السفر في الخريف ... من أو إلى أبوجبيهه

متعتونا والله يا كباشيى وابو الزهور وابوعلياء تاريكم عجايز كده

ول نوية الظريف ....شكراً ليك إنت لأنك في جواك جميل : عشان كده بتشوف كل شئ جميل : والذي نفسه بغير جمالٍ لا يري في الوجود شئ جميل ...ولك التحية ...وعن السودان الجديد ...طبعاً رديت عليك من التلفون الثابت ...!!؟ أما عن أخوي غريق ...فهذا جميل بطبعه بكل ما فيه ...ونحنا زي ما قلت دقة قديمة ...وننتظر معاً بريد أخونا كباشي اليوم ...كما كنا ننتظر غروب الشمس زمااان عشان نمشي السينما .... محبتي

والله يا الدكتوره يا اخيتى
الكلام سمح خلاص بجيب بنبرى
وبجيب شاهينى بى برادها
اصلو ول امى ده كلامى حلو طب
وخلانى قرم لى اهلى وعيال عمومتى
اخى كباشى النور تحياتى لك ولاسرتك
ولكل اهلى بابونواره وخاصه عزيزاتى مواهب ومريم والتومه واخى الصافى
..اخى شاويش تحياتى لك
ومشكور على التحايا والسؤال
وربنا يجمعنا بكل ناس ابوجبيهة زيك كده
دعواتك معاى .
اها اخيتى الدكتوره جيبى لقيماتك معاكى

حقيقة أن السفر له معاناة شديدة إلى مدينة أبوجبيهة
فلكم جزيل الشكر على طرح هموم المنطقة

[right]سلام للجميع
ياود شاويش وصفي للموقف غرب طاحونة حسن سليمان كان في العام 1968 قبل بوفية خليفة. والحلة من الطاحونة وحتى مدرسة الأولاد الأولية مافيشه وكانت ميدان كورة المدرسة الأولية. لكن الجماعة في زمن نميري قسموها مساكن. كمان الحلة غرب الطاحونة وحتى مكتب الصحة والمستشفى غير موجودة كانت فسحة فاضية برضو.
شرق بيوتكم وحتى المدرسة الوسطى بنين ومدرسة البنات كلها خلا فاضي ماعدا إستراحة الحكومة والنادي الأهلي. المرحوم محمد هجو بعرفه.. بالله وين أخونا عبد المنعم هجو دا دفعة طبعاً.
قلت سهاد عبد الغفار في بلد الضباب هل هي في بريطانيا؟ إن كانت كذلك نرجو ممن يعرف عنوانها أو تلفونها أن يمدني به. تلفوني في لندن
منزل: 02085758145 الموبايل: 07958628102 مع شكري.
في المرة القادمة نحكي لكم عن سفرة لنا مع عمنا عثمان الفكي إلى ملكال.
يا دكتورة شنو طنشتيني كدا عشان قلت ليك بجيكم ولا شنو؟
تحياتي.

يا "عمو " ما طنشتك ولا حاجه بدليل كانتونا ون
بس ببعد من بكين ناحية الشمال الشرقي بحوالي ساعه واربعون دقيقه بالطائرة و7 ساعات بالقطرومن شنغهاي 4 ساعات بالطائرة
راجع بريدك الخاص

[right]السلام للجميع
والله الحكومة شديدة.. أول ما كتبت تلفوناتي في البوست الفات طوالي سهاد الله يديها العافية ضربت لي.. وطلعنا ساكنين في حلة لندن.. وإن شاء الله نتقابل يوم السبت كان الله حيانا.
يا دكتورة قلتِ لي راجع بريدك الخاص ماعرفت ياتو بريد هنا ولا بتاع كانتونا_1 . بتاع هنا غلبني أفتحه وكل ما أحاول بتجيني كلامات كدا بالعنقليزي .. غايتو بتاع كانتونا_1 أسهل لو بتعرفي ليهو
على كل الإيميل بتاعي kelsafi@gmail.com
ونلتقي في البوست بتاع الحكي إن شاء الله.

مشكور على مد أياديك البيضاء النقية للتواصل ...وهذا هدفنا أساساً من هذا المنتدي الجامع ...وأتمني أن تتواصل مع الغالية سهاد وتكون لها سند في الغربة الصعبة ...وسؤالك عن إبن عمتي عبدالمنعم هجو ...هو الآن يسكن حوش مدني ...جوار أبوقمري مع أسرته وأولاده ...وقد عمل بالتجارة ...وهذا تلفونه : 00249904185844 أما عن شرحك لابوجبيهة في الزمن الجميل ...إنت قلت محطة العرديبة ...واعتقد كنت تقصد محطة اللالوبة ...عند منزل عمنا الله يرحمه الشايب ابو قد (بحوش البقر ) ...وإطلاقاً لا أفكر في شئ ..وإنت لم تقل إلا حقائق ودرر أيها العزيز الغالي ... بالله فاكر غرس شجر منتزه ابوجبيهة شرق مستشفي ابوجبيهة ...ولا اقصد النيم الكبار ...بل كنا نحفر الحفرة بقرش واحد ...وسبق أن حكيت ..كان معي أخي المرحوم : فضل الله كوكو ..الله يرحمه ...بدأنا نحفر ومجموعة.... من الصباح حتى ساعة الفطور ...مع جرس المستشفي العريق المميز ...الساعة 9ص ورجعنا عشرة وبنحفر حتي الساعة 2بظ ...وحصيلة كل واحد 3 حفرة أي ب3 قروش ..وحينما مررنا على منزل أخي فضل الله وجلسنا بالقرب من والدته ..وأذكر في عنقريب ...بزوايا ..(مثلثية ) أي غير مستقيم ..المهم سألتنا والدة المرحوم خلاص جيتو من الشغل ..فضل الله قال ليها آي ..وقال ليها يايمة ...حس أنا أجر من دكان منو ؟؟!وكان الإستجرار من الدكاكين مستعراً ...خاصة دكان عمنا أحمدعبدالماجد ..إبراهيم سلمان (من تجملا) ...آه بالجد كانت أيام جميلة حلوة وياليتها تعود ....محبتي

