ضيف الأسبوع

تحياتى واحترامى لكم جميعا اخوتى واخواتى أحباب المنتدى وأنا أطل عليكم للمره الخامسة عشر بضيفى الخامس عشر فى هذه النافذه.
وقع الاختيار هذه المره على أخى الأصغر وأخوكم الخلوق الذى أجبرنا جميعا على احترامه لما يقوم به من متابعات لصيقه لأهم الأحداث الاجتماعيه وايرادها بالمنتدى أوّل بأوّل كما هو أيضا صاحب مساهمات متوازنه ومفيده. ضيفكم هو الأخ الرزين/زهير حسن السيد. فمرحبا به والى الحوار.

البطاقه الشخصيه
1_ الاسم بالكامل:-
2- الحاله الاجتماعيه:-
3- المراحل الدراسيه:-
4- العمل:-
5- الاقامه الحاليه:-
6- الاهتمامات:-
7- أرقام للتواصل:-

سؤال مباشر (1)
* من أنت لمن لا يعرفك؟

سؤال مباشر (2)
* فى مكالمات ومكاتبات مع كثير من أحباب المنتدى اعترفنا جميعنا أنك رجل تستحق الاحترام. ترى ما الذى يميّزك؟

فى سطور
* شخصيه من ابوجبيهه فى الذاكره. ليه؟
* زميل دراسه. ليه؟
* صديق تفتخر به. ليه؟

باختصار
* كيف تبدو لك الحياة وانت بعيد من البلد
*انت كبير البيت وهذا موقع خطير من واقع تجربتى. ماذا تقول
*شكل التواصل بين ابناء ابوجبيهه فى كادقلى

شوية سياسه
كيف تبدو الولايه فى ظل الحكومه الجديده من واقع قربكم وقراءتكم للأحداث؟



كلمه أخيره

مرحب بيك الضيف العزيز خفيف الظل الاخ/زهير نحنا في انتظارك مرحبا.

ضربت ليهو لقيتو صاحى من النوم.
يله فتشى جيبيهو شايفو لسه عامل(تقليه)

شكراً استاذي عوض السيد ...شرف وفخر لي بأن اكون ضيف عند حضرتك ...وحضرت الاخوه والاخوات الافاضل ...بمنتدي الحباك ...ودا كتير والله استاذي ...
مافي تقلية ...بس ظروف عملنا ...والله احيانا بعمل دخول للمنتدي لحدي ماأعمل خروج مابكون عرفت الحاصل شنو ...
لكم الشكر ...
بس خليكم منتظرين (شويه كي )بجيكم ...

