزق الحلال. أدعوا له من فضلكم فهو رجل ولا ككل الرجال. هذا الأرمياو يمكنني أن أقسم أن ماله حلال بنسبة 110%. كان يعمل عتالي في لواري المنقة. بدأ بشحن 5 كراتين في اللوري مجاناً. زادت الكمية لعشرة كراتين ومنها إلى 50 كرتونة بالأجرة. وبعدها 100، 150، كرتونة.إلى أن تمكّن من شحن لوري بمفرده 250-300 كرتونة. تطور الرجل حتى إشترى أحد اللواري الذي كان يعمل به عتالي. وأشترى لوري ثاني جديد من عرقه وتعبه. متّعه الله بالصحة والعافية. نواصل إن شاء الله.
كباشي الصافي
ابوجبيهه يابلدى.... تسلم أخي كباشي ...وقد ضحكت كثيراًعند : (راجل كلدماي)... تسلم ... على هذه العبارات الجميلة الحلوة والتي تطيب النفس والخاطر ....وماشاء الله ...لا زلت تحفظ رقم العربية 1803 خ6 وحتي سائقها ثاني ..يبدو لي يكون نساها خالص ...ألم اقل لك أنك تستحق الإشادة لأنك متفوق ذكي ...ماشاء الله ..... وواصل صدقني نتابع معك بشغف ....محبتي

أها يا سهاد يا ختي ده زول حكايّ بالحيل تعالي بي بنبرك وانا بجيب بنبري ونسمع بي أدب مافي داعي للشغب

ذكرياتي في سفر الخريف غير سعيدة ولا أحب أبدا تذكر تلك الأيام .. أعاني فيها كثيرها خاصة لأني متعب جدا في حكاية الأكل .. ولتوضيح الصورة أكثر عندما كنت في خورطقت لمدة ثلاثة سنوات لم أتناول طعام الغداء لأني لم أكن مستعدا لآكل طبيخ المدرسة وطيلة الثلاثة سنوات كنت أتناول الفول في الفطور والعشاء ... ولا غرابة أن قلت أن طبيعة جسمي فولية وليست ترابية أو هوائيه ولا نارية ولا مائية

إيش حكايتك ...تااااني ترابية ..ونارية ..وهوائية!!!؟؟ والله لا حرمنا منك ...محبتي

ما براك شايف الطين والوحل وهذا إتحاد الطبيعة الترابية مع الطبيعة المائية

[right]بعد السلام
أولاً بالتبادي الشكر لكل من شاويش وود عوض السيد وبت أخوي الدكتورة - كان ما رجعت من الصين وريني حلتكم وين عشان المرة دي لازم أصلك. أنا ماشي قوانزو وشنغهاي وبكين.. أها حلتكم ما جنب واحدة من ديل؟
الجماعة شكروني خلاص وأنا في المدرسة الأولية كانوا بقولوا لي راسك كبير هسع شعرت براسي كِبِر زيادة. لكم جميعاً الشكر. وأتمنى أن أكون عند حسن الظن وأفي بعضاً من أسياد أبو جبيهة حقّهم علينا. طبعاً قسمنا البلد نُصين: ناس أبو جبيهة وأسياد أبو جبيهة. متأكد أنكم كلكم من أسياد أبو جبيهة. وحأحكي لكم قصة عن ناس أبو جبيهة مش إنتو أسياد أبوجبيهة.
كنت ماراً بنص السوق. ناداني الصادق حاج أحمد الفضل: يا أخينا يا أخينا. إلتفت على مصدر الصوت ، قلت له: معاي انا؟ قال لي: أيوا تعال. جيت راجع. سألني إنت جاي من وين؟ (طبعاً الصادق حاج أحمد يعرفني وهو في الحساب أنا خاله). كان معه جماعة في الدكان لا أعرفهم ولا يعرفونني. سألته: قصدك.. رجلي دي من وين؟ ولاّ أصلاً أنا جاي من وين؟ ردّ: إنت أصلك جاي من وين؟ تبسّم في وجهي ففهمت قصده. قلت له: جيت من الخرتوم. سألني: جيت لشنو؟ قلت له: جيت أشتري سمسم وصمغ. لاحظ أحد الشباب تبسمنا. قال لنا: إنتو بتعرفوا بعض؟ قلت له: لا.
قال لي الصادق: الجماعة ديل قالوا: أبو جبيهة دي إتملت ناس أغراب .. شوفوا زي الماشي دا جا من وين؟ عشان كدا أنا ناديتك توريهم إنت جاي من وين. وضحكنا. قلت لهم: بتعرفوا عمكم الفكي النور (عليه الرحمة) وعلوان والصافي ؟ قالوا نعم. قلت لهم: أنا كباشي النور.
وقد حكي لي الأخ بشرى إدريس، أنه زعلان نزل من البص لمن وصل بيتهم مافي زول قال ليهو إزيك يا بشرى؟ وهو ما عرف ولا زول في الشارع. بعد يومين هو ماشي في الشارع لحقه شخص من الخلف. ضربه في كتفه وقال له: وين يا درجي. إلتفت عليه. الزول قال ليهو: ووب سوري والله ياعمنا قايلك درجي معليش بس بتشبه درجي شديد. ونفس القصة حصلت مع الباشمهندس فيصل مختار. نواصل إن شاء الله.