[right]يا ود الشاويش بتعرف نورات .. النون تنطق كيف مش عارف مش نون؟ وعبد الله سعد، وعبد الرحمن التِقِل؟ .. رحم الله زميلانا فضل الله كوكو ..رحمة واسعة واسكنه فسيح جنّاته مع الصديقين والشهداء وحسن أولئك رفيقا. اليوم فقط علمت أنه تُوُفِي إلى رحمة مولاه.
من طرائف سنة أولى أولية: واحد اسمه عبد الرحمن عبد الله من أولاد مساليت. كنا في حصة حساب. المدرس قال: أكتبوا 77. المفتش كان في مرور. عبد الرحمن كان عنده عقده في كتابة الأرقام. لمن يقولوا ليهو أكتب 52 يكتب 25 و67 يكتبها 76. المهم كتب 7 واحدة .. المفتش واقف بقوق عليهو. قال ليهو: ما تكتب السبعة التانية. ردّ على المفتس قائلاً: ما عارف ال7 التانية أكتبها يمين أم شمال السبعة دي؟؟؟؟؟؟؟؟؟؟؟؟ هههههههههههه. المفتش طقشوا كف سينما والمدرس جلده 5 جلدات.
واحد تاني اسمه الطيب ينادونه الطيبون. دا (مقروفة مِنّا جمّة) دي بكلام ولاد إحميد. (يعني فاطي سطر). عندما يقرأ سورة الفاتحة: يقول: بسم الله الرحمن الرحيم. الحمد لله رب العالمين. الرحمن الرحيم. الملك القدوس السلام المؤمن. ترك المدرسة من سنة أولى. لا أعرف أين هو الآن.
نلتقي مرة تانية إن شاء الله.

[right]الإبن زهير حسن
السلام عليكم ورحمة الله وبركاته. في البداية أنا عمك بحكم العلاقة مع المرحوم فهو بعدنا في المدرسة والعلاقة كانت حميمة معه رحمه الله رحمة واسعة. كيفك مع كُدُقلي المديرية؟
سأرجع السودان في منتصف أكتوبر إن شاء الله. الحال مطمئن بإذن الله. نتمنى أن يكون الموشم مُبشِّر.
تحياتي لك ولكل من معكم.

شكراً عمنا كباشي النور بس نحن روحك الشبابية الحلوه دي خلتنا محتارين في التسمية

يا جماعة الخير كتبت مداخلة كاملة وارسلتها وهسع ما لاقيها بعد ما ظهرت لي كدي شوفوها لي وين أو وروني أفتشها وين؟ تحياتي

[right]هذا البوست تتمة للبوست الضاع في مجاهل هذا المنبر.. وعليه نحكي من هنا ولقدام.
في ملكال جانا زول يعرفه عم عثمان الفكي. الزول قال عنده بنقو عاوز يوديهو الخرتوم لكن كان سافر بالباخرة بقبضوا في كوستي وعشان كدا عاوز يسافر عن طريق أبو جبيهة. رفعنا الجوالات في اللوري. وقمنا من ملكال العصر. وصلنا كاكا التجارية حوالي الساعة العاشرة مساء. طبعاً دا وقت متأخر جداً في ذلك الزمن. وقفنا قدام نقطة البوليس عشان نسجل حضور وقيام حسب القانون. العساكر نايمين. جونا 2 نص نايمين ونص صاحين. سلّمنا عليهم. كلهم يعرفون عثمان الفكي. أحدهم سأله: شاحن شنو؟ ردّ عم عثمان: شاحن بنقو. العسكري: موديهو وين؟ موديهو أبو جبيهة. العسكري: خلاص أمشي الله يستر عليك. عم عثمان: يا أمباشى فلان إنت ما مصدِّق؟ هاك القندول دا. كان هنالك قندول بنقو يرقد في الطبلون. العسكري طلع لقى العربية شاحنة حِبال وشوالات. قال لعم عثمان: يا أخي إنت شاحن حبال تقول شاحن بنقو؟ قال لعم عثمان: يازول خلاص أمشي نحن عاوزين ننوم. عم عثمان: الحبال الشايفها دي كلها بنقو. أنا كلمتك يا أمباشى وبعدين لو قبضوني بقول إنت أديتني إذن. على كيفك. وطلعنا على أبو جبيهة.
طوال هذا الحوار صاحب البنقو قطع موية ونور. تحركنا من كاكا ولم يفتح الرجل فمه لحد ما وصلنا حفيرة اليوي يا زهير. إلتفت لعم عثمان قائلاً: يازول قصدك شنو؟ رد عم عثمان: إنت ما عندك راس. الحبال بنوديها من ملكال لأبو جبيهة بسووا بيها شنو؟ عندنا الحبال راقدة من كاونارو وكلوقي.
وصلنا أبو جبيهة. الرجل قال لعم عثمان: أها أعمل شنو؟ ردّ عم عثمان: أمشي لخليل حتيلة داك يشحن ليك الحبال للرهد. الزمن داك السفر كان عن طريق الرهد.. لسع كوستي ما ظهرت. الرهد أم روابة تندلتي أم صميمة الدويم أم درمان. الكبري كان ما فيش.
عم عثمان مشى لعمنا خليل حتيلة وقال ليهو كان جاك واحد عنده حبال ما تشيلها ليهو الحبال مليانة بنقو. الراجل مشى لعمنا خليل حتيلة وقال ليهو عندي حبال موديها الرهد. عمنا خليل قال ليهو ما في عربات للرهد.
الزول تاني رجع لعم عثمان وقال ليهو الكمسنجي تقول شمّ ريحة البنقو قال مافي عربية ماشا الرهد وعيني في العربيات كلها شاحنة.
عمنا عثمان قال ليهو أمشى ركن السوق الشمالي الغربي تلقى واحد اسمه سحنون تاجر جلود أشتري منه كم طرد جلود وجيبهم. الراجل مشى إشترى الجلود. قال ليهو: عبي البنقو في الجلود. وعلى بركة الله.
الراجل شحن البنقو في الجلود وسافر بالسلامة لحد الخرطوم وما جاتوا عوجة.
رجع ابو جبيهة لعم عثمان قال ليهو: على الطلاق إنت مجنون رسمي بس ما عندك أهلك يعالجوك ولا يودوك لفكي كارب يربطك.
المرة الجاية عن سفرتنا بلوري عمنا الحاج علوان والجماعة أكلوا الرغيف بلبن الحمير ومعاه بطيخ. تحياتي.