مرحب بزهير نحن في انتظارك

في انتظارك اخي زهير

يا جماعه ما تصبرو زهير عايز يشاور المدام

اعمامي وأخوتي وأخواتي وأصدقائي..وأحبابي احباب المنتدي والحباك ...اسمحوا لي اولاً ان احيي الاخ ياسر سرالختم ...وعمنا الذي اعجز دائماً ان اقول في حقة كلمة واحده تتبعثر الكلمات عن شكره لااستطيع الا أن اقول امد الله في عمره ومتعة بالصحة والعافية الاوهو عمنا أزهري الحاج البشير ...وأيضاً اسمحوا لي في هذه العجالة ان احيي رفيق درب والدي واخية الذي لم تلده امه عمي فضل الحاج البشير ...
وايضاً الشكر كل الشكر لطلاب والدي في هذا المنتدي ...والشكر لكل الاخوة الذين رحبوا بي..
البطاقة الشخصية :-
الاسم بالكامل :- زهير حسن السيد البشير
المراحل الدراسية:-ابوجبيهه الابتدائية الجنوبية ...ابوجبيهة الشرقية المتوسطة ...ابوجبيهه الثانوية درست بها أولي وثانية وثالثة 15يوم ومنها الي العباسية الثانوية ...ولي قصة في ترك ابوجبيهه الثانوية والتوجه الي العباسية ...
ابوجبيهه الجنوبية كانت من اجمل ايامي الدراسية رغم المعانة التي كنا نعانيها كأبناء معلمين ...كوكبة من الاساتذه الاجلاء والمعلمات اكن لهم كل الاحترام والتقدير ...علي سبيل المثال ..الاستاذ علي ناصر(ابوكدوس)الذي كانت له صولات وجولات الاستاذ حسن محمد حسن الاستاذ الجليل الشيخ (ابوشلش)الاستاذ بابكر النو ...الاستاذه فتحية ملاح والاستاذه ليلي الامين ..والاستاذ مختار (الضب)والاستاذه فاطمة هجانة كانت اصغر المعلمات ...واستاذي الفاضل الذي اكن له كل الاحترام والتقدير وبأمانة كل الذين درسوني اكن لهم الاحترام والتقدير ولكن الاستاذ/سعيد محمد نواي كانت له مكانه خاصة واحترام خاص ...
الشرقية المتوسطة ..كانت مرحلة تحول جزئي في حياتي ...اساتذه اجلاء ...اذ انسي ولا انسي استاذ اللغة الانجليزية معتصم (اصمول هد)..الاستاذ احمد ادريس الاستاذ الطاهر بدوي ...الاستاذ محمد حامد (ودالجبل )الاستاذ سيد علي صالح (بشبش )واخي وصديقي الغالي الاستاذ ايهاب ابراهيم ادم ...طبعاً ايهاب دا حاجة تانية ياعوض السيد ولا شنو....
ابوجبيهه الثانوية ...كانت المحطة الاساسيو في حياتي ...تركنا لبس الرداء ولبسنا البنطلون البني ...اصبحنا رجال ...مجموعة من الاساتذه ...والطريف في الامر بعد عام دراسي واحد تحولت المدرسة الي مجموعة معلمين خدمة وطنية ...لهم الشكر ....
الدراسة الجامعية ...جامعة السودان للعلوم والتكنلوجيا ...درست بها عامين دراسيين ..بعدها تركة الدراسة لظروف اسرية بعد وفاة الوالد ....
العمل :-
بعد ترك الدراسة الجامعية عملت بشركة تسابيح للاستيراد والتصدير لمدة عام ...بعدها عملت في شركة وادي كوك لتجارة وانتاج الصمغ العري ...ودي حكايتها حكاية ...ثم انتقلت الي شركة اخري كانت تعمل مع وادي كوك وهي شركة النهضة التي منها عرفت 60%من قري وارياف السودان ...الان وكيل للشركة الوطنية للتأمين التعاوني المحدوده بكادقلي ..
الاقامة الحالية :
ولاية جنوب كردفان مدينة كادقلي ...متنقل بين الاحياء ...
الاهتمامات:
الاطلاع ..صلة الارحام ...جزء من السياسة
ارقام للتواصل :-
0912159493-0122245520-0916101023-0922071137
سؤال مباشر (1)
والله دي ذنقة عشان كده انا من قبيل قلت احسن نخليها تليل شوية ياأستاذ...(نحن طبعا مع جري الدنيا ومشاكلها بقينا زي الاواستن بنفتح الابالليل )
انسان بسيط ولد وترعرع في الحباك يحمل همومها ...احترم كبيرها وصغيرها ...لاشيئ سوي الحباك امي وابي ...
سؤال مباشر(2)
دعني اقول لك استاذي عوض السيد وكل احبابي بالمنتدي هذا كثير ...يعلم الله ان كان هنالك شيئ بسيط يميزني فهو حبي واحترامي وتقديري لكم جميعاً
في سطور
شخصية من ابوجبيهه في الزاكرة .ولية؟
عمنا علية رحمة الله /الحاج محي الدين الحاج ...
لااستطيع ان اكتب عنه ...صدقوني لا استطيع ...
زميل دراسة .ولية ؟
التحية لكل زملاء الدراسة ...وان كنت اود الحديث عن واحد منهم فهو زميلي عبد السلام عثمان الذي نال درجة الماجستير هذه الايام فهو يحتاج منا للتقدير والاحترام للذين لايعرفونه كان من اميز الطلاب بالمدرسة ترك الدراسة بعد امتحان الشهادة السودانية والتحق بقوات الشرطة (الزول كان طاره طبعاً)فحزنا كدفعة لتركة للدراسة ولكن بعد سنوات ترك العمل الشرطي والتحق بالجامعة فكان مثال للانسان الطموح ...
صديق تفتخر بة وليه ؟
كنا ثلاثي في ابوجبيهه ...الاخ راضي عيسي والاخ اسماعيل هجانة ...لهم مني كل التقدير ...
ومسألة الاصدقاء دي ...طبعاً تحولت صداقاتي في عمر مبكر الي اشخاص اكبر مني عمراً كانت لي نظره خاصة جدا لهذه الصداقات ...بغرض الاستفادة من خبرات هؤلاء الكبار في الحياة ..وهذا يقودني الي سؤال انت كبير البيت اولاً اود توضيح معلومة اكبر البيت هو اخي وصديقي وحبيبي صلاح الدين ...ولكن لتحملي مسئولية اخوتي يعتبر مجموعة من اهل الحباك انني اكبر من صلاح ...واقول ربنا يقدرنا علي تحمل المسئولية ...
الحياة وانا بعيد عن البلد لاتختلف كثيراً عن حياة الغربة خارج الوطن ...ارتباطنا اصبح بالاعياد والمناسبات ...ربنا يلم الشمل ...
التواصل بيننا في كادقلي كالعادة نلتقي كل يوم والاخبار اول بأول فهو جيد جداً ...حتي اصبحنا والحمد لله ملاذ لكل الاهل والاخوة القادمين من الحباك...وللامانة يجتمع عندنا حتي ابناء كادقلي ...فكانت سمه بارزة وحديث المدينة بأن ابناء ابوجبيهه اينما وجدتهم وجدت الناس حولهم ...
شوية سياسة :
دي بس ياعوض السيد حقوا تعفيني منها ...
لو اتكلمت هسي بكره بجيبوني وزير ولا يودوني (الرج) والاتنين انا مادايرهم ...