[right]أغلقت المدرسة الوسطى أبوابها، وكنا في ذاك العام تلاميذ في السنة الثانية ثانوي. وكان هذا المشوار هو الأخير عبر شارع الهواء وذلك في نهاية شهر يونيو. وكان الطريق يقفل بأمر السلطات حتى نهاية أكتوبر. الطريق دا كان مهم لنقل أقطان جبال النوبة من أبو جبيهة وكلوقي وتلودي. كان الكنفوي من عربات: عثمان الفكي.. عبد الماجد صالح.. محمد ياسين.. وميرغني دقاقة. الموقف كان في العرديباية غرب طاحونة حسن سليمان. الناس كلها ركبت. والناظر الجنيد (عليه الرحمة) ركب هو أولاده قدام. ونحن الطلبة وباقي الأساتذة ركبنا شحنة. الأستاذ إبراهيم حسين جعفر رفض الركوب في الخلف في عربة عثمان الفكي. وقال: سيركب في اي من العربات الثلاثة الأخرى. عثمان الفكي قال له: شايف المطرة جاية من جهة الجبل.. أنا بسبقها لكن الجماعة ديل بورطوك .. أخير ليك تركب معانا. رفض وركب في أحدى اللواري الثلاثة.
بعد ما الناس كلها ركبت. طلع عليهم عمنا عثمان الفكي وقال ليهم: أسمعوا يا ركاب: كل واحد يربط عمته في وسطه ويدخل طاقيته في جيبه والعندو قروش يربطها في تكته. علي الطلاق ما أدوس فرملة إلا في الرهد. وأنطلق على بركة الله. تصوروا المطرة طاردانا من الخلف واللواري جارية بسرعة جنونية لكن الشارع نضيف زي الورقة البيضاء. كل مرة نلتفت نلقى واحد من الجماعة إنقطع.. بعد شوية التاني إنقطع .. ونحن طبعاً آخر غناء وكواريك تشجيعاً لعمنا عثمان الفكي... صدقوني عندما وصلنا مشارف خور الدليب العربات الثلاثة ديك إنقطعت.. والمطرة ما زالت تطاردنا.. خريت في خور الدليب أبو كرشولا.. الراكوبة .. سدرة.. 3 ساعات ونص نحن داخل الرهد أبو دكنة.
العربات جات بعدنا ب 4 أيام أيام مش ساعات. طبعاً عمنا عثمان الفكي شِمِت ليك في استاذ إبراهيم حسين جعفر. قال ليهو: لو ركبت معاي ما كان أخير ليك؟
ربنا ستر العربية دي ما جاتها عوجة .. غايتو لو كان لا سمح الله أشقلبت.. ما أظن يلقوا العربية خليك من الركاب. لهذه الأسباب فكّر أسياد أبوجبيهة في طريق أبو جبيهة الرهد.. الذي تحوّل الآن للطريق الدائري الذي أصبح زي حجوة ام ضبيبينة.. هل تعلمون أن بداية جمع القروش للطريق دا كانت في 16 أكتوبر 1966 ونحن تلاميذ في رابعة وسطى. يعني أغلبكم هنا ما كان مولود.
عمنا المرحوم الطاهر منقه قال لواحد من المسؤولين: والله يا ولدي القروش الدفعناها في الطريق دا .. كان رصيتوها الجنيه جنب أخوه كان وصلت بورتسودان مش تراب وخرصانة. إلى اليوم الطريق بجري وبنجم...وغايتو راجين الله.
نواصل إن شاء الله عن رحلة أخرى في مرة قادمة. تحياتي.

