ضيف الأسبوع

أعزائى أحباب منتدى ابوجبيهه.
يسرنى أن أقدم لكم ضيفنا السابع فى نافذة ضيف الاسبوع التى نستضيف فيها سعادة الكمندان/أمين منقه.
الى الحوار:-----------------
1- الاسم رباعى:-
2- الحاله الجتماعيه:-
3- المراحل الدراسيه:-
4- الدورات الداخليه والخارجيه:-
5- العمل:-
6- الرتبه:-
7-الاقامه الحاليه:-
8- الاهتمامات:-

..... باختصار .......
* ماذا استفدت من العسكريه
* أولاد عمر منقه حاضرى البديهه(ماذا تقول)
* ما بين ابوجبيهه وبورتسودان

..... فى سطور .....
* شخصيه فى الذاكره
* موقف لن تنساه
* كيف دخلت العسكريه

..... أمين منقه قبل العسكريه وقبل الزواج.....

..... شوية سياسه ......
الصالح العام قرار سياسى يهدد استقرار العسكريين والمدنيين غير الموالين للنظام الحاكم...... هل تعتقد أنّ هنالك أسباب أخرى؟


..... كلمه أخيره ....

إختيارك منتاز ... محبتي ..

ننتظره..... اتصلت عليه بالأمس وطلب التأجيل الى اليوم ربما من أجل المذاكره.
على العموم هو قادم

أي مذاكرة ...وضح ...وسرحنا معااااك ...محبتي

- الاسم رباعى:-محمّد الامين عمر اسماعيل (امين منقة)

2- الحاله الجتماعيه:- متزوج والحمد لله من بت العم الاستاذة (أم ولاء) رزقت من البنات :- ولاء (خريجة ترجمة ولغات فى جامعة الرباط)- وائل بالهند اول سنة
لدراسة ادارة الاعمال في تخصص (shipping mangemenet) -وفاء مرحلة الاساس كمبوني بورتسودان وممتحنة السنة ودعواااتكم معانا يا مشايخ -ابوذر معاهد التعليم البريطانية (خامس)
-ابوالقاسم تمهيدي ووريث سجادة الاسرة المرتقب باذن الله
3- المراحل الدراسيه:-

*ابوجبيهة الجنوبية السنة الاولي ثم المدرسة الشمالية بعد التشييد
*ابوجبيهة الوسطى
*الابيض الثانوية
*المدرسة الفندقية -هيئة السياحة والفنادق (مقرها كان بمباني فندق السودان)
*كلية الشرطة والقانون
*علوم حاسوب -تقنية معلومات البحر الاحمر
*تقنية معلومات (تصعيد)جامعة السودان المفتوحة
*حاليا علي مشارف الانتهاء من البلوم العالي وطبعا القراية بالسي سي لظروف العمل بس أكيد بدعوااتكم كله يهون
4- الدورات الداخليه والخارجيه:-
*دورات في برنامج الاسيكودا(automaited system for customs data)*الاسكودا المتقدمة وانظمة التشغيل (UNIX -LINUX)
*الاسكودا (النظام الذى يعمل حاليا
*التخطيط وبناء القدرات للرتب القيادية
*دعم اتخاذ القرار وبناء القدرات
*دورة في (COMPUTER FORNSIC)ماليزيا

*دورة فى نظام (ASYCUDA WORLD) ايران
*دورة في التخطيط الاستراتجي لتكنلوجيا المعلومات تونس
*دورة في (MSCE)الشقيقة مصر (منظمة الارادو)

5- العمل:-هيئة الجمارك السودانية

6- الرتبه:-
عقيد
7-الاقامه الحاليه:-
بورتسودان
8- الاهتمامات:-
الاعمال الخيرية عامة والاطلاع والمواكبة


..... باختصار .......
* ماذا استفدت من العسكريه
زيادة في الانضباط -احترام وتقدير الزمالة عمل الفريق الواحد

* أولاد عمر منقه حاضرى البديهه(ماذا تقول)
لأنهم رضعوا من ثدي الحبّاك
* ما بين ابوجبيهه وبورتسودان
دي رحلة عمر مشوار طويييييييييييل
من حلة عمك ارمياو الي العقبة

..... فى سطور .....
* شخصيه فى الذاكره
كل من علمني حرفا وفي كل المراحل التعليمية(اساتذتي الأجلا وعلي راس القائمة وبدون منافس المرحوم حسن السيد /العم والاخ والصديق الاستاذ الدكتور كمبال الطيب ناصر متعه الله بالصحة والعافية
* موقف لن تنساه
سفرية في الخريف مع للمدرسة بلوري عمنا محمد ياسين وكان يقوده عمكم عمر منقة ووقعنا في خور العوّاي وبلطف الله جات سليمة وبدون ايّ خسائر في الارواح
* كيف دخلت العسكريه
(طبعا دخلت بالباب الرئيسي وكمان كاتبين عليهو ادخلوها بسلام امنين)
طلع قرار بعسكرة الجمارك من السلطات فكانت الموافقة والتسكين والتدريب والتخرج والانخراط