كلمة اخيره :
طبعاً انا قلبت الاية ..ولكن الشكر كل الشكر لك استاذي عوض السيد علي هذه الاستضافة (طبعاً دي اول مره في حياتي )امنياتي ان اكون ضيف خفيف عليكم ...
مودتي ...

شكرا زهير علي هذا السرد الجميل والتحية والتجلة لكل هولاء الاساتذة الذين تعلمت منهم وربنا يخليك ويقويك لكن في بعض الاشياء لم تذكرها اظنك تخارجت بسرعة

زهير أخوى والله ما قصّرت.
أشكرك على السرد الجميل كما أشكرك على رحبة صدرك واستجابتك السريعه.
أسأل الله ان يقوّيك على تحمل المسئوليه التى أنت أهل لها.
أكرر شكرى واحترامى لك يا زهير

ما شاء الله تبارك الله اخي زهير وربنا يحفظك
لم تسنح لي الفرصة لمعرفتك عن قرب
واري إنك انسان واعي واكبر من عمرك بكثير
ادام الله عليك نعمة العقل

قلت هذا الشبل من ذاك الاسد.

شكرا زهير على صبرك فكنت ضيف خفيف و ظريف و ( نضيف )

الله يديك العافية.

تحياتى

حقا زهير كان نجما فى السرد والفصاحه ويستحق كل هذا الثناء ومن شابه أباه فما ظلم.

القومة والوقوف ليك يا اخوى الاصغر ..اخى فيصل خليل ما تشيل هم هو صغير بس ما اوى..ربنا يقويك ويديك الفى المرادك ويبعد عنك كل بلاء ويسهل ليك طريقك ويبعد عنك كل شر ويجعل ليك فى كل خطوة سلامة يا زهير يا ود اختى...واللة ضيف ظريف بس فى حاجات ما قلتها زى وزى وزى ...تسلم يا سيدى

اللهم أغفر للحاج وأرحمه وأجعل الفردوس الأعلى مثواه دون حساب ... اللهم أحبه فإنّا نحبه ..