ابو الزهور الرجل العفيف النظيف تحياتي ...طبعاً دي مداعبة بقصد بها الأشياء الفيزيائية ...ولك التحية أيها الرجل النظيف دائماًوبكل ما فيك بره ..وجوه ...أخي كباشي بالجد سردك ممتع جداً ...بس ملاحظة: موقف العربات ( اللواري ) غرب الطاحونة ...كان تحت شجرة لالوبة عمنا الشايب ابوقد ..صاحب الطبلية المشهورة ( حوش البقر)...وأما موقف العرديبة أعتقد كان شمال النادي الأهلي سابقاً يبعد منه حوالي 30 م تقريباُ..والله أعلم ...وأما الرجل الماهر الشجاع عثمان الفكي فقد كان يعمل معه مساعد ..اخي المرحوم :محمد هجو الفضل ...الله يرحمه ...وقد عمل معه كثيراً كثيراً ...ولكني أقول لك لو رجعت ابوجبيهة الآن ..بإذن الله بعد كل كيلو سوف تجد شخص واحد فقط من ابوجبيهة ...وبكل اسف ظلمنا وحتي في توزيع الأراضي ...والله العظيم حتي هذه اللحظة أنا لا أملك ولا سنتمتر بابي جبيهة ... ومعظم شبابنا من أن تكون لهم أراضي ولكن ممكن تكون بالشراء فقط ...ونسأل الله أن نجد من أبناءنا من ينصفنا إن كان للعمر بقية ... وأنتقل بك أخي كباشي من الحباك لأرض الضباب ...بالله لو شاءت الظروف وجيت الرياض ...أن تنزل عندي ...نحنا عزابة ساااكت ...ومجلس كبير للونسة والضحك ...وغرف للنوم والراحة ...وأهلاً ومرحب بك أخ عزيز وغالي ...وتحياتي لأختي سهاد عبدالغفار..وهي أيضاً بارض الضباب ...ولكن في سفرتي هذه الأخيرة إلتقيت بعلي عبدالغفار زميلي ...وسلمت عليه ولم يعرفني ...وبعد مجهود حتي عرفني ..وله التحية ....وارجو أن أفيدك باننا نتابع معك بشغف ...وسوف أرسل الموضوع دون مراجعة ..لأننني ذاهب المطار مستعجل جداً فأعذروني إن كان هنالك خطأ ما .... محبتي

وسوف أرسل الموضوع دون مراجعة ..لأننني ذاهب المطار مستعجل جداً فأعذروني إن كان هنالك خطأ ما .... محبتي

يا رب تكون ام علياء جايه

إنت دائماً راقي بذوقك ...لأ تصدق مش أم علياء ...بل مديري المباشر مسافر رحلة داخلية ...وتبقي للإقلاع ساعة ..وحينما كنت في آخر سطر للرد على الغالي أخي كباشي ...إتصل وقال لي الآن أنتظرك بالمطار قبل الإقلاع ومحتاج ضروري لأوراق كذا وكذا ....وبدأت أجهز نفسي ..وبحمدالله حصلته قبل الإقلاع ...معليش يا جماعة دي تخريمة خاصة ...محبتي