..... أمين منقه قبل العسكريه وقبل الزواج.....
نحنا يانا نحنا شوية صلعة علي حبة لياقة وتمااااام سعاتك

..... شوية سياسه ......
الصالح العام قرار سياسى يهدد استقرار العسكريين والمدنيين غير الموالين للنظام الحاكم...... هل تعتقد أنّ هنالك أسباب أخرى؟
يعتمد نجاح العمل الاداري في مراقبة وتنفيذ السياسات وكل شيخ ليهو طريقتو ولا مش ؟؟؟؟


..... كلمه أخيره ....[b]
تحية الي ما لا حدود لمن قاموا بانجاز هذا العمل الرائع و الغير مسبوق ادارة ومشرفين واعضاء وعلي رأسم بالطبع الواد الفلتة ياسر سر الختم وانشاء الله في ميزان الحسنات
ونحمد الله ونشكر فضلة لجمعنا في هذا الوعاء الجامع والذي يسعنا ويسع كل من عرف الحباك او سمع بيها سمع سااااكت
يا ليت نغتم الفرصة الذهبية دي ونعمل سوا ويد واحدة وفي كل الاصعدة لرفعة أهلنا بالحبّاك ..
ختاما اخ عوض السيد اشكرك علي هذه الدردقة والفلفلة وفرد هذه المساحة .وأشكر كل الاعضاء والبورداب بتالمنتدى الجامع والعامر بكم وباثراءاتكم الهادفة وكبسولاتكم الناجعة .
وهذه دعوة منّي ومناشدة لكل الاحباب ان ينبذوا الخلافات ويلعنوا ابليس ويلتفتو الي هموم امنّا الحبّاك
حباها الله الامن والرخاء والسؤدد
(اللهم ارزقنا فهم النبيين وحفظ المرسلين وألهام الملائكة المغربين وجمّلنا بالتقوي وزينّا بالحلم وأكرمنّا بالعافية برحمتك يا أرحم الرّاحمين )

تصدق كلامك ثمين ...إنت رجل موهوب ومتمكن ما شاء الله من لغتك العربية وتعبيراتك الفنية ..وزوغاتك الهندسية ...وجرساتك الهوائية ... بالجد كلام مليان وتمام ومنظم و مرتب ...ولكين شككتني عجوز إنت ولا عجوز أنا ... وخوفتني بكلمة الجنوبية بعد التشييد ... تقصد الفصل القائم ...ولا مين ما تجنني يا جنابو ....وماشاء الله حتي أبنتي ولاء تخرجت من الجامعة ...والله كبرنا يا أمين ...وقلت لي الصلعة لحقت صحبك : عوض السيد ...وياخي إنت بخيل كده مالك؟؟؟!وصورتك الخايف عليها !!! وحتي لو إنسان بعزك بتبخل ليه بالصورة ؟؟؟؟ ... وطيب ما تشوفنا الصلعة دي ...وطبعاً هي أهم شئ ...وما تمشي بعيد .... كلامك ظريف ولطيف بخفت دمك يا منقةإنت ... وتحياتي وإحترامي بقدر أشواقي لرؤية شخصك الحبيب ... محبتي ...

أشكرك سعادة العقيد شرطه/محمد الأمين عمر اسماعيل منقه على تجاوبك وخفة دمّك التى عهدناها فى جميع ابناء عمنا عمر منقه.
شايفك فلفلتّ فلفله شديده بشارع(الهوا)....
أكرر شكرى لك أخى المحترم جنابو منقه

اهلا بسعادة الامين
شرفتنا كتير جدا ومتعتنا بحيثك الجميل عن حياتك الجميلة
ربنا يحفظك واولادك ومتعك بالصحة والعافية
امين منقى من اسرة كريمة عرفت بالحياد لذلك انتزعوا احترام كل اهل الحباك
شكرا لك اخي محمد الامين

(اللهم ارزقنا فهم النبيين وحفظ المرسلين وألهام الملائكة المغربين وجمّلنا بالتقوي وزينّا بالحلم وأكرمنّا بالعافية برحمتك يا أرحم الرّاحمين )

تعلمت هذا الدعاء وأنا إبن سبع من عمنا الفكي عمر آدم طيب الله ثراه.