[right]كنا مجموعة من طلاب الجامعات والمدارس الثانوية وبعض من ناس أبو جبيهة. ركبنا لوري عمنا المرحوم علوان جبر الدار الهينو. وصلنا أم صميمة وهي قرية كبيرة بها قهاوي ومطاعم شمال تندلتي. وصلناها حوالي العاشرة صباحاً. مواعيد الفطور. كان من ضمن المسافرين شقيقي محمد النور. لقينا الفطور عند ناس المطاعم رغيف بلبن وبطيخ العلج. سأل محمد النور صاحب المطعم: لبنكو دا لبن شنو؟ رد الرجل: لبن بقر. محمد قال: بقركو يين حالِتن وما شايف لي عجّال صغار مربوطات.. بلا المحمرية (صيغة منتهى الجموع لكلمة حمار - أكرمكم الله- ما شايف لي حيوان عندا لبن.
أنا ومحمد وزولين 3 تانيين ما أكلنا الفطور. شربنا شاي سادة ببسكويت. الجماعة ضربوا الرغيف باللبن وأكلوا البطيخ العلج وشربوا الشاي. دورنا عاننين تندلتي. وصلناها الساعة 3 م يعني ساعة الغداء. الجماعة كلهم منفوخين Full واحد قدر ياكل معانا مافي، إلا نحن الجماعة الما فطرنا في أم صميمة.
قالوا والله نحنا منفوخين تب. محمد النور قال ليهم: من الله ما خلفكوا شفتوا ليكو لبن بقرة بنفخ ليا زول؟ الداهي لبن حمير وإتُّوا ما سمعتوا كلامنا. الجماعة صدقوا وبطونهم طمّت.
الحقيقة هي أن اللبن لبن بقر طبعاً، لكن البطيخ العلج بتاع شمال كردفان بنفخ الزول شديد ولمن تشرب عليهو اللبن بتكون تميت الناقصة ولهذا الجماعة كلهم إتنفخوا بالبطيخ.
تحياتي وإلى اللقاء في بوست آخر.

كباشي الصافي كتب:[right]من طرائف سنة أولى أولية: واحد اسمه عبد الرحمن عبد الله من أولاد مساليت. كنا في حصة حساب. المدرس قال: أكتبوا 77. المفتش كان في مرور. عبد الرحمن كان عنده عقده في كتابة الأرقام. لمن يقولوا ليهو أكتب 52 يكتب 25 و67 يكتبها 76. المهم كتب 7 واحدة .. المفتش واقف بقوق عليهو. قال ليهو: ما تكتب السبعة التانية. ردّ على المفتس قائلاً: ما عارف ال7 التانية أكتبها يمين أم شمال السبعة دي؟؟؟؟؟؟؟؟؟؟؟؟ هههههههههههه. المفتش طقشوا كف سينما والمدرس جلده 5 جلدات.
واحد تاني اسمه الطيب ينادونه الطيبون. دا (مقروفة مِنّا جمّة) دي بكلام ولاد إحميد. (يعني فاطي سطر). عندما يقرأ سورة الفاتحة: يقول: بسم الله الرحمن الرحيم. الحمد لله رب العالمين. الرحمن الرحيم. الملك القدوس السلام المؤمن. ترك المدرسة من سنة أولى. لا أعرف أين هو الآن.
نلتقي مرة تانية إن شاء الله.

هههههههههههههههه
يستاهل والله

[/right]عمنا المرحوم قرينات من الشخصيات الفكاهية المرحة جدّاً، كما أنه فارس لا يشق له غبار ويعتبر من فُرّاس أولاد حميد. جاء يوماً مارّاً بمكتب عمنا حاج خالد مكتب التعليم الحالي. وكان هو مكتب الحكومة الرئيسي في أبو جبيهة حيث رئاسة المجلس في رشاد. وجد لوري واقف وملان شيوخ كبار من الحوازمة من كلوقي. سألهم: ماشين يين؟ نحن مقبوضين مودننا رشاد. ركب طوالي في اللوري ونادى واحد من العيال الصغار وقال له: أجري بيتنا هناك خلى مرطي تديك توبي.. أنا ماشي رشاد. البوليس حاول ينزله من اللوري. حلف بالطلاق ما ينزل إلا يمشي السجن مع الحوازمة. قال لهم: باكر الحكامات يغنن يقولن الحوازمة الحكومة قبضتهم وودتهم رشاد وولاد إحميد ما معاهم .. بطلاق بت كورينا ما أنزل. وقد كان. فقد قضى شهر سجن في رشاد بدون سبب، إلا سبب أن الحوازمة يدخلوا السجن وولاد إحميد ما معاهم. بقي أن تعرف أن الحوازمة المقبوض عليهم هو شيوخ الحكومة الذين لم يسددوا الطلبة ولذا قبض عليهم المفتش وارسلهم لرشاد. نواصل