شكرا زهير علي هذه الاريحية في السرد والتحية والتقدير لاساتذتنا الاجلاء الذين قدموا الكثير واولهم استاذنا حسن السيد عليه رحمة الله
ورحم الله الحاج محي الدين فقد كان دمث الخلق لين الجانب طيب المعشر واجتماعي من الدرجة الاولي وقدم لمدينة ابوجبيهه الكثير دون من ولا اذي عرفته رجل متواضع متفاني في خدمة الناس ويضحي بالغالي والنفيس من اجل ذلك فهو رجل قدوة.

شكرا يا ابو النسب....ربنا يقدرك على تحمل المسؤلية...بالله صلاح كبير البيت؟؟؟والله دى جديده على...
الله يرحم الحاج محى الدين فهو نسيج متفرد...ويرحم كل شيوخ الحباك....قلت لى أستاذك (ابكدوس)...والله يا زهير كان جرجرته لينا على المنتدى يكون جميل....
لك الود

شكراً لكم جميعاً علي المرور فهو قلادة شرف ...وتاج افتخر به ...ويزيد فخري بوجودي بينكم ...ايها الصفوة ...

ودمتم ...

اخي زهير ..

ويا ليتني اقدر اقول فيك الكلام الما انكتب !!!
ضافي ووافي .....معلّم وابن معلّم

وبالتوفيق دوما

اخي زهير ..

ويا ليتني اقدر اقول فيك الكلام الما انكتب !!!
ضافي ووافي .....معلّم وابن معلّم

وبالتوفيق دوما

اخى زهير حسن السيد..انت ابن استاذنا الجليل بلل الله ثراه واسكنه فسيح جناته.. الذى تعلمنا منه تذوق الشعر..والعربى الفصيح ..طيلة خمسة سنوات من الصف الثانى حتى السادس..كان استاذنا يصدح نغما فصيحا وحصة اللغة العربية من احب الحصص الى قلوبنا كان مبتسما حتى وهو يأدبنا..والله يازهير ما كلاماتى فى اللغة إلا من صناعة ذاك الرجل الذى وارى الثرى ذاك المربى..اكن له جميلا لا اوفيه حقه مهما قلت..
بعدين يازهير عندك اخوانك كثر منهم ازهرى موسى شقيقى الاكبر ..بطل الشطرنج وادريس موسى..ود.ابوالقاسم عبدالرحيم ..
لقد دخلت المنتدى اخطف خطفة سريعة مع زنقة الشغل ..لقد اقترحت للزملاء تلاميذ والدك عليه رحمة ان نقيم تأبيين لاستاذنا الجليل..يرحمه الله
نأسف على الإطالة

شكراً الاعزاء ..الفاتح ...ابن عمي أمين ...الغالي عثمان موسي...

أمين :وين العريس ...
عثمان موسي انا علي تواصل مع الاخ أزهري ...أزهري نعم الاخ والصديق ..زكان لي الشرف بان افطر في اول بيت في كادقلي رمضان الماضي معه في البيت ...

اخى زهير الحباك امنا التى شبينا فيها لن ننساها ولن تنسانا إنشاء الله ..فانت سيرة عطرة مدثترة بالزعفران والورد..شكرا لك والتحية لازهرى موسى وكل الجالية الحباكية بكادقلى..

العريس اليومين ديل نازل ضيف عزيز ومكرّم علي الحبّاك

بلد الخير والطيبة ....

وان شااااااء الله حال العزابة يا ول نوية وقول يامين

شكرا يا زهير يا رائع 00بالجد كنت ضيف خفيف الظل 00ومتعتنا بهذا السرد الرائع

تم تعديل الألوان عشان ماتتزغللوا وعفوا ول نوية

المشرف

شكراً غريق ياكبير ...