شكرا أمين الأمة حفيد العالم منقة

استراحة ظريفة
جانبو ....
امين ......
متعك الله بعيالك

وفعلا العسكرية انضباط
علي ذكر مصر الشقيقة
تمشي عدل يحتار عدوك فيك

يديك الصحة والعافية ياجنابو ويخلي ليك عيالك لكن زي فال شاويش بعد تشييد الجنوبية علي حسب علمنا الجنوبية شيدت قبل الشمالية,لكم التحية

لك التحية والود اخي محمد الامين وشكرا علي هذه المساحة الرائعة وشهادتنا فيك مجروحة ولكن سنواتي في مكة وجدة تعرفت علي جوانب كثيرة اخري عن شخصية هذا الرجل الاصيل من اهلنا حجاج البحر وربنا يجعلوا كلو في ميزان حسناتكم
لا يفوتني ان اشكر صاحب الفكرة الرائع عوض السيد

الاخوة الاعزاء احباب المنتدي

مشكوريين علي المرور وبعدين يا شاويش و محمد سعيد انتو حاكنّي كدا مالكم ؟
وشكرا علي الملاحظة قبّال ما نروح في داهية /ول نوية الناس في عصر العولمة والتكنلوجيا التور ممكن ينضبح بالريموت يا عمك بس ما عهدنا فيك اللوم المهم نعتبرو مضبوووووووح يا ولد العم
والله يا حيدر ما في داعي نتبادل المديح وبرضو الحجاج قاعدين يطروكم لينا بالخير علي كرمكم واهتماماتكم بهم وهذا دأب آل الحبّاك عامة (فرسان حوبة) وربنا يديم المعروف

هاتفني ود الشاويش .. عثمان محمد يعقوب متسائلا عن مداخلاتي التي هي اليوم أشبه بالبرقيات وحق له السؤال وبالفعل والله أيها الأحباب ما حبسنا عن الإسهاب والمشاركات والتداخل إلا ضغوط العمل فمعذرة

والتحية لك أيها الصديق الحبيب ولا عدمناك من أخ كريم

لك التحية سعادة العقيد شرطة امين منقة...وعقبال الفريق...وشكرا علي السرد الجميل والمعلومات ...
وربنا يديك والعويله العافية ...

أخي عمر منقة متعه الله بالصحة والعافية يمتلك حساً كبيراً من الذكاء وسرعة البديهة الممزوجة بالفكاهة وأحكي موقف طريف جداً حدث لنا معه في عام 1970 .
المكان : منزل المرحوم أخي وصديقي حسن السيد البشير. أحد منازل المدرسة الشمالية
المناسبة: دعوة غداء وكوتشينة(كنكان).
الحضور: محمد رابح سعيد وحامد الطيب ناصر والحاج الجعلي أبشر وشخصي ومحمد تنير محمد أحمد وعمر منقة.
اللعيبة: فضل زميل محمد تنير وحسن السيد زميل عمر منقة.
السكور بتاعنا كويس وعمر منقة نزل عشان يحافظ اللعبةخاصة وعنده جوكرين فنزل النزول والورق مابيفتح وباقي ليه شايب هارت والجوكرين وكرتين غير مخاويات فنزل شايب الهارت مع الجوكرين ورمى البايظ وبقى بكرت واحد .فما كان من محمد تنير والذي كان معرجاً وفي يده شايب شرية وشايب ديناري وطبعاً هو خلاص ضمن الفتوح فقال لعر منقة متهكماً وأطلعه على الشايبين سمي الشياب زي ماعايز أنا فاتح فما كان من عمر منقة إلا أن قال ليه لا آس شايب دامة يعني جوكر آس وجوكر دامة والشايب في النص وقال لمحمد تنير شايبينك ديل عوس بيهن كسرةفخرج محمد تنير من المولد بدون حمص ولم يفتح.فغرق الجميع في الضحك.

ما شاء الله عليك يا فضل.....
انت برضو رجل ذكى كونك تتذكر القصه بحذافيرها وهى فى سنة 1970 (ماشاء الله تبارك الله).
سرعة البديهه فى الرد الحاضر الساخر عند عمنا عمر منقه هى الطبع الغالب عند كل أبناءه ربنا يديهم الصحه والعافيه.

التحية الخالصة لسيادة العقيد وجميع آل منقة تلك الاسرة المتفردة فمازالت اشجار النيم الشامخة امام منزلهم منتدا عامرا يعج بالرواد خاصة رواد لعبة الشطرنج ولقد عرف آل منقة بأنهم أمهر الاعبين في هذا المجال من اكبرهم حتي اصغرهم التحية لهم جميعا والدعاوي الصالحة لاكابرهم الذين انتقلوا الي جوار ربهم.