[right]زرت بنبان بحري بمصر مسقط رأس كل أعمامنا الجعافرة بابو جبيهة، وكان ذلك بداعي العزاء في وفاة المرحوم عمنا حسن إبراهيم. تكرّم عمنا حسين إبراهيم مدّ الله في أيامه بأخذي لمعاينة كل المدينة التي تشبه أبو جبيهة وقابلت كل الناس هناك من أقرباء أهلنا الجعافرة. لفت نظري أخ عمنا سيد مصطفى شبه شديد حتى الجلابية والعمه. أما الشئ الذي أزعجني عند جعافرة بنبان بحري فهو الكرم. يمكن ان نطلق عليه الكرم العجيب. عندما علم الجميع أن شخصاً من أبو جبيهة زار بنبان بحري لواجب العزاء وصلوا كلهم وعزّوني لأنني من أهل المرحوم في أبو جبيهة. كل من أتي وجّه لنا الدعوة للغداء أو العشاء معه. لو جلست شهر في بنبان ما كنت أقدر ألحق عليهم كلهم. إضطر عمنا حسين يخليهم يجيبوا الغداء في البيت. يقوموا 2 يجيبوا غداهم وإليك قائمة الطعام:
دجاج محمر (لاحظوا صفة الجمع) - سمك - لحم محمر - شية - ملوخية - بامية - دمعة - ضلع - كوستيليته - ورغيف بالقفة. دا كلو في صينية واحدة والصحانة زي صحانة الباشري الكبيرة ديك. وتصور في كل وجبة غداء بتجي صينيتين وفي العشاء مثلهما. بإختصار الأكل البجيبوا يشبِّع ما لا يقل عن 30 نفر. والمصيبة هم لا يأكلون مع الضيوف. الأكل حلو لكن الكترة مزعجة. وكل السلطات بأنواعها بيضاء وسلطة أسود وسلطة خضراء.. وبصل كتير. لمن تشوف الأكل بتشبع وما بتقدر تاكل.
نسيت أن أقول لكم بعد نزولي من القطار قابلني عمنا حسين والفاتح عثمان حتيلة. وصلنا مدينة دراو. وفي وكالة كبيرة وجدنا رجل قريبهم اسمه الحاج أحمد على ما أعتقد. سلّم علينا وغادر لأنه مرتبط. وقال تفطروا هنا بعد داك تمشوا بنبان بحري. لانها غرب البحر. جابوا الفطور.. بتاع عزومة على أقل تقدير يفطِّر 25 نفر. وكنا نحن 4 أنا وعم حسين والفاتح وإبن الرجل -نسيت اسمه-.
في البوست القادم نحكي لكم قصة الحلب.
ا

[right]كما ذكرت تكرم العم حسين بأمر فسحتي في بنبان بحري. من المناطق التي زرتها منطقة المساليب. والمساليب هؤلاء ما يمكن أن نطلق عليهم الحلب. عندما شرح لي عم حسين كل شئ عنهم قلت له: شوف يازول لو تاني في زول قال لواحد منكم حلبي وروني ليهو وخلوا القضية علي. صدقوني كلمة حلبي التي عرفت معناها الحقيقي لا تقل عن أن تقول لزول سوداني: يا عب أو ياعبد. بل هؤلاء المساليب أو الحلب أقلّ منزلة.
ولهذا عرفت أن عمنا المرحوم مهدي عبدالمنعم كان لا يقبل هذه الكلمة أبداً، لكن عمنا عبد الله حلوف - من ناس ابو نوارة، وردت سيرته في بوست آخر في مكان منفصل .. أضحك عمنا مهدي عليهم الرحمة جميعاً بعد أن قال كلمة حلبي. القصة تقول: جاء عمنا حلوف لدكان عمنا حسن إبراهيم ، لم يجده سأل الحضور: الحلبي دا مشى يين؟ ردّ عليه أحدهم: دقش السوق. سأله عم مهدي: الحلبي منو؟ رد حلوف: ما حسن إبراهيم في حلبي تاني غيرا هني؟ في اللحظة وصل حسن إبراهيم، سأله حاج مهدي باستنكار: يا حسن إنتو بقلولوا ليكم هنا الحلب؟ سأله عم حسن مستفسراً: منو القال كدا؟ ردّ عم مهدي مشيراّ على حلوف، الزول دا. أخذ حلوف زمام الحديث وسأل حسن إبراهيم: الزول دا بتعرفا؟ حسن قال: دا عمي. سأله حلوف جا من يين؟ رد حسن من الأبيض. سلّم عليه وسأله: إتا اسمك منو؟ اسمي مهدي، كيف تقول على حسن إبراهيم حلبي؟ سأله حلوف: إتا بتعرفني؟ رد عم مهدي قائلا: لا.
أنا اسمي عبد الله أحمد لكن ولاد إحميد بنادوني عبد الله حلوف. أنا حميدي ولكن في ولاد أحميد من الشعيبات. بقولوا لي: شعيبي. والزول القاعد: حميدي من ولاد أحمد بنقول عليا: حمدي. والزول داك حميدي من ولاد عسكر بنقول عليا عسكراي. وحسن إبراهيم دا من ولاد احميد خشم بيتهم حلب بنقول عليا حلبي.
سأله عم مهدي: يعني حسن إبراهيم حميدي؟ رد حلوف: ما حميدي جنسا شنو؟ إتا عندك ليا جنس؟ سأل عم مهدي:حميدي كيف؟ رد حلوف: رقد معانا في الخندق سنة دوستنا مع سليم ودفع معانا في الدية لمن كتلنا الناس. تاني هو الحميدي كيف عندا وسم؟ توا أنهن الحلو لينا حسن إبراهيم يكتل ليا زول في السوق دا ويشوف رجالتنا.. أهل الزول المكتول كن داروا الدية ندفع ليهم بقر بُيض وكن داروا الموت نموت معاهم.. عندك كلام. عمك مهدي: أعوذ بالله أعوذ بالله دا كلام شنو يازول. خلاص يا زول حميدي حميدي ما قلنا حاجة. وضحك الجميع.