ول نوية اخبارك ...والله طشش عيونا بي الوانك ديل نحن كده والجماعة (دلاك كيف )طبعاً عارفين نفسهم ...

زهير تحياتى واحترامى.
سأعود بضيف اخر قريبا.
والله صدقنى فى البال لكن كل ما افتح المنتدى ألقى نفسى منغمس فى قراءة المشاركات والرد عليها والزمن ماشى.
لك ما طلبت يا عزيز

يا عوض السيد موضوع الضيف مهم جدا ارجوا الاستمرار فيه

بالجد إنت رهيب ...وتقول لكتابة ود نوية ..طشطشت عيونا ...والله ضحكتني شديد ...واسمع ده ...بكم لفة سيجارة ...بالجد كنت مبدع ...ولك تحياتي وحبي ...وكفيت ووفيت ... محبتي

حاضر انشاء الله يا شباب.
فعلا فكرت فى العوده بأحد أصحاب الأسماء الحركيه وأرجو ان يستجيبوا

ايوه يا ابوابراهيم000بالله ما تنسى المجنن بوبى

اخى الرائع الاستاذ عوض السيد فكرة ضيف الاسبوع فكرة جميلة رائعة بالجد عجبتنى واول مره طبعا اكتشفها فالى الامام اخى وبالتوفيق

زهير يا رائع كان السرد جميل وفقك الله اخى وكنت ضيف خفيف الظل بالجد تحياتى ودمت

الغالي إبن (العزيز الغالي رحمة الله عليه ما برق بالصبح بارق أو بُعيد ظلامِ) كيف حال كِلبي وكُلبا وكليمو(رغم مواقف رجال أمن نميري معنا ) والسَّمة والشعيروكرورات وكرتالة وام سفيف وخور البرداب وخريف كادقلي الجميل كنا بها ثلة من الأساتذة بمدرسة البنات الثانوية بميز الأساتذة بحي الموظفين سنة 1977 وكنت ضمن أول إدارة خرجت طالباتها منهن من أبي جبيهة فتحية عبدالرازق وثريا عثمان وسلمى ميرغني وسواكن قمرالدين ووداد ونجوى صالح عبدالماجد ونادية محمد أحمد بخيت وآمنة قادم أحمد ونادية الرشيد عبدالله وكثيرات لا أتذكرمع طول الزمن..لكن خريف كادقلي عينة لا يشبهه إلا خريف رشاد والأبيض

سلامات
زهير لك التحيه اولا وكيف حالك شكرا لك وشكرا لاستاذنا عوض السيد وشكرا لينا كلنا علشان صبرنا عليك وانت تنداح فى سرد المعلومات ههههههههههههههههه

يا زهير بينى بينك كده استعنت بصديق ولا فى اجابات مساعده .اكيد انت مذاكر كويس صح؟ اعترف

طبعا الخال فيصل قال ليك كلام جميل جدا ( اشكرك على صبرك فكنت ضيف خفيف وظريف (نظيف) ) السعال هو الصبر على اخو منو نحنا ولا وانت

ظريف مافهاش شك لكن خفيف دى ياربى فى الضل (اقصد الظل كما يقولون )ولا فى الوزن بدون تعليق

اخيرا ربنا يديك الصحه والعافيه ياود خالتى ويكملك بعقلك

ودمتم فى امان الله لكم احترامى

الاخ زهير سلامات سألت عليك العافيه

لكين الهجمه خلتك متألق الله لا جاب الضيق

الود يا ناس سجمى طلع مغرور قال خفيف دى مافى شك هههههههههههههه والله ما تصدقنى حشاك من الغرور عم بمزح معاك

انا طبعا عبد المأمور يا اخوى الايام دول بدلا من كاكا وكنده وكوكو والكرقل بقينا محمد صالح واشيك وهاج

حيث القاش وطوكر وتوتيل والتاكا


لك شكرى