كباشى النور الصافى يا رجل يا رائع.
أمتعتنا كثيرا بسردك الجميل.
بس واصل وما تفطمنا.
أقترح فتح بوست جديد لحكاوى أخونا الكبير كباشى النور.

كباشى طبعا قاص من الدرجه الاولى وله زاكره ما شاء الله 00نحنا منتظرين باقى الحكاوى عن سفر الخريف

اثني رأي الاخ عوض السيد

قمة الابداع في السرد ...
لي مع حفير اليوي زكريات ...وحكاوي مع اهلي الكرام اولاد نصار ...زكرت جزء منها في بوست اخر ...
تشكر عمنا كباشي

[right]السلام عليكم ورحمة الله وبركاته
عارف يا أخ غريق حكاية الذاكرة القوية دي عجيبة شوية. أنا أتذكر كل ما حدث لي في الخمسينيات والستينينات والسبعينيات وإلى حد ما الثمانيات من القرن الماضي .. لكن اليومين دول بقيت ألاقي الزول وبعد اسبوعين أنساه.. دخل الما بِدّاوا...هل تصدِّق لو قلت لك أنني لا أتذكر بل أرى أمامي ذات يوم جمعة ممطر من خرائف أبو جبيهة الكتيرة ونحن تلاميذ في تانية أولية أن العم المرحوم عبد الرحمن آدم أعطاني أب قرشين (كان اسمه الفريني) كمصاريف.
ولا أنسى كيف شلت الورقة المليانة عند القرعة للدخول للمرة الأولية بمساعدة الناظر المرحوم عبد الرحيم راضي في العام 1958 ..

للذين يطلبون مني مواصلة السرد والحكي .. سوف أرجع الخرطوم قريباً إن شاء الله وربما لا يتسع الوقت للونسة بنفس المستوى في لندن.. المشغوليات في الخرطوم كتيرة والنت كمان بطئ ومزعج.. لكن سأحاول ما أمكنني . مع تحياتي.

نذكرك ببعض السواقين عبدالكريم مصطفي وعبد العزيز أحمد فضل الله وإبراهيم هنجو هنجو وإبراهيم شكنيبه وعمر بشير ومحمود الجمل وتجاني موسى وعثمان سرالختم والجيلي بخيت ومدني وأبودقن ومحمدي وحامد مهنا ومكي مهنا وأحمد عبدالصمد ومنصور محمدعلي أبو عوض منصورومن المساعدية الرشيد سعد وبرغوت سعد وزميلنا محمد أدم إمام عثمان (سمجدو) وود أب قرعة وودالضابط أزيدك ولا كفاية
فضل الحاج

سلامات يا صاحب البوست الجميل
طبعا حصل لى الشرف وقابلت اخى وخالى
كباشى وكانت دقائق بسيطه من الزمن
نسبة لمشغوليته
ولكنها كانت تعنى الكثير بالنسبه الى
كانى قابلت كل اهلى الطيبين من ابو نواره الى عد الدم
وومن ابوجبيهة الى امدرمان
ووعدنى بانه حيصلنا فى البيت
وانا سعيده بيه وسعيده بالمنتدى
الجمعنا مع اهلنا
وربنا يرد غربتنا
وتحياتى لجميع

ربنا يجمع شملنا دائماً ...كإخوة وأخوات وأبناء إنضموا لهذا المنتدي الجامع من أجل المحنة الأخوية الصادقة ..والتواصل ...وما يثلج صدري أننا إخوة نحترم بعض تماماً ونقدر ونعز بعض ...ونشكر القائمي على أمر هذا المنتدي.... ولثمرة مجهودهم الكبير المقدر ...ونشكر الله كثير على هذا الإخاء الصافي النقي الودي والذي لا تشوبه شائبة ...وصدقوني أنا بكتب الآن ودموعي أبت أن تقيف أبداً ...لأنني ألتقيكم هنا كإخوة واخوات وأبناء وربما لغياب بعضنا عن الآخر لأكثر من 30 عام أو أكثر ...وأنا جد سعيد وفخور بهذا اللقاء...وهذه المودة الصافية التي تجمع بيننا ...وربنا يحفظكم لنا جميعاً والله لا يحرمنا منكم .... محبتي

تسلم يا ابو علياء

طبعاً يافردة يا كبتل كيه عارفك تكون مابتذكر عمك خدورة أم بشق فحملت اسمه وبدعو له بالرحمة واسأل الله دوماً أن يغفر لنا جميعاً في مشاغلاتنا له. طبعاً إنت نسيت شلة كبيرة وهامة من السواقين منهم عمر بشير وأحمد عبدالصمد ومحمود الجمل وعبدالعزيز أحمد فضل الله وإبراهيم برتاوي وعبدالكريم مصطفى وتجاني موسى وودالضابط وابراهيم هنجو هنجو ومنصور محمد علي وحامد مهنا ومكي مهنا وعثمان السر واب دقن ومدني والجيلي بخيت ومحمد حمزة سواق كوكو الطيب الودانا رحلة الرهد المدرسية ونحن في رابعة وسطى وعبده إدريس وأحمد عبدالله ألكع وعلي جادالله وصالح اللط سواق أب اربعة حق حسن غربال وغالب عبد السلام وإبراهيم شكينيبه سواق الناظر عبدالرحيم وعثمان التوم أبونخيلة وكشيب سواق عمنا حسن أبوزلازل سواق أم طيارة والبقرة حقت أبوزلازلوالسواق الشايقي الذي ساق أول سفنجة مشاركة بين حاج كوكو ومصطفى الشفيع ولقبها عطا المنان الطاهر بت عيسى وكان عارت بي أنا وشيبة أبوزلازل في مقرح العباسية وكان سايقها محجوب بنجوس وهو وعطا المنان من السواقين المهرة وبت عيسى ونمرتها 1309 خ والتي آلت لعدد من المالكين وكما أخاف الكضب للآن شغالة.و أم من المساعدية الكبار مش مساعد حلة علوبة وقدوم كلب ومحمد أب رفارف وأخوه سمي جدو الكبير وكذلك إبراهيم قرض ومحمد حمزة حسن كنونة وثاني إدريس وآدو إدريس وزميلنا محمد آدم إمام (سمي جدو الصغير) وحسن الفاضل راس الفلو وبرغوت سعد ومن المساعدية الصغار عبدالرحمن صالح عبد الماجد أب تكة وحسن شريف والرشيد سعد .... أزيدك ولا كفاية
تخريمة على نافلة اسم أم طيارة هل بتذكر أم طيارة المرة الطويلة الزرقا كنا بنقول ليها طررررر يعني تصغير لأم طيارة تقول لينا تتطيروا ما تركوا... وياها الطيرة الودتك انجلترا وانا في جزيرة في نص الخليج أصغر من جنينة عمنا خليفة محجوب

وطبعا يا كباشي ما زالت علاقتي بابراهيم حسين جعفر متواصلة وبتذكر أدق تفاصيل أيامنا معه في أولى وسطى من المعرض الذي أقمناه ونحن في أولى ومعه المسرح الذي أدخلنا فيه تور في المسرح كان راكب عليه على حمودة وشايل حربة ممثلا لقبائل البقارة في بانوراما القبائل السودانية والشيخ فضل الله أتى راكب حمار ممثلاً للقبائل التي تسكن قرب أبوجبيهة وخاف الحمارمن الجمهور وحرن والشيخ يضرب فوقه فما كان إلا أن بعَّر الحمار في المسرح والناس وا من الضحك ودخل الشيخ في موقف حرج ولكن تخلص من الموقف بسرعة بديهة لا يخطئها إنسان فقال للحمار انتظر الليلة أقسمك قسيم لمن يجي دور تقسيم الحمار في فقرة اعتاد أن يقدمها الشيخ فضل الله وكان من شدة سرعة بديهته لو نظر شخصية من الحضور لم تكن في حسابات تقسيمه للحمار يؤلف له تقسيمة وهو على الهواء مباشرة .. والله أيام يازمان

وانت كذلك يا فضل لا تخطئ روعتك العين.
الله يديك العافيه يا ابو مصطفى.
ما داير أسميكم ناس زمان لكن مافى كلام انتو جيل من دهب ما شاء الله تبارك الله

شكرا على هذه الروعه يا فضل وكباشى

[right]بعد السلام
من طرائف عمنا عبد الكريم دين كما كانوا يسمونه آنذاك.. كانت الرملة شديدة وسط سوق الرهد.. والسواقين البحارة بخافوا من الرمل والطين على السواء. كان هنالك عتالة من هوسا الرهد قاعدين في ظل الميماية.. وعمك عبد الكريم دوّر لوريهو وحاول يتحرك.. اللوري رترت في القيام.. طلّع راسو بالشباك وعاين للستك الخلفي..
واحد من العتالة قال لصاحبه: وننق بحاري ..ردّ عليه عمك عبد الكريم: وننق أيمان دين.
بسم الله ما شاء الله .. والله يا عزيزي فضل ذاكرتك قوية .. الناس دي كلها أنا عارفها لكن طاروا من راسي خاصة عمنا عثمان التوم لأنه كانا بنمشي معاهو الجنوب كتير بنودي العيش كاكا وكدوك. وكذلك عمنا صالح اللط وطبعاً الإسم دا قطعوا له عمنا عبد الله حلوف .. من أبو نوارة وقد كتبنا عنه من قبل.
وعبد العزيز بوتفليقه .. وعمك محمود الجمل وإدريس الزعيلان.. دي كلها أسماء قطعها عمنا عبد الله حلوف رحمهم الله جميعاً. تحياتي لك والعيال.

يا سلام يا خدورة على السرد والتاريخ الرهيب.....يا اخى ات ما تكثر لينا من التاريخ دا بدل ما تزازى بينا فى الرياضى....مشكورين يا كباشى وما أحلى الذكريات

ويظهر يا كباشي إنك نسيت باقي قصة عبدالرحمن عبدالله عن كتابة العدد 77 إنما طلب المفتش واسمه عبدالعزيز طلب من يكتبها فقام عبدالباسط محجوب وهو أقصر طالب في الفصل وجاوب الإجابة صحيحة وكتبها على السبورة فما كان من المفتش عبدالعزيز أن قال لعبدالباسط محجوب أديه كف وعبد الباسط قصيِّر وعبد الرحمن عبدالله طويل وهو ألفة الفصل فما كان من عبدالباسط إلا أن طلع في الكنبة الأولى وهي بتاعتنا وبقى طول عبدالرحمن عبدالله ورصعه كف حاروالكنبة الأولى كنت أجلس فيها أنا وموسى مهدي والخير مختارأبونخيلة (عايد) ورحمة النور الكالوباوي صاحب قصة ألم نجأل ألم نجأل وطبعاً المقصود أم نجعل كيدهم في تضليل وخامسنا في الكنبة مكي النور ود القردود.

وينك يا كبتل K

عاوزين سفريات خريفيه ومعانات ناس زمان وقصص الاوليه 00

الزعيم غريق لك الود...
يعني بتقصــد ايام الطحنيه و المـجوز
يالله إنت ابدا لينا ....
تعريجه......
ذكرتني واحد مغترب رجع بعد زمن وعزموهو عقد ... ركب أول عربيه طالعه العقد ... العربيه وقفت جنب الجامع آخر ونسه وقهقهه... جا واحد شاب قال ليهم شنو ياجماعه ؟؟ منتظرين شنو ؟؟؟
نــطا المغترب قال ليهو ... الناس الكبار..
رد الشاب بسرعه ..... ماإنتو زاتكم الناس الكبار الأنحنا منتظرنهم..
يالله يازعيم.... أبدا ...وبعد كم شهر كده كان ألله مدّ في العمر أنحنا بنلحقك ....
خالص الود عزيزي ....غريق

طيييييب نبدأ يا الفاتح وانا رضيت بالعجيز يلى نبدأ العقد


فى عام 79قررت بعد التشاور مع الوالد ان اسافر الى السعوديه او ليبيا واترك الدراسه وكنت فى المتوسطه فى ذاك الزمان والفكره كانت جميله وبالاخص انها تقرب العرس والكلام الزى ده وفى الزمان داك كان المغترب هو الطالع فى الكفر ؟؟؟؟؟؟؟؟

وافق الوالد وللترتيب للسفر قام طرد(وطرد دى يا جماعه معناها عرض شى من البهائم للبيع!!!!طبعا كلمه بقاريه خالصه)

وجبنا التور المطرود الى ابوجبيهه والدنيا كانت خريف فى شهر اسكت طبعا ده شهر كم معروف للحباكيين!!!!!!!!!!!!!!

بعنا التور الى عمك البدرى الزين بمبلغ 80جنيه الوالد شال عشره لزوم المصاريف واعطانى الباقى لكى اسافر الى الخرطوم ومنه ابحث عن السفر لى قدام وانتظرت لاكثر من اسبوعين لكى اجد آله ماشه قدام لم اجد وكنت اتردد على دكان عمنا المرحوم خليل حتيله حتى قيض الله لنا عربه اجرها المتعهد لترحيل طالبات معهد معلمات الابيض وبنات مدرسة كادقلى الثانويه بنات !!!!!!!وكانت العربيه هى عربة المرحوم شيخ الدين الكلم وكان هو بنفسه السواق وكان المساعد الكبير هو الدور الجاى والمساعد الصغير هو محمود ابوكليقه(كلك)والعربه كانت تحمل اكثر من ثلاثين من الطالبات وطبعا شنط الحديد والمقارين بتاعت الصفائح ديل براهن شحنت لورى ومن الرجال لم يكن الا انا وعمك المرحوم حاج خالد البشير وكان فى ذاك الزمان هو صراف فى المجلس وذاهب فى مهمه خاصه بعمله وكان راكب مقعد امامى (اعنى راكب فى امضلاله)


وطبعا انا الركبنى مع البنات وفى عربيت الترحيل ده عمنا المرحوم خليل حتيله وطبعا ركبت مع المساعديه فى السبت(التنده)


وطبعا ناس البلد كلهم اتجمهرو فى وداع البنات ووداع الفارقو وكان معظم البانات طالبات فى معهد معلمات الابيض وكثيرات يحكن عن هذه الرحله وكان من ضمن الطالبات بنات ابونواره البقرن فى كادقلى


وحوالى الساعه حداشر تحرك اللورى طبعا القيام لاذم يكون قيام محسى ومعاه تقطيع للجاز وصفافير ودييييييييييشك ونصائح الجماعه كانت يلا ياجماعه اتحركوا آخر النهار مطر


فى هذا الجو تحرك بنا المرحوم شيخ الدين بعربته الفارقو متجهين الى رشاد

يلا وبعدين نواصل ونحكى ليكم عن النبقايه وكيف انزرعنا فيها ومواقف طريفه مع الدور الجاى وابوكليقه

اها سكنا في البوست ده منتظرين

وابه كباشي روح وين؟

واصلنا السير الى طيبه وكانت اولى عقبات المعاناه وحلت العربه وكلك والدور الجاى نزلو وطبعا جعلنه ساكت نزلت معاهم وهاك يا حفر وغرف مويه من المجرى وردم بالتراب اليابس وشيى عيدان وقش وهووووب الفارقو مرق وركبنا ونحن منتشين للإنجاز وطبعا بالاخص العربيه شاحنه بنيات وكده 0000واصلنا المسير حتى النبقايه وهى المنطقه التى بين كريمه وارمياه وبالضبط فى محل المعهد الدينى الان 000وجدنا هذه المنطقه سايله مويه ونزلنا الركاب ويلا الفارقو تف الطين وطبعا تقطيع جاز عجيب وتعاشيق جد بعد شويه الفارقو وحل وبدأ يرازى ورا وقدام 0000ودل قطع عمودجنب واللورى بطل خلاص الشقلانه جاطت 000حفرنا المجرى وبصعوبه بالقه تم تغير العمود بواحد جديد طبعا زمان اى عربيه مسافره فى الخريف لازم تشيل معها كميه من قطع الغيار 00وبعد الفراغ من العمود العربيه ابت تدور وهى وحلانه لايمكن ان ندفرها 00وبطريقه غريبه تم رفع اللستك الخلفى وتم ربطه بحبل ويلا (واحد اتنين تلاته)وبوووور دورت وحمدنا الله على نعمت الدواره ويلا هاك يا مرازه ورا وقدام وطبعا جوع جد والشراب من المجرى مرقت العربيه بسلام من الوحله الاولى والساعه بقت حوالى الاربعه عصر ونحن لم نصل دبيكر وطبعا استمتعنا جدا رغم المعاناة والجوع بتعليقات الدور الجاى الساخره وانفعالات كلك من فتره واخرى مره العربيه وحلت وحله خفيفه وصاح ابوكليقه ياخى انت ما تعمل ليها السرى 000الدور الجاى قال ليهو السرى الخلفى ولا الامامى يا كلك ؟؟؟؟؟؟؟؟

ومره اتشاكلوا المساعديه بيناتهم وكلك طلع السبت عندو فرده وسخااااانه جراها وقام راجع على ابوجبيهه والمرحوم شيخ الدين قال لينا الحقو محمود ده رجعو وإلا جيديه تقعد واخرى تقوم حتى اقنعنا ابو كليقه بالإستمرار فى الرحله 000بعد معانا وقريب المغرب وصلنا تجملا وجرى على السوق وطبعا تجملا فى ذاك الزمن ما كان فيها مطاعم وانا من العربيه ما وقفت فى السوق جرى لبيت خالى المرحوم محمد توم وهاك يا كسره وهاك يا شاى وجيت راجع والعربيه مليانه بنات وتحركنا نحو رشاد وطبعا وحل مافى تانى ووصلنا رشاد حوالى الساعه 9مساء ويلا يا مطاعم وهاك يا فول وفتت وبتنا فى رشاد الليله الاولى على امل ان نواصل الى الرهد عبر طريق تاجلبو



نواصل

ياخي شوقتنا ...بأسلوبك الجميل ...الغير مكلف ...وتترك الكلام على عواهنه...وهذا أحلي شئ ...وصدقني أفهم أي حرف تكتبه وتقوله ...ولو قلت أررررو ...أعرف الفارقو دور...تسلم ...تسلم ويالله في إنتظارك ...ومعاك الجكس وكده ....محبتي

اجمل شئ يكون الإنسان علي طبيعتو دون تكلف ....وهذا ماوجدته في سرد أخوي غريق الجميل لا أدري لماذا لم يخطر ببالي علي المرور بهذا البوست الجميل
تعرف ياغريق أستمتعت معك بهذا السرد الجميل دا كيف؟ وكأني معاكم في هذه الرحلة الجميلة رغم معافرتها
كده ننتظر من رشاد للرهد ماذا حصل؟

شكرا ابو علياء والفاتح وول نويه مروركم جميل وسوف نواصل

بتنا فى رشاد 00وفى الصباح تحركنا عن طريق المقرح متجهين الى تاجلبو والمقرح بالقرب من رشاد حاجه مخيفه والحمد لله انحنا كنا نازلين وطبعا الفارقو ما فيها فرمله والمساعدين وانا معاهم شايلين الكتل ومبارين الفارقو وكلما العربيه شدت شديد نديها كتله !!!!!!!!!!بحمد الله نزلنا الى الواطه وواصلنا السير ودخلنا بطريق الموريب ووصلناها حوالى الساعه 12وفطرنا وصلينا الضهر واتحركنا فى اتجاه سدره (جبل الداير)00ماشين كويس وطبعا المنطقه جبليه ومستمتعين بركوب السبت (التنده)وجئنا فى خور صغير (شخاخه)وقوم يا سواق خلى العربيه تبطل وهاك يا سب من المساعديه 000ياخى دى حته هسع تخلى عربيه تبطل فوقو وانت عارف عربيه ما تقوم إلا دفره (طبعا ده كلام الدور الجاى )وصاحبك كلك بجرجر فى الدال ساكت وزول بتكلم معاهم مافى والبنيات سكتن ساااااى تقول صبت فيهن مطره000نزلنا العفريته والحبل الطويل ورفعنا اللستك ويلا هوووب بررررررررالعربيه دورت وانطلقت اسارير الجميع وسمعنا صوت البنيات وواصلنا 0000قريب المغرب وديك قرية كالنج العربيه وحلت وألكوكرت فى مجرى تركرك نزل الجميع وبدأ المساعديه فى العمل وبإقتراح من عمنا المرحوم حاج خالد ذهبنا مع البنات الى الحله قرية كالج اقترح لنا عمنا خالد ان نذهب الى الزاويه 000استقبلنا شاب فى العشرينات من عمرحه ومشى قدامنا الى منزله وهنا تتجلى عظمة الانسان السودانى النبيل استضافنا هذا الشاب واتى بتيس وزبحه وهو له زوجتين وبمعاونه من البنات طلع اللحم والشعيريه باللحم والشاى وانا رجعة للعربيه ومعى مضيفنا وهو يحمل صحن كبير مليان لحم وشعيريه للجماعه الثلاثه الفى العربيه ووجدناهم قد بلغ بهم الجوع مبلغ واكلوا حتى شبعوا وواصلوا العمل ورجعنا نحن الى مضيفتنا ونمنا فى كرنك داااافى حتى صباح الغد ووجدنا العربه قد فك الطين اسرحا وجاهزه للسفر بنا صوب جبل الدائر بعد ان شربنا الشاى باللقيمات تحرك بنا الفارقو فى رحله شاقه نحو الجبل البعيد


نواصل